Milliy aviakompaniyanı transformaciyalawǵa baylanıslı usınıslar kórip shıǵıldı

Prezident Shavkat Mirziyoev 14-dekabr kúni «Uzbekistan airways» akcionerlik jámiyetin transformaciyalawǵa baylanıslı usınıslar menen tanıstı. Mámleketimiz basshısınıń 2021-jıl 30-apreldegi qararında puqaralıq aviaciya kárxanaların transformaciyalaw boyınsha wazıypalar belgilengen edi. Bul baǵdarda aldıńǵı sırt el tájiriybesi úyrenilmekte, jetik konsultantlar tartılmaqta. Atap aytqanda, «Uzbekistan airways» akcionerlik jámiyetin reformalaw boyınsha túrkiyalı qánige Ilker Ayji jámááti menen jumıs alıp barılmaqta. Ol «Túrk hawa jolları» aviakompaniyasın basqarǵan waqıtta onı regionallıq dárejeden globallıq dárejege tabıslı alıp shıqqan. Búgin «Uzbekistan airways»tıń aldına da sonday wazıypa qoyıldı. Mámleketimizdiń geografiyalıq ornalasıwı hám taraw infrastrukturasınan aqılǵa uǵras paydalanıp, onı xalıqaralıq transport xabına aylandırıw názerde tutılǵan. Tanıstırıwda mámleketimiz basshısına «Ózbekstan hawa jolları»n transformaciyalaw hám rawajlandırıw boyınsha islep shıǵılǵan strategiya haqqında málimleme berildi. Oǵan muwapıq, aviakompaniyaǵa xalıqaralıq tájiriybe tiykarında korporativlik basqarıw sistemasın engiziw, hawa kemelerin kóbeytiw, xızmetlerdiń sapasın arttırıw hám júk tasıw tarmaǵın keńeytiw ilajları kóriledi. Sırt el investorların tarta otırıp, aviakompaniyanı jáhán standartları tiykarında menshiklestiriw jumısları juwmaqlandı. Bulardan gózlengen tiykarǵı maqset «Ózbekstan hawa jolları»n jetekshi regionallıq aviakompaniyaǵa aylandırıw, sonday-aq, xalıqtıń jergilikli hám xalıqaralıq jónelislerde arzan bahalarda háreketleniwin támiyinlewden ibarat bolıp tabıladı. Prezidentimiz bul rejelerdi maqullap, onıń orınlanıwına tezirek kirisiw kerek ekenin atap ótti. – Bul tarawda on jılǵa keshikkenbiz. Aviakompaniya eski usılda islemekte, jolawshılar xızmet sapasınan razı emes. Eger ekonomikamızdı, turizmdi rawajlandıramız desek, birden-bir jolımız usı, – dedi Shavkat Mirziyoev. Aviakompaniyada joybar ofisin dúzip, transformaciya procesin muwapıqlastırıp barıw boyınsha usınıslar berildi.