Berilgen tapsırmalar belgilengen múddetlerde orınlanbaqta
1327
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonınıń sociallıq-ekonomikalıq jaǵdayı hám xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanısıw maqsetinde rayonda bolıp, bir qatar qurılıs obektleri menen jaqınnan tanıstı. Solar qatarında Arnaboyı máhállesindegi belgilengen rejeden artta qalıp atırǵan 33-sanlı mektepke shekemgi bilimlendiriw shólkemi imaratınıń qurılıs jumısların sınǵa alıp, sapalı túrde tez arada juwmaqlaw boyınsha juwapkerlerge anıq tapsırmalar bergen edi.
Usı tiykarda Arnaboyı máhállesindegi 33-sanlı mektepke shekemgi bilimlendiriw shólkemi imaratınıń qurılıs jumısları juwmaqlanıp, paydalanıwǵa tapsırıldı. Jaqında usı mektepke shekemgi bilimlendiriw shólkeminiń ashılıwı bolıp ótti.
Ótkerilgen ilajda jıynalǵanlar balalar ushın shólkemlestirilgen oyın maydanshaları, shınıǵıw xanaları hám basqa da jaratılǵan sharayatlar menen jaqınnan tanıstı.
Qurılıs jumısları juwmaqlanıp, baqsha imaratı paydalanıwǵa tapsırılǵannan soń eń baslısı, aymaqtıń 120 balası mektepke shekemgi bilimlendiriw shólkemine qamtıp alındı hám olar endi zamanagóy kórinistegi imaratta bilim hám tárbiya aladı.
Qaraqalpaqstan Respublikası Joqarǵı Keńesiniń Málimleme xızmeti