Nókis rayonında Ruwxıylıq hám aǵartıwshılıq orayı imaratı paydalanıwǵa tapsırıldı
905
Ózbekstan Respublikası Prezidentiniń 2021-jıl 26-marttaǵı PQ-5040-sanlı qararına tiykar, 2021-2023-jıllarda Qaraqalpaqstan Respublikasında 16 orında Ruwxıy-aǵartıwshılıq orayların qurıw belgilenip, usı imaratlardıń qurılıs jumısları baslap jiberilgen edi.
Búgin Nókis rayonlıq Ruwxıy-aǵartıwshılıq orayınıń qurılıs jumısları juwmaqlanıp, saltanatlı túrde ashılıw máresimi bolıp ótti.
Ashılıw máresiminde Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, jıynalǵanlardı jańa imarat paydalanıwǵa tapsırılǵanlıǵı múnásibeti menen qutlıqladı.
Aytıp ótiw orınlı, imaratta májilisler zalı hám kitapxana, sonday-aq, qánigelerdiń xızmet xanaları hám basqa da bir qatar qolaylıqlar jaratılǵan.
Bunday záwlim imaratlar hár qanday adamnıń zeynin ashadı. Sonıń menen birge, jaslardıń ana Watanǵa degen súyispenshiligin arttırıwda, onıń rawajlanıwı jolında ayanbay miynet etetutuǵın jetik insanlar etip kamalǵa keliwinde ruwxıylıq hám aǵartıwshılıq oraylarınıń ornı ayrıqsha áhmiyetli.
Usı tiykarda, respublikamızdıń barlıq orınlarında usınday ruwxıy-aǵartıwshılıq orayları qurılmaqta. Álbette, bulardıń barlıǵı eń dáslep mámleketimizde alıp barılıp atırǵan ádil siyasat hám onıń nátiyjesiniń jáne bir kórinisi esaplanadı.
Qaraqalpaqstan Respublikası Joqarǵı Keńesiniń Málimleme xızmeti