Rawajlanıwǵa – tek ǵana mashaqatlı hám jigerli miynet arqalı erisiledi
1264
Prezident Shavkat Mirziyoev 2022-jıl 20-dekabr kúni Oliy Majlis hám Ózbekstan xalqına gezektegi Múrájatın jolladı.
Ózbekstan Respublikası Paytaxtındaǵı Xalıqaralıq kongress orayında bolıp ótken ilajda Oliy Majlis Senatı aǵzaları hám Nızamshılıq palatasınıń deputatları, mámleketlik shólkemlerdiń basshıları, jámiyetshilik wákilleri qatnastı.
Múrájat onnan artıq telekanal arqalı janlı efirde, sonday-aq, Prezidenttiń sociallıq tarmaqlardaǵı betleri arqalı onlayn sáwlelendirilip barıldı.
Mámleketimizdiń siyasiy turmısındaǵı eń áhmiyetli waqıya bolǵan bul ilaj 2017-jıldan berli ótkerilip kelinbekte. Onda juwmaqlanıp atırǵan jıldaǵı tiykarǵı kórsetkishler, jańa jılǵa mólsherlengen maqset hám wazıypalar járiyalanadı. Sonıń ushın xalqımız bul ilajdı bárqulla úlken qızıǵıwshılıq penen kútedi.
Mámleketimiz basshısınıń ayrıqsha atap ótkenindey, janajan Ózbekstanımız milliy rawajlanıwdıń jańa dáwirine isenimli qádem qoymaqta. Turmısımızdıń barlıq tarawlarında úlken ózgerisler júz bermekte.
Bıyıl xalqımız 36 milionnan astı. Hár jılı qatarımızǵa derlik 900 mıń jańa áwlad qosılmaqta.
Prezident Shavkat Mirziyoev juwmaqlanıp atırǵan 2022-jıl oǵada qıyınshılıqlı hám sınaqlı jıl bolǵanın atap ótti. Bul dáwirde toplanǵan tájiriybe bir haqıyqattı anıq dálillep berdi: rawajlanıwǵa-tek ǵana mashaqatlı hám jigerli miynet arqalı erisiledi.
– Sonıń ushın pandemiya, dúnyadaǵı tereń ekonomikalıq hám siyasiy krizisler, kelispewshiliklerge qaramastan, xalqımızdıń jigerli miyneti arqalı erisken ayırım jetiskenliklerimizdi aytıp ótiwdi orınlı, dep bilemen, – dedi mámleketimiz basshısı.
Elimizde ámelge asırılǵan keń kólemli hám nátiyjeli reformalar nátiyjesinde jalpı ishki ónimniń kólemi birinshi márte 80 milliard dollardan astı.
Ekonomikamızǵa usı jıldıń ózinde 8 milliard dollar tikkeley sırt el investiciyaları kirip keldi, eksport bolsa, 19 milliard dollarǵa jetti.
Bunday nátiyjeler burın bolmaǵanın atap ótiw zárúr.
Bıyıl tariyxımızda birinshi márte pensiya hám sociallıq napaqalar muǵdarı minimal tutınıw qárejetlerinen az bolmaǵan dárejege alıp shıǵıldı. Mısalı ushın, 2017-jılda kem támiyinlengen 500 mıń shańaraq sociallıq járdem alǵan bolsa, házirgi kúnge kelip 2 millionnan artıq shańaraqlarǵa járdem berilmekte. Ajıratılıp atırǵan qarjılar bolsa, 7 esege kóbeytilip, jılına 11 trillion sumǵa jetti.
– Bul sanlardı aytıw ańsat. Olardıń hár biriniń artında mashaqatlı miynet tur. Sebebi insan qádiri, insandı qádirlew – itibarımızdaǵı eń tiykarǵı másele,-dedi Shavkat Mirziyoev. – Usı maqsette keyingi altı jılda mámleketimiz boyınsha derlik 300 mıń yamasa aldıńǵı jıllarǵa salıstırǵanda 10 esege kóp turaq jaylar qurdıq.
Xalqımızdıń densawlıǵın saqlaw ushın barlıq medicinalıq xızmetler rayon hám máhálle dárejesine túsirilmekte.
Búgingi kúnde Ózbekstan dúnya siyasatınıń oraylarınan birine aylanıp atırǵanı, xalıqaralıq jámiyetshilik bunı keńnen tán alıp atırǵanı da haqıyqat.
Ózbekstanda Shanxay birge islesiw shólkemi hám Túrkiy mámleketler shólkemi sammitleri sonday-aq, onlaǵan joqarı dárejedegi xalıqaralıq ánjumanlar bolıp ótti. Bulardıń barlıǵı mámleketimizdiń xalıqaralıq abırayı kún sayın artıp baratırǵanınan dárek beredi.
– Mámleketimizdiń rawajlanıwın jańa basqıshqa alıp shıǵıw ushın basqarıw da, nızamshılıq ta, jámiyetimiz de ózgeriwi kerek. Eger solay islemesek, mashqalalardı kórip, kórmewge alsaq, zamannan arqada qalamız. Xalqımız, jas áwladımız bizden razı bolmaydı,-dedi mámleketimiz basshısı.
Sonıń ushın «Aldın – insan, keyin – jámiyet hám mámleket» degen ideyanı Konstituciyamız hám nızamlarımızǵa, kúndelikli turmısımızǵa da tereń sińdiriwimiz kerek. Házirgi kúndegi awır sınaqlar hám boljap bolmaytuǵın qáwip-qáterlerdi jeńip óte alatuǵın milliy mámleketshiligimiz tiykarların bekkemlewimiz zárúr.
Solardı itibarǵa alǵan halda, Tiykarǵı nızamımızdı jetilistiriw jumısları dawam ettirilmekte. Bul reformadan xalqımız úlken ózgerisler kútpekte. Házirgi kúnge shekem bul baǵdarda 220 mıńnan aslam usınıs kelip túskeni de bunıń ayqın dálili bolıp esaplanadı.
«Jámiyet – reformalar baslamashısı» principi tiykarında barlıq máseleler boyınsha xalqımız benen másláhátlesip is tutılmaqta.
Ulıwma, mánisi hám mazmunı insan qádirin ulıǵlaw ruwxı menen bayıtılǵan, keleshek áwladlarǵa múnásip xızmet etetuǵın, Jańa Ózbekstanǵa sáykes bolǵan Konstituciyanı hár tárepleme oylap, asıqpastan islep shıǵıw kerek ekenligi atap ótildi.
Puqaralarımızdıń bildirgen barlıq pikir-usınısları, álbette, inabatqa alınadı hám Konstituciya joybarı ulıwma xalıqlıq referendumǵa alıp shıǵıladı.
Ádettegidey, Múrájattıń eń tolqınlandırıwshı bólimi jańa jılǵa atama beriliwi boldı. Mámleketimiz basshısı kelesi jılǵa rejelerdi durıs alıw ushın xalqımızdıń pikirin hár bir baǵdar boyınsha tereń tallap, 20 mıńǵa shamalas usınıslar dodalanǵanın atap ótti.
– Adamlarımız bilimlendiriw, densawlıqtı saqlaw, ekonomika baǵdarlarında anıq-ayqın máselelerdi kóterip, olar boyınsha sistemalı sheshimlerdi de usınıs etpekte. Xalqımız bizden mektep, baqsha hám emlewxanalardı kóbeytiw, bilimlendiriw hám medicinanıń sapasın arttırıwdı, máhállede jol, suw, elektr, transport mashqalaların sheshiwdi, jumıs orınların kóbeytiw, isbilermenlikke jańa imkaniyatlar jaratıwdı, ádillikti támiyinlew, sergizdanlıq, byurokratiya hám koorupciyanı joq etiwdi kútpekte. Kóterilgen máseleler anıq hám orınlı bolıp esaplanadı. Qanshelli qıyın bolmasın, biz bul mashqalalardı sheshiwimiz shárt,-dedi Prezident.
Mámleketimiz basshısı kirip kiyatırǵan 2023-jıldı mámleketimizde Insanǵa itibar hám sapalı bilimlendiriw jılı, dep atawdı usınıs etti. Prezidentimizdiń bul usınısı ilaj qatnasıwshıları tárepinen qızǵın qollap-quwatlandı.
Kelesi jıl ushın reje hám baǵdarlamalar anıq belgilep alınıp, ǵárezsizlik jıllarında erisken jetiskenliklerimizdi jáne de bekkemlep, eń áhmiyetli hám baslı tarawlardı rawajlandırıwǵa ayrıqsha itibar qaratılıwı zárúr ekenligi atap ótildi.
Íqsham hám nátiyjeli mámleketlik basqarıw sistemasına ótiw, Jańa Ózbekstandı «sociallıq mámleket» principi tiykarında qurıw, insan huqıqları menen erkinliklerin isenimli qorǵaw, erkin bazar mexanizmlerin engiziw, salamat báseki hám jeke menshik múlkke qol qatılmaslıǵın támiyinlew, isbilermenlikti qollap-quwatlaw, ekonomikaǵa jergilikli hám sırt el jeke menshik investiciyaların kóbeytiw ushın sharayatlardı jáne de jaqsılawǵa qaratılǵan eń áhmiyetli wazıypalar, ishki hám sırtqı siyasatqa baylanıslı tiykarǵı baǵdarlar belgilendi.
Prezident Múrájatta aytılǵan wazıypalardı dúnyadaǵı házirgi quramalı sharayatta ámelge asırıw ańsat bolmaytuǵının atap ótti.
– Biraq biz ótken dáwirde úlken bilim hám tájiriybe topladıq. Eń áhmiyetlisi, óz kúsh hám imkaniyatlarımızǵa bolǵan isenimimiz kún sayın artıp barmaqta.
Sonıń ushın, qanshelli qıyın bolmasın, tańlaǵan jolımızdan hesh qashan artqa qaytpaymız. Gózlegen sheklerimizge, álbette, jetemiz.
Bul jolda niyeti ullı, qálbi pák, miynetkesh xalqımızǵa súyenemiz. Bir tán bir jan bolıp háreket etsek, el-xalqımız umtılıp atırǵan Jańa Ózbekstandı álbette, barlıǵımız birgelikte quratuǵınımızǵa isenemen,-dedi mámleketimiz basshısı.
Prezident sóziniń sońında jıynalǵanlardı, pútkil xalqımızdı kirip kiyatırǵan Jańa jıl bayramı menen shın kewilden qızǵın qutlıqlap, saw-salamatlıq, qut-bereket, shańaraqlıq baxıt tiledi.