Ózbekstan Qaharmanı, siyasiy isker, mámleketlik ǵayratker Musa Tajetdinovich Erniyazovtıń 75 jıllıq yubileyi keń túrde belgilendi

Búgin siyasiy isker, mámleketlik ǵayratker, derlik 50 jıllıq miynet jolı dawamında óziniń úlken basshılıq potencialı, bay bilim hám tájiriybesi, insanıylıq pazıyletleri, Watanımızǵa sheksiz muhabbatı hám sadıqlıǵı menen haqılı túrde xalqımızdıń júrek tórinen tereń orın alǵan ullı insan Musa Tajetdinovich Erniyazov tuwılǵanınıń 75 jıllıq yubileyi múnásibeti menen keń kólemli ilajlar ótkerildi. Dáslep, Ózbekstan Respublikası Bas ministriniń orınbasarı Shuhrat Ǵaniev, Qaraqalpaqstan Respublikası Joqarǵı Keńesiniń Baslıǵı Amanbay Orınbaev Musa Erniyazovtıń qábirin ziyaratladı hám marhumnıń esteligi húrmetine Quran oqıldı. Onda Qaraqalpaqstan Respublikası Ministrler Keńesiniń Baslıǵı F.Ermanov, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı. Bunnan soń, Qaraqalpaqstan Respublikası Joqarǵı Keńesiniń májilisler zalında belgili jámiyetlik isker, Ózbekstan Qaharmanı Musa Tájetdinovich Erniyazovtıń tuwılǵanına 75 jıl tolıwı múnásibeti menen eslew keshesi bolıp ótti. Onda marhumnıń esteligine arnalǵan hújjetli film tamasha etildi. Ilajda, sonday-aq, Musa Tajetdinovich Erniyazovtıń jaqınları, húkimet aǵzaları, siyasiy-jámiyetlik ǵayratkerler, nuranıylar hám student-jaslar qatnastı. Bunnan keyin, eslew keshesi kórkem óner tarawı wákilleri tárepinen tayarlanǵan kórkem-ádebiy bólim menen dawam etti.

Qaraqalpaqstan Respublikası Joqarǵı Keńesiniń Málimleme xızmeti