Qaraqalpaqstanda samal elektr stanciyasın qurıw boyınsha shártnamaǵa qol qoyıldı

Búgin, 23-dekabr kúni Tashkent qalasında Saudiya Arabstanınıń «ACWA Power» kompaniyası menen Qaraqalpaqstanda ulıwma quwatlılıǵı 1500 MVt bolǵan samal elektr stanciyasın qurıw boyınsha shártnamalarǵa qol qoyıw ilajı bolıp ótti. Ózbekstan Energetika ministrliginiń xabar beriwinshe, ilajǵa Saudiya Arabstanı Investiciyalar ministri Xalid al-Falih, «ACWA Power» kompaniyası basqarıwı baslıǵı Muhammad Abunayyan, Ózbekstan Energetika ministri J.Mirzamahmudov, Investiciyalar hám sırtqı sawda ministri J.Xodjaev hám shólkem basshıları qatnasqan. Úlken quwatlılıqqa iye usı samal elektr stanciyası 2026-jılı iske túsiriliwi, jılına 5,2 milliard kVt-saat elektr energiyasın islep shıǵarıwı hám bunıń nátiyjesinde jılına 1,5 milliard kub metr tábiyǵıy gaz únemleniwi jobalastırılǵan. Eń áhmiyetlisi, stanciyada 300 MVt/550 MVt-saat elektr saqlaw ximiyalıq batareyaları (akkumulyatorlar) ornatıladı. Bul batareyalar samal turbinalarınan shıǵatuǵın ózgeriwsheń elektr energiyasın muwapıqlastırıp beredi.