Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń isbilermenler ushın qabıllawı bolıp ótti

Búgin Nókis qalasındaǵı Sawda sanaat palatası imaratında bir qatar isbilermenler ushın Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı. Bolıp ótken qabıllawda Joqarǵı Keńes Baslıǵınıń jeke qabıllawına jazılǵan dizim boyınsha isbilermenlerdiń múrájatları tıńlanıp, ornında sheshim tabıw ilajları kórildi. Ushırasıwda bildirilgen múrájatlar tiykarınan biznesti qarjılandırıw hám kredit ajıratıwdı ápiwayılastırıw, sonday-aq, isbilermenlik jumısın jetilistiriwde ushırasıp atırǵan byurokratiyalıq tosıqlar hám ayırım xızmet kórsetiw jónelislerindegi isbilermenlik jumısların qollap-quwatlaw boyınsha bolıp, Joqarǵı Keńes Baslıǵı tárepinen barlıq mashqalalar tıńlandı.

Aytıp ótiw orınlı, ekonomikanıń turaqlı ósimin támiyinlew hám isbilermenlik ushın qolaylı sharayatlardı jaratıw, biznes subektlerin qollap-quwatlawǵa qaratılǵan ilajlar búgin ekonomikalıq hám sociallıq rawajlanıwlardı jańa basqıshqa kóteriwge qaratılǵan ámeliy jumıslarda óz sáwleleniwin tawıp atır. Prezidentimiz tárepinen qabıl etilgen 213-sanlı tariyxıy Pármanda da qaraqalpaqstanlı isbilermenler ushın bir qatar jeńillikler jaratılǵan. Bildirilgen múrájatlar boyınsha ornında sheshimin tabıw ilajları kórilip, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Sonday-aq, óz baslaması menen kelgen isbilermenler pikirleri tıńlanıp, jańa jumıs orınların jaratıw niyeti bar hár qanday biznes júrgiziwshi qollap-quwatlanıwı atap ótildi.

 

Qaraqalpaqstan Respublikası Joqarǵı Keńesiniń Málimleme xızmeti