Kegeyli rayonı Aqtuba awıl puqaralar jıyını aymaǵınan "Aqtuba textil group" kárxanası boy tikledi.
2288
Tigiwshilik kárxanasınıń ashılıw máresimine Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ándijan wálayatınıń hákimi Shuhratbek Abdurahmonov hám miymanlar menen birge kárxanada islewshi hayal-qızlar, nuranıylar qatnastı.
Joybardıń ulıwma bahası 30 mlrd sum bolıp, 500 hayal-qızdı turaqlı jumıs penen támiyinlew rejelestirilgen. Házirgi kúnde 393 hayal-qızlar jumıs penen támiyinlendi. Joybardın jıllık kuwatlılıǵı 2,4 mln. dana trikotaj ónimlerin islep shıǵarıwǵa teń.
Kárxana tárepinen Rossiya mámleketi menen 1 jıllıq shártnama dúzilip, búgingi kúnde erler, hayallar hám balalar kiyimleri sapalı etip tigilmekte.
Tigiwshilik kárxanasınıń ashılıwı Kegeyli rayonı turǵınları ushın haqıyqıy jańa jıl sawǵası boldı. Ondaǵı turaqlı jumıs penen támiyinlengen hayal-qızlar búgingi kúninen kewilli túrde ózleriniń minnetdarshılıǵın bildirdi.
Ashılıw máresimi mádeniyat tarawı xızmetkerleriniń shıǵıwlarına jalǵanıp, bayram keshesi bolıp ótti.
Qaraqalpaqstan Respublikası Joqarǵı Keńesiniń Málimleme xızmeti