Joqarǵı Keńes Baslıǵı Amanbay Orınbaev shańaraqlıq balalar úyi tárbiyalanıwshılarına Prezident sawǵaların tapsırdı
1320
Keńpeyillik, balajanlıq, mehir-múriwbetlilik xalqımızǵa tán bolǵan joqarı pazıyletlerden sanaladı. Ásirese, balalarǵa ǵamqorlıq kórsetip, olardı miyrim-shápááttiń joqarı úlgisi menen kamalǵa keltiriwge mámleketlik dárejede itibar qaratılıp atırǵanın ayrıqsha atap ótiwimiz kerek.
Házirgi waqıtta Nókis qalasındaǵı 1-sanlı shańaraqlıq balalar úyinde 5 bala, 2-sanlı shańaraqlıq balalar úyinde 6 bala tárbiyalanıp atırǵan bolıp, búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev usı shańaraqlardı bayram qarsańında barıp kórdi.
Onda Qaraqalpaqstan Respublikası Ministrler Keńesiniń Baslıǵı F.Ermanov qatnastı.
Joqarǵı Keńes Baslıǵı balalardı Jańa jıl bayramı múnásibeti menen qutlıqlap, olarǵa Prezidentimizdiń sawǵaların tapsırdı.
Balalar hámiyshe Prezidentimizdiń itibarı hám ǵamqorlıǵında ekenligi atap ótilip, olardıń hár tárepleme jetik insan bolıp kamalǵa keliwinde bar múmkinshilik iske salınıwı bildirildi.
Jańa jıl bayramı qarsańında balalar tárepinen bayram keypiyatındaǵı ayaq oyın hám muzıkalı atqarıwlar miymanlar názerine usınıldı.
Qaraqalpaqstan Respublikası Joqarǵı Keńesiniń Málimleme xızmeti