Bes baslama olimpiadasınıń ekinshi máwsimi jeńimpazları sıylıqlandı

Búgin 29-dekabr kúni Nókis qalası 1-sanlı sport mektebinde Bes baslama olimpiadasınıń ekinshi máwsimi, Qaraqalpaqstan Respublikası basqıshı jeńimpazların sıylıqlaw máresimi bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, «Bes baslama Paralimpiadası» sheńberinde «Para shaxmat», «Para shashka», sporttıń «Para jeńil atletika», «Para stol tennis», «Para Kibersport» hám basqa da bir qatar sport túrleri boyınsha jeńimpazlardı sıylıqladı. Bunnan soń, sporttıń bir neshe túri boyınsha óz jónelisinde jeńimpaz bolǵan sportshılar sıylıqlandı. Aytıp ótiw orınlı, sport oyınları jeńimpazlarına medallar hám bahalı sawǵalar tapsırıldı. Olimpiada shın mánisinde shetki aymaqlardan eń kúshli sportshı jaslar, eń talantlı, eń bilimli jaslardı júzege shıǵarıwda áhmiyetli baslamaǵa aylandı. «Bes baslama olimpiadası»nıń ekinshi máwsiminde Qaraqalpaqstan Respublikası boyınsha barlıq máhállelerden jámi 300 mıńnan aslam jaslardıń qatnasıwın sózimizdiń dáliyli sıpatında keltiriwimiz múmkin. Sonday-aq, Olimpiadanıń Ózbekstan Respublikası basqıshında Qaraqalpaqstanlı jaslar sport jarıslarında 11 altın, 8 gúmis hám 15 qola medaldı qolǵa kirgizdi.

Qaraqalpaqstan Respublikası Joqarǵı Keńesiniń Málimleme xızmeti