Qaraqalpaqstan Respublikası Joqarǵı Keńesi Baslıǵınıń Xalqımızǵa Jańa jıl qutlıqlawı

Qádirli watanlaslar! Áziz doslar! Sizlerdi insanlar qálbine ózgeshe quwanısh, ilham-yosh, úmit hám isenim baǵıshlap, bársheni jáne de úlken dóretiwshilik islerge ruwxlandırıp atırǵan qutlı áyyyam – Jańa jıl bayramı menen qızǵın qutlıqlayman. Juwmaqlanıp atırǵan 2022-jılǵa názer taslar ekenbiz, «Insan qádirin ulıǵlaw hám belsendi máhálle jılı»nda insan qádir-qımbatın ulıǵlaw mámleketlik siyasat dárejesine kóterilgenin, máhállelerde burın bolmaǵan keń kólemli qurılıs-abadanlastırıw jumısları alıp barılǵanınıń, sociallıq-ekonomikalıq turmısımızdıń barlıq tarawlarında turaqlı rawajlanıwlardıń gúwası bolamız. Ásirese, Húrmetli Prezidentimiz tárepinen Qaraqalpaqstanǵa qaratılǵan joqarı itibar, qabıl etilgen oǵada áhmiyetli párman hám qararlar xalqımızdıń sociallıq jasaw sharayatların jaqsılawǵa, insanlardı turmıstan razı etiwge, ekonomikamızdı jáne de bekkemlewge, kóplegen jeńillikler menen imkaniyatlarǵa bekkem tiykar bolmaqta. Barlıq tarawlarda reformalardıń tereńlesip barıwı, isbilermenlikti rawajlandırıw boyınsha jumıslardıń jáne de jedellesiwi, jaslar hám hayal-qızlardı qollap-quwatlaw isleriniń jańa basqıshlarǵa kóterilgeni, «Mehir háreketi» sheńberinde járdemge mútáj insanlardıń qollap-quwatlanıwı – bulardıń barlıǵı xalqımızǵa degen ayrıqsha ǵamxorlıqtıń kórinisi sanaladı. Izde qalıp baratırǵan jılda xalqımızdıń iygiligi jolında xızmet etetuǵın bir neshe kárxanalardıń, sociallıq-mádeniy obektlerdiń iske túskeni, infrastrukturanıń jańalanıwı elimizge shın mánisindegi jańalanıw nápesin alıp kelip, xalqımızdıń kewil-keypiyatına unamlı tásirin tiygizbekte. Atap aytqanda, Moynaq rayonında jılına 50 mıń kubometr DSP hám LDSP ónimlerin islep shıǵarıwshı «MUYNAK LDSP» kárxanasınıń iske túskeni, Beruniy rayonında jılına 50 mıń tonna un islep shıǵarıw quwatına iye «Beruniy biyday klaster» un zavodınıń jumıs baslaǵanı, Nókis qalasında 2 mıń tonna artemiya cistasın qayta isleytuǵın «Sebu Artemia» kárxanası hám jılına 300 mıń kvadrat metr ayna hám esik ramaların islep shıǵaratuǵın «AKFA ASSEMBLY» kárxanasınıń ashılǵanı, Kegeyli rayonında jılına 2,4 million dana trikotaj ónimlerin islep shıǵaratuǵın «AQTUDA TEX GROUP» tekstil kárxanasınıń paydalanıwǵa tapsırılǵanı, Qońırat rayonında jılına 135 mıń tonna natriy sulfat hám natriy sulfit ónimlerin islep shıǵaratuǵın «KKRASI Chemical» kárxanasınıń  iske túskeni turmısımızda júz bergen quwanıshlı waqıyalar qatarına kiredi. Jáne bir áhmiyetli tárepi sonda, infrastruktura hám sociallıq obektlerde, sonday-aq, kóp qabatlı turaq-jaylarda hámde máhállelerde keń kólemli qurılıs-abadanlastırıw jumısları alıp barılmaqta. Sonıń ishinde Kegeyli, Qanlıkól hám Qaraózek rayonlarındaǵı «Jańa Ózbekstan» massivlerinde bahası 169,7 milliard swmlıq 678 kvartiralı 23 kóp qabatlı turaq-jaylar hámde bahası 26,9 milliard swmlıq 3 mektep, 3 balalar baqshası hámde 1 densawlıqtı saqlaw obektleri jańadan qurılmaqta. Sonday-aq, mámleketlik baǵdarlamalar tiykarında jaslar ushın 50 obekt paydalanıwǵa tapsırılǵan bolsa, qala hám rayonlarımızda 1241 kvartiralı 30 turaq-jaydıń, sonıń ishinde Nókis qalasında 16 etajlı 5 turaq-jaydıń kurılıs jumısları alıp barılmaqta. Bunnan tısqarı, Ózbekstan Respublikası Prezidentiniń 2022-jıl 25-oktyabrdegi «2022-2023-jıllarda máhálleler infrastrukturasın jáne de jaqsılaw boyınsha qosımsha ilajlar haqqında»ǵı qararı tiykarında 2022-2023-jılları 252 máhálleniń infrastrukturasın jaqsılaw jumısları baslap jiberildi. Sonı da ayrıqsha atap ótiwimiz tiyis, Húrmetli Prezidentimizdiń 2022-jıl 31-avgusttaǵı Qaraqalpaqstan ushın qabıl etilgen tariyxıy pármanı xalqımızdıń abadan turmısın támiyinlewge, qala hám rayonlarımızda isbilermenlikti jáne de rawajlandırıwǵa, jaslardı hár tárepleme qollap-quwatlawǵa bekkem tiykar bolmaqta. 2022-2023-oqıw jılında qaraqalpaqstanlı 500 jas joqarı oqıw orınlarına qosımsha kvota tiykarında oqıwǵa qabıl etilgeni, pensiya hám napaqa alıwshılar, mayıplıǵı bolǵan puqaralar ushın temir jol hám aviabiletler satıp alıw ushın 50 procentlik jeńillikler engizilgeni, isbilermenlik subektleri ushın salıq jeńillikleriniń berilgeni sıyaqlı kóplegen ilajlar insan qádirin ulıǵlawdıń ámeliy kórinisi bolıp tabıladı. Álbette, bunday keń kólemli jumıslar kewillerde maqtanısh sezimlerin oyatıw menen birge, insanlardı elimizde ámelge asırılıp atırǵan iygilikli islerge úles qosıwǵa ruwxlandıradı.   Qádirli watanlaslar! Húrmetli Prezidentimiz Ózbekstan Respublikası Oliy Majlisine hám xalqımızǵa jollaǵan múrájatında kelesi jılı elimizdi rawajlandırıwǵa xızmet etetuǵın áhmiyetli baǵdarlar boyınsha anıq wazıypalardı belgilep berdi hámde bul wazıypalar «Insanǵa itibar hám sapalı bilimlendiriw jılı»nda bársheni ullı islerge baslaytuǵınına bekkem isenemiz. Solay eken, jańa jılda da xalqımızdıń turmıs dárejesin jaqsılaw, olardıń bántligin támiyinlew, ásirese kem támiyinlengen, járdemge mútáj shańaraqlarǵa járdem kórsetiw, jaslardı hám hayal-qızlardı qollap-quwatlaw, isbilermenlikti jedel rawajlandırıw sıyaqlı bir qatar máseleler tiykarǵı wazıypalarımızdan bolıp qala beredi. Sizlerdi jáne bir márte Jańa jıl bayramı menen qızǵın qutlıqlap, bársheńizge bekkem densawlıq, mol tabıslar tileymen! Jańa jıl hár bir shańaraqqa amanlıq, bereket hám quwanısh alıp kelgey! Elimiz tınısh, xalqımız hámiyshe aman bolsın! Jańa jılıńız bársheńizge qutlı múbárek bolsın, áziz zamanlaslar!  

A.ORÍNBAEV, Qaraqalpaqstan Respublikası Joqarǵı Keńesiniń Baslıǵı