Qaraqalpaqstan Respublikası Korrupciyaǵa qarsı gúresiw boyınsha aymaqlıq keńesiniń 2022-jıl juwmaǵı boyınsha jıynalısı bolıp ótti

Korrupciyaǵa qarsı gúresiw búgingi kúndegi dúnya jámiyetshiliginiń  aldında turǵan eń aktual máselelerden biri bolıp tabıladı. Korrupciyaǵa qarsı gúresiw Ózbekstanda hám mámleketlik siyasatınıń eń baslı baǵdarına aylandı. Bunı sońǵı jıllarda tarawǵa tiyisli normativlik-huqıqıy hújjetlerdiń qabıl etilgenligi, korrupciyanıń aldın alıwǵa qaratılǵan basqarıw reformaları mısalında kóriwimiz múmkin. Korrupciyaǵa qarsı gúresiw boyınsha alıp barılıp atırǵan ámeliy ilajlar Joqarǵı Keńes sessiyalarında, aymaqlıq keńes májilislerinde turaqlı dodalanıp kelinbekte. Jaqında Qaraqalpaqstan Respublikası Korrupciyaǵa qarsı gúresiw aymaqlıq keńesiniń 2022-jıldıń juwmaǵı boyınsha májilisi ótkerildi. Májilisti Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev ashtı hám basqarıp bardı.

  Ótkerilgen májilis dawamında aymaqlıq keńes aǵzaları tárepinen korrupciyaǵa qarsı gúresiwde ámelge asırılǵan jumısları boyınsha Joqarǵı Keńestiń Nızamlılıq, sud-huqıq hám korrupciyaǵa qarsı gúresiw máseleleri komiteti baslıǵı Z.Reymovanıń bayanatı tıńlandı. Atap ótilgenindey, ótken dáwirde respublikadaǵı túrli dárejedegi 168 lawazımlı shaxslar, 234 puqara korrupciya menen baylanıslı jınayat islep, juwapkershilikke tartılǵan. Májiliste aymaqlıq keńes aǵzaları tárepinen úyreniw jumıslarınıń nátiyjesinde ayırım joqarı oqıw orınları tárepinen xızmetker tárepinen orınlanbaǵan jumısı ushın is-haqısı tólep berilgen jaǵdayları anıqlanǵanı, usı anıqlanǵan kemshilikler boyınsha toplanǵan hújjetlerge huqıqıy baha beriw ushın tiyisli huqıq qorǵaw uyımlarına jiberilgenligi atap ótildi.

 

Qaraqalpaqstan Respublikası Joqarǵı Keńesiniń Málimleme xızmeti