Múrájattaǵı hár bir másele xalqımız ushın xızmet etedi
1029
Múnásibet
Korrupciya – ekonomikalıq rawajlanıw jolında baslı tosıqlardıń biri sanaladı. Korrupciya – bul jámiyetti hár túrli jeke mápti gózlewshi usıllar menen ezetuǵın unamsız illet. Sebebi, korrupciyanıń turmısta ushırasıwı – nızam ústinligin támiyinlew, demokratiyalıq reformalardıń nátiyjeli ámelge asırılıwına hám insan huqıqlarınıń barlıq orınlarda hám jaǵdaylarda qorǵalıwın támiyinlewge qáwip tuwdıradı. Haqıyqatında da, búgingi kúnde mámleketimizde korrupciyaǵa qarsı gúresiw boyınsha bir qatar nátiyjeli jumıslar alıp barılmaqta. Atap aytqanda, Prezidentimiz tárepinen korrupciyaǵa qarsı gúresiw boyınsha párman hám qararlar qabıl etilip, huqıqıy tiykarlar jaratıldı. Búgingi kúnde respublikamızda korrupciyanıń aldın alıw maqsetinde Ózbekstan Respublikasınıń «Korrupciyaǵa qarsı gúresiw haqqında»ǵı nızamı hám Ózbekstan Respublikası Prezidentiniń 2022-jıl 11-may kúngi «Mámleketlik basqarıw tarawında korrupciyalıq qáwip-qáterlerdi saplastırıw mexanizimlerin jetilistiriw hám usı tarawda jámiyetshiliktiń qatnasıwın keńeytiw ilajları xaqkında»ǵı qararınıń orınlanıwın támiyinlew maqsetinde orınlarda úgit-násiyat ilajları alıp barılmaqta. Korrupciyaǵa qarsı gúresiwde mámleketlik uyımlar menen shólkemlerdiń aldına áhmiyetli wazıypalar belgilep berilgen bolıp, atap aytqanda, taraw xızmetkerleri arasında korrupciyalıq háreketlerdi boldırmaw ilajların kóriw maqsetinde úgit-násiyat jumısları alıp barılmaqta. 2022-jıl 20-dekabr kúni Ózbekstan Respublikası Prezidenti Sh.Mirziyoevtiń Oliy Majliske hám Ózbekstan xalqına jollaǵan múrájatında da rawajlanıwımızdıń kemiriwshisi bolǵan korrupciyaǵa qarsı gúresiw mámleketlik siyasat dárejesine alıp shıǵılǵanlıǵın ayrıqsha atap ótti. Ótken eki jıldıń ózinde 5 mıńǵa shamalas lawazımlı shaxs korrupciyaǵa baylanıslı jınayatlar boyınsha juwapkershilikke tartıldı. Sonıń menen birge, bul baǵdarda ayıplanıwshılardı huqıqıy juwapkershilikke tartıw menen sheklenip qalmay, sistemalı preventiv ilajlardı kóriw, sol tiykarda jınayatshılıqtıń tek ǵana aqıbetlerin, bálkim sebeplerin aldınnan sheshiw boyınsha tásirsheń ilajlar kórilmekte. Korrupciyaǵa qarsı gúresiw baǵdarında hár bir ministr hám shólkem basshısınıń ózi jetekshilik etetuǵın tarawǵa ajratılǵan qárejetlerdi nátiyjeli hám maqsetli jumsawı boyınsha jeke juwapkershiligin arttırıw, jasalma monopoliyaǵa, jabıq sxemalarǵa, ulıwma korrupciyaǵa imkan jaratatuǵın barlıq boslıqlarǵa shek qoyıw gezektegi áhmiyetli máseleler sıpatında atap ótti. Bul baǵdarda deputat hám senatorlar, jergilikli keńesler anıq tarawlardı tallap, óziniń okrugindegi byudjet esabınan ámelge asırılatuǵın qurılıslardıń, sociallıq hám ekonomikalıq joybarlardıń orınlanıwı monitoringin kúsheytiw korrupciyanı joq etiwdiń tiykarǵı dáregi bolıwı aytıp ótildi. Sonday-aq, korrupciyaǵa qarsı gúresiw barısında óz aldına nızamlar qabıl etilip, konstituciyalıq-huqıqıy tiykarlar jaratılıwı belgilendi. 2023-jılǵa elimizde «Insanǵa itibar hám sapalı bilimlendiriw jılı» dep atama beriliwi usı jılda Ózbekstanda insanǵa, onıń huqıqların támiyinlewge, xalıqtıń jasaw sharayatların jaqsılawǵa itibar jáne de artıwınan, adamlardı razı etiw reformalar orayında bolıwınan dárek beredi. Bir sóz benen aytqanda, Múrájat xalqımız, Watanımız, hár birimizdiń turmısımızǵa hám keleshegimizge baylanıslılıǵı menen ayrıqsha áhmiyetke iye.Zuxra Reymova, Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń baslıǵı.