Kirip kiyatırǵan anomal suwıq hawa-rayı boyınsha maǵlıwmat

Usı jıldıń 9-yanvar kúni Ózbekstan Respublikası aymaǵına Volgaboyı aymaqlarınan Rossiya Evropa bóleginiń arqa aymaqlarında qáliplesken suwıq hawa massası kirip keliwi baslanadı. Bul haqqında Ózbekstan Respublikası gidrometeorologiya xızmeti orayı xabar berdi. 9-11-yanvarda respublika aymaǵınıń kópshilik bóleginde jawın-shashın (jawın, qar) boladı. Taw aldı hám tawlı aymaqlarda qar jawadı, bazı orınlarında kúshli qar jawıwı boladı. 9-10-yanvarda ayırım orınlarda samal 15-20 m/s ǵa shekem kúsheyiwi múmkin. 10-15-yanvarda respublika boyınsha anomal suwıq hawa-rayı bolıwı kútilmekte. Hawa temperaturası túnde 12-17 gradusqa shekem suwıq bolıwı, kúndizi 5-8 gradusqa shekem, arqada túnde 17-22 gradusqa shekem, Ústirtte hám shól aymaqlarında bazı orınlarında 25-27 gradusqa shekem, kúndizgi waqıt 7-10 gradus, qublada hám Ferǵana alabında túnde 5-10 gradusqa shekem suwıq bolıwı kútiledi, kúndizgi waqıtları 2-5 gradusqa shekem hawa temperaturası páseyedi. Jollardıń bazı orınlarında muzǵalaqlar júzege keledi. Sonlıqtan, Respublikamızdıń barlıq buwındaǵı bilimlendiriw mákemelerinde qısqı dem alıs múddeti 17-yanvarǵa shekem sozdırıldı. Hawa temperaturasınıń keskin túsip ketiwi sebepli baqshalarda da gezekten tıs dem alıs járiyalandı. Yaǵnıy, mektepke shekemgi bilimlendiriw shólkemleri tárbiyalanıwshılarında máwsimlik gripp keselligi, ayazlawdıń keskin kóbeyiwine jol qoymaw maqsetinde 10-18-yanvar kúnleri gezekten tıs dem alıs járiyalandı. Sonday-aq, avia hámde temir jol biletleri tarif bóleginen 50 payız shegirme múddeti de 2023-jıldıń 18-yanvarına shekem uzaytıldı. 9-yanvarǵa shekem satıp alınǵan avia hám temir jol biletleri biypul tárizde tiyisli múddetke shekem almastırılıp beriledi. Dem alıs uzaytılıwı múnásibeti menen avia hám temir jollarda qosımsha orın (reys) lаr ajıratıladı.