Úy sharayatında dáramat tabıw jollarına arnalǵan seminar bolıp ótti

Búgin Nókis qalasında Ózbekstan ekologiyalıq partiyası Qaraqalpaqstan Respublikalıq Keńesi shólkemlestiriwinde kompost hám biogumus tayarlaw usılları boyınsha seminar bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.

  Ótkerilgen seminarda jumıssız puqaralardı jumıs penen támiyinlew, ápiwayı qıytaq jeriniń ózinde dáramat tabıwınıń jáne bir jolı bolǵan Kaliforniya jawın qurtın jetistiriw hám kóbeytiw, bul arqalı biogumus hám kompost tayarlanıwına sharayat jaratıw baǵdarında sóz etildi.

  Biogumus Kaliforniya jawın qurtı járdemi menen islep shıǵarılatuǵın organikalıq tógin esaplanadı. Jerdiń ónimdarlıǵın arttırıw, onnan joqarı dáramat alıwda biogumustan paydalanıwdıń áhmiyeti ayrıqsha. Eń baslısı, úy sharayatında biogumus tayarlaw oǵada ańsat hám onıń nátiyjeliligi de joqarı. Bolıp ótken seminarda mine usı máseleler sóz etilip, qatnasıwshılarǵa kórgizbe materialları járdeminde keń túrde túsinik berildi.

 

Qaraqalpaqstan Respublikası Joqarǵı Keńesiniń Málimleme xızmeti