Nókis qalası ishindegi ayırım jónelisler ornına jańa jónelisler shólkemlestirilmekte

Nókis qalasında qala ishinde háreketleniwshi jónelisli taksiler kópshiliginiń aqırǵı bándirgisi Oraylıq diyqan bazar janındaǵı avtotransportlar toqtap turıw ornı etip belgilengen bolıp, bul aymaqta transportlardıń qatnawında qolaysızlıq hám tıǵılıslar júzege kelip, bir qatar unamsız jaǵdaylarǵa alıp kelmekte. Usınday mashqalalardıń aldın alıw, jolawshılarǵa, avtotransportlarǵa qolaylıq jaratıw maqsetinde, qala ishindegi jónelislerdiń aqırǵı bándirgisin bir birine tutastırıw, birlestiriw jolı menen qayta shólkemlestiriw belgilengen. Sonıń menen birge, xalıqqa sapalı transport xızmetin kórsetiw maqsetinde bıyılǵı jılı jańadan 100 den aslam avtobuslar alıp keliw rejelestirilmekte. Ѳzbekstan Respublikası Ministrler Kabinetiniń 2021-jıl 6-dekabr kúngi 738-sanlı qararına tiykarlanıp, bir aymaqqa háreketlenetuǵın, bir-birin tákirarlawshı jɵnelisler bolǵanlıǵın esapqa alǵan halda, Nɵkis qalasındaǵı 51-sanlı “Oraylıq diyqan bazar-Nawqanbaǵ elatı”, 25-sanlı “Oraylıq diyqan bazar-Nawqanbaǵ MPJ”, 114-sanlı “Oraylıq diyqan bazar-Tub.sanatoriya” aralıǵındaǵı jɵnelisleri hám 13-sanlı “Oraylıq bazar-Allaniyaz Kaharman MPJ”, 16-sanlı “Temir Jol vokzal-Allaniyaz Kaharman MPJ” aralıǵındaǵı jɵnelisler birlestirip,  25-sanlı “Oraylıq bazar-Nawqanbaǵ MPJ arqalı Nawbaxar MPJ” atamasındaǵı hám 13-sanlı “Temir Jol vokzal-Allaniyaz Qaharman MPJ” atamasındaǵı jɵnelisleri qaytadan shɵlkemlestirilmekte. Bul jɵnelislerdiń xızmet kɵrsetiwshi aymaqların tolıq jámiyetlik transport penen qamtıp alınadı hám sol jónelisler boyınsha transportlar háreket etedi.  

Qaraqalpaqstan Respublikası Joqarǵı Keńesiniń Málimleme xızmeti