Húrmetli puqaralar!
2060
Házirgi waqıtta respublikamız aymaǵında hawa rayınıń hádden tıs suwıp ketiwine baylanıslı gaz tarmaqlarına basım kúsheyiwi sebepli avariyalıq jaǵdaylar júzege kelmekte.
Sonıń menen birge, mámleketimiz boyınsha tutınıwshılar tárepinen tábiyǵıy gazge bolǵan tutınıw kóleminiń artıwı nátiyjesinde jetispewshilik baqlanbaqta.
Usı sınawlı kúnlerde xalqımızdı turaqlı gaz benen támiyinlew baslı wazıypa bolıp qalmaqta.
Usı múnásibet penen Qaraqalpaqstan Respublikası Joqarǵı Keńesi tárepinen tómendegiler ámelge asırıladı:
Jaǵday normal halatqa qaytqanǵa shekem ayrıqsha jaǵdaylarǵa juwap beriw boyınsha operativ ShTAB shólkemlestirildi.
Barlıq avtomobillerge gaz toltırıw kompressor stanciyaları (metan zapravkaları) hám ulıwmalıq awqatlanıw orınlarına gaz jetkerip beriliwi toqtatıladı.
Barlıq joqarı oqıw orınları, orta arnawlı bilim beriw mekemeleri, ulıwma bilim beriw mektepleri hám mektepke shekemgi bilimlendiriw shólkemlerinde dem alıs kúnleri 16-yanvarǵa shekem uzaytıladı.
Qaraqalpaqstan Respublikası Joqarǵı Keńesi tárepinen xalqımızdıń kúndelikli jámiyetlik transportlarǵa talabın qanaatlandırıw hám turaqlı transport xızmetin shólkemlestiriw maqsetinde jámiyetlik transportlarǵa benzin ushın kompensaciya pulları tólep beriledi.
Húrmetli puqaralar, artıqsha hawlıqpaǵa berilmewińizdi soraymız!
Húkimetimiz tárepinen barlıq ayrıqsha jaǵdaylar xızmetleri kúsheytirilgen rejimde jumıs alıp barıwı jolǵa qoyılǵan hám jaǵdaydan tezirek shıǵıp ketiw ushın bárshe zárúrli ilajlar kórilgen.
Jaǵday ózgergende ayrıqsha kórsetpeler berilip, qosımsha túrde xabarlandırıladı.
Qaraqalpaqstan Respublikası Joqarǵı Keńesiniń Málimleme xızmeti