Jámiyetlik transportlardıń turaqlılıǵın támiynlew maqsetinde AI-80 markalı benzin isletkenligi ushın kompensaciya beriledi

Avtomobillerge qısılǵan gaz kuyıw kompressor shaqapshalarına (Metan) gaz jetkerip beriw waqtınsha toqtatılǵanlıǵı sebepli hámde respublikamız aymaǵın transport xızmeti menen turaqlı támiyinlew maqsetinde Qaraqalpaqstan Respublikası Joqarǵı Keńesi Prezidiumı tárepinen sheshim qabıl etildi. Oǵan bola, jámiyetlik transportta xızmet kórsetiwshi kárxanalarǵa gaz ornına AI-80 markalı benzin isletkenligi ushın kompensaciya beriledi. Bunda licenziyaǵa iye bolǵan Damas markalı avtomobiller ushın kúnine 40 000 sum muǵdarında hámde kóp sıyımlı mikroavtobuslar (Gazel, ЈAS, Shineray hám basqalar) ushın 128 000 sumǵa shekem kompensaciya muǵdarı belgilendi. Kompensaciya tólew tártibi tómendegishe: tender liniya iyeleri tárepinen benzin chekleri hámde sol chekte licenziyalanǵan avtomobildiń mámleketlik belgisi kórsetilgen maǵlıwmatnama Qaraqalpaqstan Respublikası Transport ministrligine tapsırılıwı shárt. Húrmetli jámiyetlik transport xızmeti basqarıwshıları! Bunday kútilmegen jaǵdayda xalqımızdıń awırın jeńil etiw maqsetinde qabıl etilgen sheshim tiykarında avtomobillerge janılǵı quyıw shaqapshalarında benzin bahasın, belgilengen jónelislerde ornatılǵan bahalardı tiykarsız qımbatlatıp jibermew hám jónelis sxeması tiykarında háreketleniwdi soraymız.

Qaraqalpaqstan Respublikası Joqarǵı Keńesiniń Málimleme xızmeti