Nókis qalasınıń ishki xojalıq jollarında qurılıs jumısları baslandı
1340
Ózbekstan Respublikası Prezidentiniń 2022-jıl 25-oktyabrdegi PQ-408-sanlı qararına muwapıq, 2023-jıl ushın rejege tiykar qala hám rayonlardıń isleniwi kerek bolǵan ishki xojalıq jolları belgilep alınǵan.
Nókis qalasındaǵı eń shetki aymaqlardan biri esaplanǵan «Bes tóbe» MPJ aymaǵında ishki jollardıń qurılıs-ońlaw jumısları baslap jiberildi. Aymaqta jámi 6,395 km ishki jollar ońlanıwı belgilengen bolıp, sonnan 2 kóshege asfalt, 14 kóshege qum-щeben aralaspasın (ЩPS) tósew rejelestirilgen. Házirgi waqıtta dáslepki basqısh ámelge asırılıp, oylı-bálent bolǵan kóshelerdi bir tegis halatqa keltiriw ilajları kórilmekte.
Usı iygilikli baslamalardıń dawamı retinde paytaxtımızdaǵı «Jańa bazar» MPJ aymaǵında da jumıslar dawam etpekte. Atap aytqanda, Ǵaybulla biy kóshesine cementobeton qaplamasın tósew ushın oy-shuqırları tegislenip, tayarlanıp atır.
Qaraqalpaqstan Respublikası Joqarǵı Keńesiniń Málimleme xızmeti