Óz kásibiniń haqıyqıy pidayıları xalıq iygiligi jolında ayanbay miynet etpekte
1018
Házirgi waqıtta respublikamız aymaǵında suwıq hawa baqlanıp atırǵan bolıp, keshke qaray hawa temperaturası elede suwıtadı. Usınday qıstıń suwıq kúnlerinde xalıq iygiligi jolında kúni-túni, suwıqtı suwıq demey miynet etip atırǵan pidayı insanlar bar.
Búgin tábiyattıń ınjıqlıqları sebep suw támiynatında júzege kelgen avariyalıq jaǵdaydı saplastırıw, ishimlik suwınıń biykarǵa ısırap bolıwınıń aldın alıw ushın taraw pidayıları muzday suwǵa túsip, mashqalanı saplastırıw ilajların kórip atır. Óz jumısınıń bunday pidayı xızmetkerlerine tek ǵana alǵıs hám raxmet aytamız.
Bunday insanlar aramızda talay tabıladı. Máselen, jol háreketi qáwipsizligi basqarması xızmetkerleri jollarda háreket qáwipsizligin támiynlewden tısqarı keshki waqıtlarda jolawshılardıń transport quralları arqalı úylerine aman-esen jetip alıwları ushın Oraylıq diyqan bazar aldında jónelisli taksiler menen avtobuslardı shólkemlestirip, belgilengen jónelislerdegi háreketlerin jolǵa qoyıp atır. Bul arqalı puqaralarımız keshki suwıqta bazar aldında transport kútip turmay jol háreketi qáwipsizligi xızmetkerleriniń járdemi menen úylerine qaytpaqta.
Usınday hawa rayında jıllı úyinen bezip, xalıq iygiligi jolında óz jumısın minsiz atqarıp atırǵan taraw pidayıların kún qaharmanları dep aytsaq arzıydı.
Qaraqalpaqstan Respublikası Joqarǵı Keńesiniń Málimleme xızmeti