Ózbekstan Prezidenti rawajlanıp atırǵan mámleketlerdi qollap-quwatlawǵa qaratılǵan baslamalardı alǵa qoydı

Ózbekstan Respublikası Prezidenti Shavkat Mirziyoev 12-yanvar kúni Hindstan Respublikası Bas ministri Narendra Modidiń basshılıǵında onlayn túrde ótkerilgen «Global Qubla hawazı» sammitiniń jalpı májilisinde shıǵıp sóyledi. Hindstannıń «Úlken jigirmalıq»qa (G20) basshılıǵı sheńberinde shólkemlestirilgen ilajǵa Vetnam Respublikası Prezidenti Nguen Suan Fuk, Gayana Respublikası Prezidenti Muhammed Irfon Ali, Mozambik Respublikası Prezidenti Filipe Nyusi, Senegal Respublikası Prezidenti Maki Sall, Bangladesh Xalıq Respublikası Bas ministri Shayx Xasina, Mongoliya Bas ministri Luvsannamsrayn Oyuun-Erdene, Tailand Patshalıǵınıń Bas ministri Prayut CHan Ocha, Kambodja Patshalıǵınıń Bas ministri Xun Sen va Papua-Jańa Gvineya Ǵárezsiz Mámleketiniń Bas ministri Jeyms Marape qatnastı. Kún tártibine muwapıq, insan máplerine baǵdarlanǵan turaqlı rawajlanıw máseleleri dodalandı, rawajlanıp atırǵan mámleketlerdiń máplerin alǵa qoyıw hám áhmiyetli mashqalalardı sheshiw maqsetinde, sonıń ishinde, ekonomika, ekologiya, energetika hám azıq-awqat qáwipsizligi, densawlıqtı saqlaw, insan resursların rawajlandırıw, innovaciyalar, turizm hám basqa da baǵdarlardaǵı óz-ara paydalı birge islesiwli tereńlestiriw boyınsha pikir alısılıp, anıq usınıslar berildi. Ózbekstan Respublikası Prezidenti Shavkat Mirziyoev házirgi xalıqaralıq jaǵdayda baqlanıp atırǵan áhmiyetli tendenciyalarǵa baha berip, rawajlanıp atırǵan mámleketler aldında turǵan tiykarǵı baslı wazıypalar boyınsha pikir bildirdi. – Házirgi kúnde dúnya jámiyetshiligi hár qıylı qarama-qarsılıq hám kelispewshiliklerdiń keskinlesiwi, ekonomikalıq krizistiń unamsız aqıbetlerine ushıraspaqta. Biz xalıqaralıq qatnasıqlarda ashıq sóylesiw hám óz-ara isenimniń kún sayın azayıp baratırǵanınıń gúwası bolmaqtamız,-dedi mámleketimiz basshısı. Ózbekstan jetekshisiniń atap ótkenindey, koronavirus pandemiyası, azıq-awqat hám energetika qáwipsizligi máseleleri hám ekologiyalıq mashqalalar global rawajlanıwdıń perspektivalarına unamsız tásir etpekte. Hindstannıń rawajlanıp atırǵan mámleketler menen óz-ara paydalı hám nátiyjeli baylanısların bekkemlewdegi belsene ornı hám roli ayrıqsha atap ótildi. Usı mánide, keyingi jılları Ózbekstan hám Hindstan  arasındaǵı strategiyalıq sheriklik hám ámeliy birge islesiw máplerine xızmet etip atırǵanı atap ótildi. Prezidentimiz Ózbekstanda ámelge asırılıp atırǵan artqa qaytpas reformalardıń orayında insan máplerin támiyinlew eń baslı maqset hám wazıypa etip belgilengenin ayrıqsha atap ótti. – Rawajlanıw strategiyamızdıń tiykarǵı mazmunı – nızam ústinligi hám insan kapitalın rawajlandırıw, ádil hám kúshli puqaralıq jámiyetin qurıwdan ibarat. Biz óz aldımızǵa jaqın keleshekte inklyuziv hám turaqlı ekonomikalıq ósiwdi támiyinlew, mámlekette kámbaǵallıqtı eki esege qısqartıw sıyaqlı úlken rejeni qoyǵanbız,-dedi mámleketimiz basshısı. Ózbekstan Prezidenti Hindstannıń G20ǵa basshılıǵın qollap-quwatlap, kún tártibindegi máseleler boyınsha bir qatar ámeliy usınıslardı alǵa qoydı. Bárinen burın, házirgi kúndegi xalıqaralıq sawda sistemasın «Global Qubla hawazı»n itibarǵa alǵan halda jetilistiriw usınıs etildi. Tiykarǵı bazarlarǵa shıǵıwda ele hár qıylı tosqınlıq hám sheklewlerge ushırasıp atırǵan, rawajlanıp atırǵan mámleketlerdiń imkaniyatın júzege shıǵarıw ushın zárúr sharayatlar jaratılıwı zárúr. Rawajlanıp atırǵan mámleketlerdiń energetika hám azıq-awqat qáwipsizligin támiyinlew, global logistika hám qosımsha qun shınjırların jaratıw, investiciya hám eń zamanagóy texnologiyalardı tartıwda járdemlesiw máseleleri jáhán sammitiniń kún tártibinen orın alıwı maqsetke muwapıq ekenligi atap ótildi. Jáne bir strategiyalıq másele – «Arqa-Qubla» xalıqaralıq koridorı sheńberinde Oraylıq hám Qubla Aziyanıń óz-ara baylanıslılıǵın kúsheytiwge qaratılǵan, Awǵanstan arqalı Hind okeanına shıǵatuǵın temir joldı qurıw joybarın jedel alǵa qoyıw. Ózbekstan jetekshisi birge islesiwshilerdi bul áhmiyetli joybarda qatnasıwǵa shaqırdı. Tallawlar sonı kórsetpekte, «jasıl» ekonomikaǵa ótiw sharayatında rawajlanıp atırǵan mámleketler arasındaǵı úlken texnologiyalıq ózgeshelik artıp barmaqta. Usı múnásibet penen dúnyanıń jetekshi mámleketleriniń járdeminde «Global Qubla» ushın «jasıl» texnologiya hám innovaciyalar málimleme bankin jaratıw usınıs etildi. Gezektegi áhmiyetli másele insan kapitalın rawajlandırıw hám professional bilimlendiriwdiń sapasın arttırıw ekeni kórsetip ótildi. – Qábiletli jaslarımızdı klimat ózgeriwi, suw resurslarınan aqılǵa uǵras paydalanıw, qolaylı energetika, sanlastırıw hám basqa da baslı tarawlardaǵı milliy hám xalıqaralıq baǵdarlamalardı islep shıǵıwǵa keńnen tartıwımız kerek,-dedi Prezident Shavkat Mirziyoev. Sonnan kelip shıǵıp, «Qubla jasları hawazı» turaqlı pikirlesiw platformasın shólkemlestiriw baslamasın alǵa qoydı. Global kólemde tınıshlıq hám qáwipsizlikti támiyinlew maqsetinde mámleketimiz basshısı Ózbekstan alǵa qoyıp atırǵan Awǵanstan mashqalasın sheshiw boyınsha xalıqaralıq sóylesiw toparın qáliplestiriw usınısın qollap-quwatlawǵa shaqırdı. Onlayn-sammitte bildirilgen usınıslar menen baslamalar rawajlanıp atırǵan mámleketlerdiń máplerin alǵa qoyıwǵa, insan mápine qaratılǵan Turaqlı rawajlanıw maqsetlerine erisiwge xızmet etetuǵınına isenim bildirildi. Sóziniń sońında Ózbekstan Respublikası Prezidenti dos Hindstan xalqın jaqınlasıp kiyatırǵan milliy bayram – Respublika kúni menen qızǵın qutlıqladı.