Ózbekstan Respublikası Prezidenti Shavkat Mirziyoevtiń «Global Qubla hawazı» onlayn-sammitindegi shıǵıp sóylegen sózi

Húrmetli ullı mártebeli Mırza Narendra Modi! Húrmetli mámleket hám húkimet basshıları! «Global Qubla hawazı» sammitiniń barlıq qatnasıwshıların qızǵın qutlıqlıqlaǵanımnan oǵada quwanıshlıman. Hindstan Bas ministri, húrmetli mırza Modiǵa «Insan máplerine baǵdarlanǵan rawajlanıw» temasındaǵı búgingi sóylesiwimizdi ótkeriw baslaması ushın bildirilgen barlıq minnetdarshılıq sózlerine qosılaman. Bul forum Hindstannıń «Dúnya – bir shańaraq» ulıwma insanıylıq ideyasına sadıq qalıp atırǵanınan ayqın dárek beredi. Bul ilajımız xalıqaralıq kólemde abırayı, ekonomikalıq, texnologiyalıq hám intellektuallıq potencialı kún sayın joqarılap baratırǵan Hindstannıń «^lken jigirmalıq»taǵı basshılıǵınıń tabıslı ótiwine salmaqlı úles qosadı. Húrmetli ánjuman qatnasıwshıları! Házirgi kúnde dúnya jámiyetshiligi hár qıylı qarama-qarsılıq hám kelispewshiliklerdiń keskinlesiwi, sonday-aq, ekonomikalıq krizistiń unamsız aqıbetlerine dus kelmekte. Biz xalıqaralıq qatnasıqlarda ashıq sóylesiw hám óz-ara isenimniń kún sayın azayıp baratırǵanınıń gúwası bolmaqtamız. Koronavirus pandemiyası, azıq-awqat hám energetika qáwipsizligi máseleleri hám ekologiyalıq mashqalalar global rawajlanıwdıń perspektivalarına unamsız tásir etpekte. Bunday quramalı sharayatta, ásirese, mámleketlerimiz aldında Turaqlı rawajlanıw maqsetlerine erisiw jolında kóplegen jańadan-jańa tosqınlıqlar payda bolmaqta. Házirgi waqıtta Birlesken Milletler Shólkeminiń «Hesh kim artta qalmawı zárúr» degen tiykarǵı principi jáne de áhmiyetli bolmaqta. Usı jerde Hindstannıń rawajlanıp atırǵan mámleketler menen óz-ara paydalı hám nátiyjeli baylanıslardı bekkemlewdegi belsene ornı hám rolin ayrıqsha atap ótpekshimen. Sońǵı jılları Ózbekstan hám Hindstan  arasındaǵı strategiyalıq sheriklik hám ámeliy birge islesiw qatnasıqları pútkilley jańa basqıshqa kóterildi hám xalıqlarımızdıń ulıwma máplerine xızmet etpekte. Húrmetli mámleket hám húkimet basshıları! Búgin Jańa Ózbekstanda keń kólemli reformalar izbe-iz dawam ettirilmekte. Siyasatımızdıń orayında insan qádiri hám onıń máplerin támiyinlew eń ullı maqset hám wazıypa etip belgilengen. Rawajlanıw strategiyamızdıń tiykarǵı mazmunı – nızam ústinligi hám insan kapitalın rawajlandırıw, ádil hám kúshli puqaralıq jámiyetin qurıwdan ibarat. Biz óz aldımızǵa jaqın keleshekte inklyuziv hám turaqlı ekonomikalıq ósiwdi támiyinlew, mámlekette kámbaǵallıqtı eki esege qısqartıw sıyaqlı úlken rejeni qoyǵanbız. Bul sheklerge erisiw ushın 2023-jıl Ózbekstanda «Insanǵa itibar hám sapalı bilimlendiriw jılı» dep járiyalandı. Mámleketimizde zamanagóy bilimlendiriw hám kásip ónerlerdi iyelew imkaniyatın keńeytiw ushın barlıq sharayatlar jaratılmaqta. Járdemge mútáj xalıq qatlamın nátiyjeli sociallıq qorǵaw, olardı maman hám sapalı medicinalıq xızmetler menen támiyinlewge ayrıqsha itibar qaratılmaqta. Biz artqa qaytpaytuǵın túrge engen reformalarımızdı izbe-iz dawam ettiriw jolında xalıqaralıq sherikler menen tıǵız birge islesiw ushın bárqulla ashıqpız. Húrmetli sammit qatnasıwshıları! Ózbekstan Hindstannıń «Úlken jigirmalıq»taǵı basshılıǵın hám onıń sheńberinde alǵa qoyıp atırǵan baslı maqset hám iygilikli umtılısların hár tárepleme qollap-quwatlaydı. Ushırasıwımızdıń kún tártibine kirgizilgen máseleler boyınsha tómendegi ámeliy usınıslardı bildirmekshimen. Házirgi kúndegi xalıqaralıq sawda sistemasın jetilistiriw zárúr. Onı dáwirdiń ózi talap etpekte. Bul processte «Global Qubla hawazı» itibarǵa alınıwı kerek – rawajlanıp atırǵan mámleketlerdiń imkaniyatların júzege shıǵarıw ushın zárúr sharayatlar jaratılıwı zárúr. Tilekke qarsı, tiykarǵı bazarlarǵa shıǵıwda mámleketlerimiz ele hár qıylı tosqınlıq hám sheklewlerge ushıraspaqta. Mámleketlerimiz sanaat hám agrar tarawda úlken potencialǵa, iri ishki bazarlarǵa iye ekenin esapqa alıp, global dárejede ádil báseki ortalıǵın jaratıw máselesinde ulıwmalıq qatnaslardı islep shıǵıw zárúr.   Bunnan tısqarı, rawajlanıp atırǵan mámleketlerdiń energetika hám azıq-awqat qáwipsizligin támiyinlew, global logistika hám qosımsha qun shınjırların jaratıw, investiciya hám eń zamanagóy texnologiyalardı tartıwda járdemlesiw máseleleri jáhán sammitiniń kún tártibinen orın alıwı kerek, dep esaplaymız. Jáne bir strategiyalıq másele.  Evroaziya regionındaǵı tiykarǵı transport arteriyalarınan biri bolǵan «Arqa-Qubla» xalıqaralıq koridorın qollap-quwatlaymız. Biz Oraylıq hám Qubla Aziyanıń óz-ara baylanıslılıǵın kúsheytiwge qaratılǵan, Awǵanstan arqalı Hind okeanına shıǵatuǵın temir joldı qurıw joybarın jedel alǵa qoymaqtamız. Birge islesiwshilerimizdi usı oǵada áhmiyetli joybarda qatnasıwǵa mirát etemiz. Tallawlar sonı kórsetpekte, «jasıl ekonomika»ǵa ótiw sharayatında rawajlanıp atırǵan mámleketler arasındaǵı úlken texnologiyalıq ózgeshelik artıp barmaqta. Biz dúnyanıń jetekshi mámleketleriniń járdeminde «Global Qubla» ushın jasıl texnologiya hám innovaciyalar málimleme bankin jaratıw waqtı keldi, dep oylaymız. Gezektegi áhmiyetli másele insan kapitalın rawajlandırıw hám professional bilimlendiriwdiń sapasın arttırıw. Biz Hindstan menen bilimlendiriw tarawında birge islesiwdi jedel alıp barıwdan mápdarmız. Húrmetli kásiplesler! Insan máplerine baǵdarlanǵan rawajlanıw negizinde mine, usı jas áwladtı bárkamal etip tárbiyalaw máselesi tiykarǵı orındı iyelewi kerek. Qábiletli jaslarımızdı klimat ózgeriwi, suw resurslarınan aqılǵa uǵras paydalanıw, qolaylı energetika, sanlastırıw hám basqa da baslı tarawlardaǵı milliy hám xalıqaralıq baǵdarlamalardı islep shıǵıwǵa keńnen tartıwımız kerek. Sonnan kelip shıǵıp, mámleketlerimiz arasında «Qubla jaslardı hawazı» turaqlı pikirlesiw platformasın shólkemlestiriw usınısın alǵa qoymaqshıman. Húrmetli kásiplesler! Házirgi kúnde háwij alıp atırǵan hár qıylı soqlıǵısıwlardıń unamsız aqıbetleri birinshi gezekte rawajlanıp atırǵan mámleketlerde sezilmekte. Qádirli dostım Narendra Modi aytqanınday, «Budda hám Gandidiń Watanı» bolǵan Hindstannıń «^lken jigirmalıq»taǵı basshılıǵı sheńberinde global kólemdegi tınıshlıq hám qáwipsizlikti támiyinlew ushın jańadan-jańa usınıslar hám ideyalar dúnya jámiyetshiligine beriletuǵınına isenemen. Ózbekstanda da bul baǵdarda alǵa qoyıp atırǵan Awǵanstan mashqalasın sheshiw boyınsha xalıqaralıq qarım-qatnas toparın qáliplestiriw usınısın qollap-quwatlaysızlar, dep úmit etemen. Húrmetli doslar! Biz Hindstannıń rawajlanıp atırǵan mámleketlerdiń máplerin xalıqaralıq kólemde nátiyjeli qorǵaw jolındaǵı belsene háreketlerine bárqulla kómekshimiz. Sózsiz, búgingi usınıslar menen baslamalar insan mápi hám turaqlı rawajlanıw maqsetlerine xızmet etedi. Pursattan paydalanıp, dos Hindstan xalqın jaqınlasıp kiyatırǵan milliy bayram – Respublika kúni menen shın kewlimnen qızǵın qutlıqlayman. Dıqqatlarıńız ushın raxmet.