Watan qorǵawshıları ushın xızmet etetuǵın obektler paydalanıwǵa tapsırıldı

Húrmetli Prezidentimiz Ózbekstan Respublikası Qurallı kúshleri dúzilgeniniń 31 jıllıǵı múnásibeti menen Watan qorǵawshılarına jollaǵan qutlıqlawında 3 mıńnan zıyat áskeriy taraw xızmetkerler úy jay menen támiyinlengeni, 4 mıńnan aslam taraw xızmetkerleriniń ómirlik joldasları kásipke oqıtılıp, jumısqa jaylastırılǵanı, 1250 napaqadaǵı áskeriy taraw wákilleriniń bántligi támiyinlengenin atap ótip, taraw pidayıları hám olardıń jaqınların sociallıq qollap-quwatlaw baǵdarındaǵı jumıslarǵa keń túrde toqtap ótken edi. Usı sıyaqlı iygilikli jumıslar Qaraqalpaqstan Respublikasında da ámelge asırılıp atırǵan bolıp, bayram qarsańında bul baǵdardaǵı jumıslardıń ámeliy nátiyjesi sıpatında bir qansha obektler paydalanıwǵa tapsırılmaqta. Búgin Arqa-Batıs áskeriy okrugınıń Nókis gornizonında kapital ońlaw jumısları juwmaqlanǵan sociallıq obektlerdiń paydalanıwǵa tapsırılıwı múnásibeti menen ashılıw máresimi bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, ómirin mashaqatlı sonıń menen birge, maqtanıshlı wazıypaǵa baǵıshlaǵan el qorǵawshıların 14-yanvar Watan qorǵawshıları kúni menen qutlıqladı. Kapital ońlaw jumısları ámelge asırılǵannan soń 2 qabatlı áskeriy bólim shtab imaratı, áskeriy bólim medicina punkti, Nókis úy-jaydan paydalanıw aymaqlıq bólimine qaraslı jataqxana jańasha kóriniste paydalanıwǵa tapsırıldı. Imaratlar zamanagóy tús alıp, barlıq kerekli ásbap-úskeneler, mebel-texnikalar menen támiyinlendi. Sonday-aq, jataqxana imaratında ulıwmalıq awqatlanıw ornı da shólkemlestirildi. Joqarǵı Keńes Baslıǵı ámelge asırılǵan jumıslardı kózden ótkerip, áskeriy taraw xızmetkerleri ushın jaratılǵan sharayatlar menen jaqınnan tanıstı.  

Qaraqalpaqstan Respublikası Joqarǵı Keńesiniń Málimleme xızmeti