Taqıyatas rayonı orayındaǵı mektepke qosımsha imarat qurıp berildi

Taqıyatas rayonındaǵı 3-sanlı ulıwma orta bilim beriw mektebi rayondaǵı eń kóp oqıwshı bilim alatuǵın bilimlendiriw ornı bolıp, búgingi kúni mektepte 1800 den aslam oqıwshı oqıp bilim almaqta. Biraq, rayon orayında xalıq sanınıń ósip barıwı nátiyjesinde mektepte oqıwshılar sanı da kóbeyip, qosımsha oqıw imaratı zárúrligi payda bolǵan edi. Ózbekstan Respublikası Prezidentiniń 2022-jıl 22-yanvardaǵı «2022-2024-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı 98-sanlı qararı tiykarında 3-sanlı ulıwma orta bilim beriw mektebinde kapital rekonstrukciya jumısları esabınan 4 mlrd. 973,7 mln. sumlıq 540 orınlıq qosımsha mektep imaratı qurıp pitkerildi. Imarattıń ashılıw máresimine taraw basshıları, mektep jámááti hám keń jámiyetshilik wákilleri qatnastı. Onda Qaraqalpaqstan Respublikası Joqarǵı Keńesiniń komitet baslıǵı Sh.Ótemisov shıǵıp sóylep, ilaj qatnasıwshıların jańa imarattıń qurıp pitkeriliwi menen qutlıqladı. Bunnan soń miymanlar mektep imaratınıń ishki imkaniyatları menen jaqınnan tanıstı. Mektep imaratına qosımsha retinde jazǵı sport maydanshası, yaǵnıy, jasalma qaplamalı kishi futbol maydanshası qurıp berildi.

Qaraqalpaqstan Respublikası Joqarǵı Keńesiniń Málimleme xızmeti