Bildiriw!
1777
2023-jıl 29-yanvar kúni Nókis qalasındaǵı «Temir jol» MPJ aymaǵındaǵı kóp qabatlı úyde gaz shaqnawı sebepli jarılıw júz berdi. Waqıya ornına Qaraqalpaqstan Respublikası Joqarǵı Keńesiniń Baslıǵı, Ministrler Keńesiniń Baslıǵı, Respublika prokurorı, Ayrıqsha jaǵdaylar basqarması, Ishki isler uyımları hám Milliy gvardiya, mekeme-shólkemler menen Densawlıqtı saqlaw xızmetkerleri jetip barıp, sol waqıttıń ózinde qutqarıw-izlew jumısların alıp barıw maqsetinde operativ ShTAB dúzilip, barlıq zárúrli texnika hám isshi kúshler mobilizaciya etildi.
Jarılıw júz bergen turaq jayda jasawshı puqaralar qáwipsiz orınǵa kóshirilip, olarǵa kerekli dári-darmaq ónimleri, úsh mezgil ıssı awqat hám basqa da zárúrli zatlar Joqarǵı Keńes Baslıǵınıń tapsırması menen támiyinlendi.
Júz bergen awır jaǵday aqıbetinde 3 puqara beton konstrukciyalar arasınan operativ túrde alıp shıǵılıp, emlewxanaǵa jetkerildi hám shıpakerlerdiń ruqsatı menen úylerine juwap berildi. Sonıń menen birge 5 jasar qız awır betonlar astınan qutqarıp alındı. Házirgi waqıtta ol shıpakerler qadaǵalawında. Baxıtsız hádiyse sebebli qulap túsken beton konstrukciyalar astında 5 puqara mezgilsiz dúnyadan kóz jumdı.
Qaraqalpaqstan Respublikası Joqarǵı Keńesi qaytıs bolǵan insanlardıń ata-ana, tuwǵan-tuwısqanları hám jaqınlarına tereń qayǵırıw menen kewil bildiredi. Jábirlengenlerdiń tez arada salamatlıǵın tiklep, ayaqqa turıwın tilep qaladı.
Waqıya aqıbetinde júzege kelgen jaǵdaydı saplastırıw jumısları Qaraqalpaqstan Respublikası Joqarǵı Keńesi Baslıǵınıń jeke qadaǵalawında alıp barılmaqta.
Qaraqalpaqstan Respublikası Joqarǵı Keńesi