Joqarǵı Keńes Baslıǵı Tórtkúl rayonında ekonomika hám investiciya tarawlarında ámelge asırılıp atırǵan jumıslardı sın kóz qarasta kórip shıqtı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonında xalıqtıń bántligin támiyinlew hám kámbaǵallıqtı qısqartıw, rayondı sociallıq-ekonomikalıq jaqtan rawajlandırıw baǵdarında ámelge asırılıp atırǵan jumıslar haqqındaǵı áhmiyetli máseleler boyınsha májilis ótkerdi.

  Ótkerilgen májiliste rayonnıń sociallıq-ekonomikalıq turmısında ámelge asırılǵan jumıslar, berilgen tapsırmalardıń orınlanıwı hám basqada áhmiyetli máseleler sın kóz qarasta qarap shıǵıldı. Aytıp ótiw orınlı, Tórtkúl rayonında búgingi kúnde 2022-jılı ótkerilgen májiliste belgilep berilgen 15 tapsırmanıń 12 tapsırması orınlanǵan. Sonıń ishinde, xalıqtı isbilermenlikke tartıw, olardıń bántligin támiyinlew arqalı turaqlı dáramat deregin jolǵa qoyıw hám kámbaǵallıqtan shıǵarıw máselelerinde bir qatar kemshiliklerge jol qoyılǵanlıǵı májiliste sınǵa alındı.

  Onda bir qatar hákim járdemshileri puqaralardıń bántligin támiyinlew maqsetinde ajıratılǵan kredit qarjılarınıń óz iyelerine jetip barıwın jeterli dárejede jolǵa qoymaǵanlıǵı aytıldı. Sonday-aq, Tórtkúl rayonı hákiminiń ekonomika hám isbilermenlik máseleleri boyınsha birinshi orınbasarı hám rayon hákiminiń orınbasarı – investiciyalar hám sırtqı sawda bólimi baslıǵı qatań eskertilip, óz jumısların qayta jolǵa qoyıp alıwı ushın múddet belgilendi.

  Bugingi qunge kelip, rayondaǵı bir qatar basshı hám lawazımlı shaxslarǵa jańa joybarlardı iske túsiriw baǵdarında tapsırma etip belgilengen wazıypalar boyınsha iske túspegen joybarlardı esabatlarǵa kirgiziw jaǵdayları ushıraspaqta. Májiliste Tórtkúl rayonında kishi biznes subektlerin iske túsiriw, shańaraqlıq isbilermenlikti qollap-quwatlaw, rayonda jańa investiciya joybarların iske túsiriw hám basqa da baslı wazıypalar belgilep alınıp, juwapkerlerge anıq tapsırmalar berildi.

  Májilis dawamında Tórtkúl rayonında jańa jumıs orınlarınıń jaratılıwı, puqaralardıń dáramatınıń asırılıwı sıyaqlı rayonnıń sociallıq-ekonomikalıq jaǵdayın jaqsılawǵa xızmet etiwshi basqa da bir qatar baǵdarlarda jańa joybarlardı iske túsiriw boyınsha sektor basshıları, tiyisli mákeme, shólkem baslıqları, hákim járdemshileri, jaslar jetekshileri hám hayal-qızlar belsendilerine tapsırmalar berilip, puqaralardıń abadan turmısın támiyinlew baǵdarındaǵı iygilikli jumıslarda shólkemleskenlik penen wazıypalardı orınlaw boyınsha tapsırmalar berildi.  

Qaraqalpaqstan Respublikası Joqarǵı Keńesiniń Málimleme xızmeti