Ellikqala rayonında ótkerilgen májiliste Joqarǵı Keńes Baslıǵı tárepinen rayondı rawajlandırıw boyınsha bir qatar wazıypalar belgilep berildi
1058
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ellikqala rayonın rawajlandırıw, jańa isbilermenlik subektlerin shólkemlestiriw, jańa jumıs orınların jaratıw baǵdarında ámelge asırılıwı tiyis wazıypalarǵa arnalǵan májilis ótkerdi.
Búgingi kúnde 2022-jılı ótkerilgen májiliste belgilep berilgen 24 tapsırmanıń 18 tapsırması orınlanǵan. Sonıń ishinde, xalıqtı isbilermenlikke tartıw, olardıń bántligin támiyinlew arqalı turaqlı dáramat deregi menen támiyinlew hám kámbaǵallıqtan shıǵarıw máselelerinde bir qatar kemshiliklerge jol qoyılmaqta.
Rayonda hákim járdemshileri tárepinen jámi 37 puqaralar jıyınınan 31 puqaralar jıyınında jeńilletilgen kreditlerdiń tolıq ózlestiriliwi támiyinlenbegen.
- “Shuqırqaq”, “Koinot”, “Aq altın”, “Doslıq”, “Jasorat”, “Íǵbal”, “Topıraq qala”, “Qos qora”, “Istiqlol”, “Jańa Ózbekstan”, “Gulistan”, “Ellikqala”, “Íqlas”, “Shopan” puqaralar jıyınlarında jeńilletilgen kredit qarjıları kórsetkishleri tómen dárejede qalmaqta.
Sonday-aq, “Shańaraqlıq isbilermenlikti rawajlandırıw” baǵdarlaması tiykarında ajıratılǵan kreditlerden mashqalalı qarızdarlıqta artıp ketken. Rayonda ótken jılı jańadan shólkemlestiriw belgilengen 168 kishi biznes subekttiń ashılıwı támiyinlenbegen. 2022-jılda ashılǵan 352 kishi biznes subektlerinen 32 subekt háreketsiz turǵan bolsa, 26 subekt óz iskerligin toqtatqan.
Jańa jumıs orınların jaratıw boyınsha belgilengen tapsırmaǵa muwapıq kishi biznes subektlerin shólkemlestiriw jumıslarında esabatlarǵa jalǵan maǵlıwmat kirgiziw jaǵdayları ushıraspaqta, nátiyjede isbilermenlik subektleri iske qosılmay, jańa jumıs orınları jaratılmaǵan.
Bunda rayon hákimi, rayon hákiminiń awıl hám suw xojalıǵı máseleleri boyınsha orınbasarı, rayon hákiminiń orınbasarı – Shańaraq hám hayal-qızlar bólimi baslıǵı, rayonlıq máhállebay islew hám isbilermenlikti rawajlandırıw orayı baslıǵı, “Amir abat” puqaralar jıyını hákim járdemshisi hám basqa da bir qatar máhállelerdegi hákim járdemshileri jalǵan maǵlıwmat kirgizgen.
Ellikqala rayonında Prezident qararına muwapıq, usı jıl 1-mart sánesine shekem “Ellikqala” máhállesinde shólkemlestiriliwi rejelestirilgen mikro oray ushın belgilep alınǵan xalıq bilimlendiriw bólimi balansındaǵı bos turǵan imarattıń xanaları aukcion sawdalarına shıǵarılmaǵan.
Joqarǵı Keńes Baslıǵı sonday-aq, rayonda jańa jumıs orınların jaratıw, investiciyalıq joybarlardı hám kishi isbilermenlik subektlerin shólkemlestiriw, máhállebay islew arqalı xalıqtıń dáramatın asırıw hám basqa da áhmiyetli baǵdarlar boyınsha wazıypalardı belgilep berdi.
Sonday-aq, bos turǵan, óz jumısın toqtatqan obektlerdi aukcion sawdalarına shıǵarıw, olarda xalıqqa paydası tiyetuǵın joybarlardı iske túsiriw boyınsha tapsırmalar berildi.
Qaraqalpaqstan Respublikası Joqarǵı Keńesiniń Málimleme xızmeti