Joqarǵı Keńes Baslıǵı tárepinen Ámiwdárya rayonında ámelge asırılıwı tiyis wazıypalar belgilep berildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonın sociallıq-ekonomikalıq jaqtan rawajlandırıw, rayonda kámbaǵallıqtı qısqartıw hám jańa jumıs orınların jaratıw baǵdarında ámelge asırılıwı tiyis wazıypalar boyınsha májilis ótkerdi. Onda ótken jılı rayonda Joqarǵı Keńes Baslıǵı basshılıǵında ótkerilgen májiliste berilgen tapsırmalardı orınlawda artta qalıwshılıq jaǵdayları, esabatlarǵa qosıp jazıwlar hám basqa da qáte-kemshilikler sınǵa alındı.

  Búgingi kúnde 2022-jılı ótkerilgen májiliste belgilep berilgen 26 tapsırmanıń 5 tapsırması orınlanbaǵan. Sonıń ishinde, xalıqtı isbilermenlikke tartıw, olardıń bántligin támiyinlew arqalı turaqlı dáramat deregi menen támiyinlew hám kámbaǵallıqtan shıǵarıw máselelerinde bir qatar kemshiliklerge jol qoyılmaqta. Atap aytqanda 2022-jılda “Shańaraqlıq isbilermenlikti rawajlandırıw” baǵdarlaması tiykarında ajırıtılıwı rejelestirilgen jeńilletilgen kredittiń ózlestiriliwi, hákim járdemshileri tárepinen jámi 49 puqaralar jıyınınan 37 puqaralar jıyınında jeńilletilgen kreditlerdiń tolıq ózlestiriliwi támiyinlenbegen.

  Húrmetli Prezidentimizdiń 2022-jıl fevral ayında Qaraqalpaqstanǵa bolǵan saparı dawamında tastıyıqlanǵan protokolına muwapıq kishi biznes subektleri sanın 2 esege asırıw belgilengen. Biraq, rayonda ótken jılı jańadan shólkemlestiriw belgilengen 301 kishi biznes subekttiń ashılıwı jolǵa qoyılmaǵan. 2022-jılda ashılǵan 347 kishi biznes subektlerinen 22 subekt háreketsiz turǵan bolsa, 17 subekt óz iskerligin toqtatqan. Bunnan tısqarı, 2022-jılda 2,4 mln. dollarlıq ónimler eksporqa shıǵarılmaǵan, 10 iri joybar bolsa perspektivasız dep tabılıp, belgilengen investiciya baǵdarlamasınan shıǵarılǵan.

Bir qatar basshılar tárepinen xalıqqa paydası tiyetuǵın kishi joybarlardı qısqa múddette iske túsiriw belgilengen  bolıp, 73 joybar iske túsirildi hám 220 jumıs ornı jaratıldı dep esabatlarǵa qosıp jazılǵan. Biraq, úyreniwler dawamında ayrım proektlerdiń usı kúnge shekem túsirilmegenligi anıqlanǵan. Húrmetli Prezidentimizdiń 2022-jıl 25-iyuldegi PQ-331-sanlı qararına tiykar máhállelerde sanaat, ónermentshilik hám sharwashılıq jónelisindegi isbilermenlerdi qollap-quwatlaw hám olarǵa shárayatlar jaratıw, jumıs orınların jaratıw, puqaralardıń dáramatın asırıw maqsetinde Qaraqalpaqstan Respublikasında 2022-2024 jıllar aralıǵında jámi 52 máhállelerde mikro oraylar shólkemlestiriliw belgilengen. Sonnan, Ámiwdárya rayonında usı jılda eki máhállede iske túsiriliwi názerde tutılǵan mikro oray shólkemlestiriw ushın usı kúnge shekem bos turǵan imarat yamasa bos jer ornı belgilep alınbaǵan. Májiliste usı sıyaqlı bir qatar kemshilikler sınǵa alındı hám óz jumısına nemquraydılıq penen qarap, belgilengen wazıypalardı orınlamay, xalıq abadanlıǵı ushın xızmet etiwi kerek qarjılarǵa juwapkershiliksiz qaraǵanı ushın Ámiwdárya rayonı hákiminiń qarjı-ekonomika hám kambaǵallıqtı qısqartırıw máseleleri boyınsha birinshi orınbasarı qatań eskertildi hám óz jumısın qayta kórip shıǵıw, tapsırmalardı múddetinde orınlaw boyınsha múddet berildi. Bunnan tısqarı, barlıq hákim járdemshileri jumısların úyrenip shıǵıw, zárúr bolsa nızamlı jaza sharasın qollaw boyınsha tiyisli uyımlarǵa tapsırma berildi. Májilis dawamında Joqarǵı Keńes Baslıǵı tárepinen rayondı rawajlandırıw baǵdarında bir qatar wazıypalar belgilep alındı.  

Qaraqalpaqstan Respublikası Joqarǵı Keńesiniń Málimleme xızmeti