Joqarǵı Keńes Baslıǵı tárepinen "Jaslar dápteri"ne kirgizilgen 353 jigit-qızlarǵa subsidiya tiykarında 1 mlrd. 800 mln. sum muǵdarındaǵı ásbap-úskeneler toplamı tapsırıldı
1840
Húrmetli Prezidentimizdiń baslaması menen jaslardı sociallıq jaqtan qollap-quwatlaw, olardı isbilermenlikke tartıw arqalı bántligin támiyinlew maqsetinde bir qatar jumıslar ámelge asırılmaqta. Sonnan, 2021-jıldan baslap jaslardıń sociallıq-ekonomikalıq mashqalaların anıqlaw hám olardı sheshiw maqsetinde "Jaslar dápteri" sisteması engizildi. Usı tiykarda Tórtkúl rayonında búgingi kúnge shekem 6903 jas "Jaslar dápteri"ne kirgizilip, hár tárepleme qollap-quwatlanbaqta.
Jaslardıń sociallıq-ekonomikalıq mashqalaların anıqlaw hám olardı saplastırıw maqsetinde "Nókis tájiriybesi" tiykarında 2022-jıl dekabr ayında rayondaǵı 37 máhállede 52 197 jaslar úyme-úy júriw arqalı xatlawdan ótkerilip, sonnan 788 jastı "Jaslar dápteri"ne kirgiziw boyınsha usınıs etildi. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen "Jaslar dápteri"ne kirgizilgen 353 jigit-qızlarǵa ózleriniń qálewi boyınsha subsidiya tiykarında 1 mlrd 800 mln swmlıq 490 toplam, sonnan, 166 tigiw mashinası, 50 konditer pech hám mikser, 31 motokultivator hám qurılıs ásbap-úskeneleri tapsırıldı.
Aytıp ótiw orınlı, jaslardı hár tárepleme qollap-quwatlaw, olardıń bántligin támiyinlew, sociallıq jaǵdayın jaqsılaw baǵdarındaǵı ámelge asırılıp atırǵan jumıslar respublikamız boyınsha dawam ettirilmekte.
Qaraqalpaqstan Respublikası Joqarǵı Keńesiniń Málimleme xızmeti