Energiya támiynatında qadaǵalawdı kúsheytiw ilajları belgilendi

Prezident Shavkat Mirziyoevtiń basshılıǵında 6-fevral kúni energiya támiynatı tarawında qadaǵalaw sistemasın tártipke salıw ilajları boyınsha májilis bolıp ótti. Májiliste energiya jetkerip beriw hám esap-sanaq sistemasındaǵı mashqalalar sın kózqarastan tallandı. Yanvar ayındaǵı suwıq bul baǵdarda basqarıw hám qadaǵalawdıń tómenlep ketkenin anıq kórsetti. Juwapker shólkemler avtomatikalıq esaplaw sistemasınıń elektr energiyasında 92 procent, tábiyǵıy gaz boyınsha 98 procent ornatılǵan, dep esabat bergen. Biraq elege shekem debitor qarızdarlıq joqarılıǵınsha qalmaqta. Rayonlardaǵı tarmaq uyımları elektr hám gazge jalǵanıwǵa esap-sanaqsız hám tallawlarsız ruqsat berip atır. Máselen, Tashkent qalasınıń 120 máhállesinde transformatorlar júklemeni kótermegeni ushın bir aydıń ózinde 5-6 mártelep ońlanǵan. Elege shekem sistemada urlıq júdá úlken. Resurslar oysızlarsha talan-taraj etilmekte. Tek ǵana dekabr ayında elektr hám gazden nızamsız paydalanıw boyınsha 12 mıńnan aslam jaǵdayda 600 milliard sumlıq zıyan anıqlanǵan. Avtomobillerge gaz quyıw shaqapshaları ústinen qadaǵalaw pútkilley izden shıqqan. Usılardan kelip shıǵıp, energetika tarawında qadaǵalawdı kúsheytiw hám nızam ústinligin támiyinlew boyınsha jańa sistema belgilendi. Bul sistemaǵa energetikanı qadaǵalaw boyınsha eki jıl «ayrıqsha tártipte» islew wazıypası qoyıldı. Energoinspekciya hám Májbúriy orınlaw byurosınıń jumısın jetilistiriw, elektr hám tábiyǵıy gazge jalǵanıwda jańasha qatnaslardı engiziw boyınsha tapsırmalar berildi.

  Májiliste energetika infrastrukturasın rawajlandırıw máselelerine de itibar qaratıldı. Atap aytqanda, Tashkent qalasınıń sanlı kartasın iske qosıw wazıypası qoyıldı. Onda aukcionǵa shıǵarılıp atırǵan jerlerdiń jaylasıwı, energetika, kommunallıq hám sociallıq infrastruktura quwatlılıǵı anıq kórinip turadı. Májiliste juwapkerler jańa sistemanı ámelge asırıw máseleleri boyınsha málimleme berdi.