Xojeli rayonında kásipke oqıtıw orayınıń ashılıw máresimi bolıp ótti

Ózbekstan Respublikası Prezidentiniń 2023-jıl 20-yanvar kúni mekteplerde shet tillerin hám kásipke úyretiw sistemasın rawajlandırıw máseleleri boyınsha ótkerilgen májilisinde berilgen tapsırmalardı orınlaw máksetinde  Xojeli rayonı xalıq bilimlendiriw bólimine qaraslı 14-sanlı mekteptiń bos turǵan imaratın rekonstrukciyalaw jumısları alıp barıldı. Qurılıs-ońlaw jumısları alıp barılıp, imaratta  Kásipke oqıtıw orayı shólkemlestirildi. Búgin usı Kásipke oqıtıw orayınıń ashılıw máresimi bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jıynalǵanlardı qutlıqladı hám orayda oqıwshılar menen sáwbetlesip, olar ushın jaratılǵan sharayatlar menen tanıstı. Aytıw orınlı, bul orayda oqıwshı-jaslardı jámi 7 baǵdar boyınsha qásipke uyretiw belgilengen bolıp, sonnan, ustashılıq, shet tilin uyreniw, mobil telefon ońlaw, xayal-qızlar sháshtárezxanası, tigiwshilik hám konditer ónimlerin pisiriw sıyaqlı jónelisler boyınsha oqıwshılar kasipke baǵdarlanadı. Bunnan tısqarı, mektep aymaǵında qoyanshılıq, qusshılıqtı rawajlandırıw hám de ıssıxanada ónim jetistiriw jónelisleri boyınsha da kásip úyretiw belgilep alınǵan. Joqarǵı Keńes Baslıǵı mektepte jaslardı kásipke baǵdarlaw boyınsha keńirek bilim beriw, jańa baǵdarlardı engiziw boyınsha juwapkerlerge tapsırmalar berdi.

Qaraqalpaqstan Respublikası Joqarǵı Keńesiniń Málimleme xızmeti