Járdemge mútáj 598 shańaraqtıń tábiyǵıy gaz tólemleri ushın 832,9 mln.swm hám 143 shańaraqtıń elektr energiyası tólemleri ushın 70,5 mln. swm tólep berildi
875
Ózbekstan Respublikası Prezidenti Sh.Mirziyoevtiń basshılıǵında 2022-jıldıń 15-dekabr kúni «Aymaqlarda janılǵı energiyası támiynatın jaqsılaw, isbilermenlik hám sanaattı rawajlandırıw, xalıqtıń bántligin támiyinlew ilajları xaqqında»ǵı keńeytilgen tárizde ótkerilgen videoselektor májilisiniń protokolı tapsırmaları hámde 2023-jıldıń 16-yanvar kúni energiya resursları támiynatı boyınsha ótkerilgen videoselektor májilisinde belgilep berilgen wazıypalardı orınlaw maqsetinde Nókis qalası hám rayonlarda hawa-rayınıń keskin suwıtıwı aqıbetlerin jumsartıw hámde xalıktıń kem támiyinlengen qatlamın sociallıq jaqtan qollap-quwatlaw ushın mútáj shańaraqlarǵa tábiyǵıy gaz hám elektr energiyası tólemlerin tólep beriwde ámeliy járdem kórsetiw belgilep alınǵan edi.
Usıǵan tiykar, Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń tapsırması menen Qaraqalpaqstan Respublikası Joqarǵı Keńesi Prezidiumınıń arnawlı qararı qabıl etilip, 2023-jıl yanvar ayında hawa rayınıń keskin suwıtıwı aqıbetlerin jumsartıw hámde xalıqtıń mútáj qatlamın sociallıq jaqtan qollap-quwatlaw maqsetinde kommunal tólemlerdi tólew qábileti tómen bolǵan, járdemge mútájligi bar 598 shańaraqtıń tábiyǵıy gaz tólemleri ushın 832,9 mln.swm hám 143 shańaraqtıń elektr energiyası tólemleri ushın 70,5 mln. swm tólep berildi.
Bunda sociallıq qorǵawǵa mútáj bolǵan shańaraqlar barlıq máhálleler kesiminde úyrenip shıǵılıp sheshim qabıl etildi.
Sonıda ayrıqsha atap ótiw orınlı, búgingi kúnde respublikamız aymaǵında xalıqtıń kúndelikli turmısında ushırasıp atırǵan mashqalalarǵa sheshim tabıw, olardıń jasaw jaǵdayın jaqsılaw boyınsha keń kólemli jumıslar alıp barılıp atır. Bul baǵdardaǵı iygilikli jumıslarǵa elede dawam etedi.
Qaraqalpaqstan Respublikası Joqarǵı Keńesiniń Málimleme xızmeti