Joqarǵı Keńes Baslıǵı hayal-qızlardıń jámiyette tutqan ornı hám olar menen baylanıslı mashqalalarǵa arnalǵan videoselektor májilisin ótkerdi

Ótkerilgen májiliste hayal-qızlardı hár tárepleme qollap-quwatlaw, olardıń jámiyettegi abırayın jáne de bekkemlew hám bul baǵdarda sheshimin kútip turǵan mashqalalar haqqındaǵı máselelerdi qarap shıǵıldı. Onda Qaraqalpaqstan Respublikası Ministrler Keńesiniń Baslıǵı F.Ermanov, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı. Búgingi kúnde hayal-qızlarımızdıń jámiyetimizde alıp barılıp atırǵan ózgeris hám jańalanıwlar procesinde, basqarıw sistemasında, isbilermenlik, ilim-pán, densawlıqtı saqlaw, mádeniyat hám basqa da barlıq tarawlarda belsendiligi artıp barmaqta. Bolıp ótken májiliste de bul atap ótilip, usı jónelistegi bir qatar máseleler sın kóz-qarasta kórip shıǵıldı.  

  Sońǵı jılları hayal-qızlar salamatlıǵın bekkemlew boyınsha bir qansha jumıslar alıp barılıp atırǵanlıǵına qaramay, olar arasında ayırım kesellikler jıldan-jılǵa kóbeyip barmaqta. Sonday-aq, Nókis qalası hám rayon hákimleriniń Shańaraq hám hayal-qızlar máseleleri boyınsha orınbasarları jumıslarınıń bahalaw reytingleri  nátiyjeleri úyrenilgende ayırım rayonlarda kórsetkishler tómen dárejede qalmaqta. Bunnan tısqarı, bir qatar máhállelerdegi hayal-qızlar belsendileri jumıslarınıń reyting nátiyjeleri qanaatlandırarlı emes. Májiliste hayal-qızlarǵa subsidiya ajıratıw, hayal-qızlardı turaq-jaylar menen támiyinlew máseleleri talap dárejesinde emes ekenligi sınǵa alındı.

  Joqarıdaǵılar menen bir qatarda, úyreniwler nátiyjesinde “Shańaraqlıq isbilermenlikti rawajlandırıw” baǵdarlaması tiykarında hayal-qızlarǵa isbilermenlik penen shuǵıllanıw ushın ajıratılǵan jeńilletilgen kredit qarjılarınan ayırımları maqsetsiz jumsalǵanlıǵı anıqlanǵan. Nókis qalası hám basqa rayonlarda isbilermen hayal-qızlar tárepinen islep shıǵarılǵan ónimlerdi realizaciya etiwge ámeliy járdemler kórsetilmegen. Sonday-aq, 2022-jıl dawamında ózin-ózi bánt etken hayal-qızlar boyınsha Bozataw, Moynaq, Shomanay rayonlarında kórsetkish tómen dárejede qalmaqta.

  Búgingi kúnde 603 mámleketlik emes kommerciyalıq emes shólkemlerden 5 shólkem hayal-qızlardı qollap-quwatlaw tarawında jumıs alıp barmaqta. Biraq, bul shólkemler tárepinen mámleketlik uyımlar menen birge islesiw, jámiyette hayal-qızlardıń sociallıq-siyasiy belsendiligin arttırıw hám basqa da baǵdarlardaǵı jumıslar talap dárejesinde emes. Usılar menen bir qatarda, ayırım orınlarda ótken 2022-jılı jumıssız hayal-qızlardıń bántligi támiyinlengen – dep esabatlarǵa qosıp jazıwlarǵa jol qoyılǵan. Eń ashınarlısı, bul bántligi támiyinlendi dep kórsetilgen hayal-qızlar 1 aydan soń jáne jumıssız qalǵan. Bunnan tısqarı, Bántlik hám miynet qatnasıqları ministrligine qaraslı Mono-oray, Shańaraq hám hayal-qızlar komitetine qaraslı “Hayal-qızlar isbilermenlik orayı” jumısları da kútilgen nátiyjeni bermey atır.

  Usılar menen bir qatarda 2022-jılı “Hayallar dápteri”ne kirgizilgen jumıssız hayal-qızlardan ayırımları tek ǵana 1 aylıq jámiyetlik jumıslarǵa tartılǵan. Sonı ayrıqsha atap ótiw kerek, ayırım rayonlar tárepinen “Hayallar dápteri”ne kirgizilgen, kredit alıwdı qálewshi hayal-qızlarǵa talap etiletuǵın jeńilletilgen kreditler tolıq ajıratıldı dep esabatlarǵa qosıp jazıwǵa jol qoyǵan. Hátteki, Beruniyde ruwxıy keselligi boyınsha dispanser esabında turǵan 1 hayal-qızǵa kredit ajıratılǵan dep esabatqa maǵlıwmatlar kirgizilgen. Qanlıkól rayonında bolsa, baǵıwshısı bolmaǵan, mayıplıǵı bolǵan hám qaramaǵında mayıp perzenti bolǵan shaxslarǵa beriletuǵın materiallıq járdem pulları berildi dep esabatqa qosıp jazǵanlıǵı anıqlanǵan.

  Keltirilgen kemshilikler boyınsha Joqarǵı Keńes Baslıǵı tárepinen taraw juwapkerlerine anıq wazıypalar belgilep berilip, óz jumıslarınıń nátiyjeliligin arttırıw boyınsha múddet berildi.  

Qaraqalpaqstan Respublikası Joqarǵı Keńesiniń Málimleme xızmeti