Mebel ónimlerin islep shıǵarıw hám eksport etiwdi xoshametlewge baylanıslı qosımsha ilajlar haqqında
1495
Ózbekstan Respublikası Prezidentiniń qararı
Mebe ónimlerin islep shıǵarıwǵa qánigelesken kishi sanaat zonaların injenerlik-kommunikaciya infrastrukturası menen támiyinlew, tayar mebel ónimleriniń eksportın xoshametlewdi kúsheytiw, tarawǵa tájiriybeli kadrlardı tartıw maqsetinde:
- Sonday tártip ornatılsın, oǵan muwapıq 2023-jıl 1-fevraldan 2024-jıl 1-yanvarǵa shekem:
tayar mebel ónimlerin eksport etiwshi isbilermenlik subektlerine sırt eldegi ofis, sawda hám qoymaxana imaratların ijaraǵa alıw qárejetleriniń bir bólegin Eksporttı xoshametlew agentligi tárepinen qaplap beriwde bul
turaq jay emes orınlar maydanına qoyılǵan norma kórsetkishi 100 kvadrat metrden 250 kvadrat metrge arttırıladı;
jıllıq túsiminde tayar mebel ónimleriniń eksportınan túsim úlesi keminde 30 procentti quraytuǵın jergilikli kárxanalar tárepinen injener-texnolog, lak hám boyaw sebiw ustası, dizayner sıyaqlı sırt el qánigeleri tartılǵanda, olardıń
miynet haqısınıń 25 procenti, biraq miynetke haqı tólewdiń eń az muǵdarınıń 9 esesinen kóp bolmaǵan bólegi Eksporttı xoshametlew agentliginiń qarjıları esabınan qaplap beriledi.
Onda, sırt el qánigelerin tartıw qárejetleri eksport kólemi hár sherekte
1 million dollardan artqan kárxanalarǵa sherek juwmaǵı menen kelesi aydıń 10-sánesine shekem berilgen hújjetler tiykarında tólenedi.
- Ózbekstan Respublikası Prezidentiniń 2021-jıl 21-iyundaǵı «Respublikamız aymaqlarında mebel qurılısı sanaatın rawajlandırıwǵa qaratılǵan ilajlar haqqında»ǵı PQ-5155-sanlı qararına 2-qosımshada názerde tutılǵan shiyki zat, awısıq bólekler, furnitura hám aksessuarlardı Ózbekstan Respublikası aymaǵına alıp kiriwde bajıxana bajısınıń nollik stavkalarınıń qollanılıwı 2024-jıl 1-yanvarǵa shekem sozdırılsın.
- 2023-jıl 1-fevraldan 2024-jıl 1-yanvarǵa shekemgi dáwirde 1-qosımshaǵa muwapıq mebel islep shıǵarıwda paydalanılatuǵın shiyki zat, awısıq bólekler, furnitura hám aksessuarlar importında bajıxana bajısınıń nollik stavkası qollanılsın.
- Suw xojalıǵı ministrliginiń Ferǵana wálayatı, Furqat rayonı Qwqonbay máhállesindegi suw xojalıǵı imaratın Mektepke shekemgi hám mektep bilimlendiriwi ministrligi basshılıǵına ótkeriw haqqındaǵı usınısı maqullansın.
Onda, Ferǵana wálayatı hákimligi Mektepke shekemgi hám mektep bilimlendiriwi ministrligi, Qurılıs hám turaq jay kommunallıq xojalıǵı ministrligi menen birgelikte úsh ay múddette usı imarattı jergilikli byudjettiń qosımsha dárekleriniń qarjıları esabınan qayta ońlaw, infrastruktura, málimleme-kitapxana orayı, ásbap-úskeneler, materiallıq-texnikalıq hám shiyki zat bazası menen támiyinlew sonday-aq, aǵash oymakerligi, mebel qurılısı, kesteshilik hám naǵıs oyıw sıyaqlı milliy ónermentshilik tarawına qánigelesken zamanagóy ulıwma bilimlendiriw mektebin shólkemlestiriw boyınsha xalıq deputatları Ferǵana wálayatlıq Keńesine usınıs kirgiziw ilajların kórsin.
- Ózbekstan Respublikası Prezidentiniń 2021-jıl 21-iyundaǵı «Respublikamız aymaqlarında mebel qurılısı sanaatın rawajlandırıwǵa qaratılǵan ilajlar haqqında»ǵı PQ-5155-sanlı qararına 2-qosımshaǵa muwapıq ózgerisler kirgizilsin.
- Investiciyalar, sanaat hám sawda ministrligi eki ay múddette:
respublikamızda jumıs alıp barıp atırǵan mebel qurılısı kárxanaların Mebel hám aǵash islep shıǵarıw sanaatı assocaciyası tárepinen tolıq qamtıp alıwdı xoshametlew;
jergilikli mebel islep shıǵarıwshı kárxanalardı inventarizaciyadan ótkeriw tiykarında olardıń dizimi, islep shıǵarılatuǵın ónim túrleri, quwatlıqları hám basqa da kórsetkishleriniń elektron bazasın qáliplestiriw;
mápdar ministrlik hám uyımlar menen birgelikte nızamshılıq hújjetlerine usı qarardan kelip shıǵatuǵın ózgerisler hám qosımshalar haqqındaǵı usınıslardı Ministrler Kabinetine kirgizsin.
- Usı qarardıń orınlanıwın nátiyjeli shólkemlestiriwge juwapker hám jeke juwapker etip investiciyalar, sanaat hám sawda ministri L.Sh.Qudratov belgilensin.
Ózbekstan Respublikası Prezidenti Sh.MIRZIYoEV
