Taqıyatas rayonında qurılıs-ońlaw xám abadanlastırıw jumısları dawam ettirilip atır
1173
Taqıyatas rayonındaǵı awır aymaqlar esaplanǵan “Nurlı keleshek” MPJ, Keneges awılı hám “Qusshılıq” MPJ “Áskeriy qalasha” awılları búgin shın mánisinde qurılıs maydanına aylanǵan desek aljaspaǵan bolamız. Bul aymaqlarda Ferǵana wálayatınıń «Baxodir Log‘on Tekstil» klasterinen infrastrukturalardı jańalaw ushın qayırqomlıq járdem esabında qurılıs materialları alıp kelingen edi. Házirgi waqıtta usı tiykarda jumıslar qızǵın túrde dawam ettirilip atır. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev aymaqlarda alıp barılıp atırǵan jumıslardı barıp kórdi hám puqaralar menen ushırastı.
Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov qatnastı. Aymaqta búgin jumıslar qızǵın, atap aytatuǵın bolsaq, burın jazda qum-shańǵıtlı, jawın-shashınlı kúnlerde ılaylı kóshelerge qum-щeben aralaspasın tósew jumısları alıp barılmaqta. Bunnan tısqarı, mútáj shańaraqlardıń turaq-jayların ońlaw hám zárúrlerin shiferlap beriw, elektr energiyası támiynatın jaqsılaw maqsetinde eskirgen baǵanalardı temir-beton baǵanalarǵa almastırıw, ishimlik suwı tarmaǵın tartıw hám gaz trubaların ońlaw sıyaqlı bir qatar jumıslar dawam etpekte.
Barlıq jumıslar «Insan qádiri ushın» principi tiykarında ámelge asırılıp atırǵan elimizde bunday iygilikli jumıslar dawam ettirilidi hám barlıq reforma, jańalanıwlar hár bir shańaraqqa kirip barıwı támiyinlenedi.
Qaraqalpaqstan Respublikası Joqarǵı Keńesiniń Málimleme xızmeti