Qaraqalpaqstan Respublikası Joqarǵı Keńesiniń Baslıǵı Amanbay Orınbaev bir qatar jańa joybarlar menen kelgen investordı qabılladı

Valensiyadaǵı «SILK WAY VALENCIA» Ispan-Ózbek sawda-investiciya úyi baslıǵı Ildar Sharafutdinov búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı.

  Onda Qaraqalpaqstan Respublikası Ministrler Keńesi Baslıǵınıń orınbasarı – Investiciyalar hám sırtqı sawda ministr A.Ótewliev, «Shah Polan Group» kárxanası baslıǵı A.Shukurov hám «Karakalpak Sement» kárxanası baslıqları qatnastı. Qabıllawda Qaraózek rayonı aymaǵında 50 MVt quwatlılıqqa iye quyash elektr stanciyası tiykarında kurot zonası, miymanxana, «Jasıl aymaq», jasalma kól hám janılǵı quyıw shaqapshasın óz ishine alǵan «Eko kompleks» shólkemlestiriw, sonday-aq, 100 MVt quwatlılıqqa iye samal elektr stanciyasın qurıw boyınsha investiciya kirgiziw máseleleri talqılandı. Sonday-aq, Qaraqalpaqstan Respublikası aymaǵına Ispaniya mámleketinen investorlardı tartıw hám jańa joybarlardıń iske túsiriliwin támiyinlew baǵdarında óz-ara pikir almasıldı. Investorlar usınısları boyınsha bul joybarlar iske túsirilgennen keyin jańa jumıs orınları jaratılıwı belgilengen.

  Óz náwbetinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń potencialı, investorlar ushın ekonomikalıq hám sanaat zonalarındaǵı jaratılǵan jeńillikler, sonday-aq, kelesi birge islesiwlerdiń perspektivalı jónelisleri haqqında ayrıqsha tilge aldı. Ushırasıw dawamında Joqarǵı Keńes Baslıǵı jańa joybarǵa investiciya kirgizip jańa jumıs orınların jaratıwdı niyet etken hár qanday investor qollap-quwatlanatuǵınlıǵı hám birge islesiwge barqulla tayar ekenligin atap ótti.  

Qaraqalpaqstan Respublikası Joqarǵı Keńesiniń Málimleme xızmeti