Ózbekstan Respublikası Prezidentiniń qararı
Janılǵı-energiya resurslarınan nızamsız paydalanıw jaǵdayların saplastırıw hám aldın alıw, olardan nátiyjeli hám aqılǵa uǵras paydalanıw arqalı ekonomika tarmaqları hám sociallıq tarawdıń energiya nátiyjeliligin arttırıw, tutınıwshılar tárepinen elektr energiyası hám tábiyǵıy gazden paydalanıw qaǵıydalarına ámel etiliwi ústinen qadaǵalawdı kúsheytiw maqsetinde:
- Tómendegiler:
Ózbekstan Respublikası Prezidentiniń 2022-jıl 21-dekabrdegi «Jańa Ózbekstannıń hákimshilik reformaların ámelge asırıw ilajları haqqında»ǵı PP-269-sanlı Pármanına muwapıq
Energetika ministrligi janındaǵı Elektr energiyası, neft ónimleri hám gazden paydalanıwdı qadaǵalaw inspekciyası (keyingi orınlarda – Ózenergoinspekciya) shólkemlestirilgenligi;
Ózbekstan Respublikası Prezidentiniń 2023-jıl 25-yanvardaǵı «Respublika atqarıw hákimiyatı uyımlarınıń jumısın nátiyjeli jolǵa qoyıwǵa baylanıslı birinshi gezektegi shólkemlestiriw ilajları haqqında»ǵı PP-14-sanlı Pármanına muwapıq Ózenergoinspekciyanıń Mámleketlik byudjet esabınan qarjılandırılatuǵın
jámi basqarıw shtat birlikleriniń sanı 357, sonıń ishinde, Ózenergoinspekciya baslıǵı
orınbasarlarınıń sanı 2 ew etip belgilengenligi maǵlıwmat ushın qabıl etilsin.
- Tómendegiler Ózenergoinspekciya jumısınıń tiykarǵı baǵdarları etip belgilensin:
yuridikalıq hám fizikalıq shaxslar tárepinen (xalıqtan tısqarı) janılǵı-energiya resursların islep shıǵarıw (qazıp shıǵarıw), qayta islew, jetkerip beriw (tasıw), bólistiriw hám paydalanıw, olardıń sapa hám muǵdar jaǵınan saqlanıwın támiyinlew baǵdarındaǵı nızamshılıq hújjetleri hám texnikalıq jaqtan tártipke salıw boyınsha normativlik hújjetlerdiń talaplarına ámel etiliwi ústinen mámleketlik qadaǵalawdı ámelge asırıw;
elektr, gaz jetkeriw hám gaz bólistiriw tarmaqlarına nızamsız jalǵanıw, janılǵı-energiya resursların talan-taraj etiw hám nızamsız paydalanıwdıń basqa jaǵdayların, sonday-aq, olardı islewge imkaniyat beriwshi sebep hám sharayatlardı anıqlaw, saplastırıw hám aldın alıw;
tikkeley tutınıwshılar tárepinen paydalanılǵan hám tiyisli aymaqlar shegarasındaǵı tarmaqlarǵa jetkerip berilgen janılǵı-energiya resurslarınıń kólemi arasındaǵı ayırmashılıqlardı anıqlaw hám saplastırıw;
yuridikalıq hám fizikalıq shaxslar tárepinen (xalıqtan tısqarı) energetika obektlerinde baxıtsız hádiyseler hám texnologiyalıq buzılıwlar (avariyalar)dıń aldın alıw ilajlarınıń islep shıǵılıwı hám onıń orınlanıwı ústinen qadaǵalawdı ámelge asırıw;
qayta tikleniwshi energiya dárekleri qurılmaların sonday-aq, energiya nátiyjeli hám energiya únemlewshi zamanagaóy texnologiyalardı engiziw, energiya resurslarınan paydalanıw nátiyjeliliginiń monitoringin alıp barıw;
janılǵı-energiya resurslarınan aqılǵı uǵras hám nátiyjeli paydalanıwdı támiyinlew boyınsha tutınıwshılar (xalıqtan tısqarı) tárepinen orınlanatuǵın ilajlardıń energiya nátiyjeliligin bahalaw, sonday-aq, ónim birligin islep shıǵarıw (jumıstı orınlaw, xızmet kórsetiw) ushın janılǵı-energiya resursları paydalanılıwınıń normalarınıń orınlanıwı hám keleshekte jetilistiriliwi ústinen qadaǵalawdı ámelge asırıw.
- Mámleketlik hákimiyat hám basqarıw uyımları, huqıqtı qorǵaw hám qadaǵalawshı uyımlar tárepinen Ózenergoinspekciya xızmetkerlerine olardıń wákilligine kirmeytuǵın wazıypalardıń júkleniwi qadaǵan etiletuǵını;
mámleketlik uyımlar, sonıń ishinde, huqıqtı qorǵaw hám qadaǵalawshı uyımlar usı qararǵa muwapıq Ózenergoinspekciyaǵa oǵan júklengen wazıypa hám funkciyalardı orınlawda hár tárepleme járdemlesiwi shárt ekenligi;
Ózenergoinspekciyaǵa júklengen wazıypalardı orınlaw ushın zárúr bolǵan málimleme, hújjetler hám basqa da materiallar onıń nızamlı talabına bola biypul beriletuǵını;
Ózenergoinspekciya tárepinen janılǵı-energiya resursların orınsız jumsaw, olardan nızamlı hám nátiyjesiz paydalanıw jaǵdayların anıqlaw baǵdarında mámleketlik qadaǵalawdı ámelge asırıw menen baylanıslı qadaǵalaw ilajları xojalıq júrgiziwshi subektlerdiń jumısın tekseriw bolıp esaplanbaytuǵını;
Ózenergoinspekciya xızmetkerleri xızmet gúwalıqları bolǵan jaǵdayda, sutkanıń qálegen waqtında tutınıwshılardıń janılǵı-energiya resursların esapqa alıw úskeneleriniń kórsetkishlerin jazıp alıw hám olardıń jaǵdayı, jalǵanıw sxemaları hám qurılmaların tosqınlıqsız barıp kóriwge haqılı ekenligi;
Ózenergoinspekciya Ózbekstan Respublikası Prezidenti hám Ministrler Kabinetiniń qararları tiykarında mámleketlik uyımlar hám shólkemler tárepinen qayta tikleniwshi energiya dárekleri qurılmalarınıń ornatılıwın qadaǵalaytuǵını hám belgilengen kórsetkishlerdiń orınlanıwı támiyinlenbegen jaǵdayda, olardıń lawazımlı shaxslarına ilajlar kóriw boyınsha Ministrler Kabinetine usınıslar kirgizip baratuǵını belgilensin.
- Bas prokurordıń janılǵı-energiya resurslarınan paydalanıw tarawında nızamshılıqqı ámel etiliwi hám onıń orınlanıwı ústinen qadaǵalawdı ámelge asırıwǵa juwapker bolǵan orınbasarı (keyingi orınlarda – Bas prkurordıń orınbasarı) lawazımı kirgizilsin.
Bas prokurordıń orınbasarı:
Ózenergoinspekciyaǵa júklengen wazıypalar menen funkciyalardı orınlawǵa ámeliy járdem kórsetetuǵını;
Bas prokuratura janındaǵı Májbúriy orınlaw byurosı hám Ekonomikalıq jınayatlarǵa qarsı gúresiw departamentiniń jumısın muwapıqlastıratuǵını belgilensin.
Bas prokuratura
eki hápte múddette janılǵı-energiya resurslarınan paydalanıw ústinen mámleketlik qadaǵalawdı nátiyjeli shólkemlestiriw boyınsha usınıslardı Ózbekstan Respublikası Prezidenti Administraciyasına kirgizsin.
Ózenergoinspekciya hám onıń aymaqlıq basqarmalarınıń jumısın usı qarar menen belgilengen tiykarǵı baǵdarlar tiykarında jáne de jetilistiriw boyınsha kompleksli ilajlardı nátiyjeli ámelge asırıw
juwapkershiligi energetika ministri jeke túrde J.T.Mirzamahmudovqa hám Bas prokurordıń orınbasarına júklensin.
- Janılǵı-energiya resurslarınan aqılǵa uǵras hám nátiyjeli paydalanıwdı támiyinlew hám bul baǵdardaǵı processlerdi sanlastırıw maqsetinde:
a) házirgi elektr hám gaz tarmaqları sonday-aq, qurılmalarınıń júklemesi belgilengen normadan artqan jaǵdayda,
olarǵa jańa tutınıwshılardı jalǵaw qatań qadaǵan etilsin;
b)
2023-jıl 1-marttan baslap:
qadaǵalaw ilajların ámelge asırıwda ayırmashılıqlardı anıqlaw maqsetinde Ózenergoinspekciyaǵa «Aymaqlıq elektr tarmaqları» AJ, «Aymaqgaztámiynat» AJ, «Ózbekstan milliy elektr tarmaqları» AJ, «Óztransgaz» AJlardıń elektr energiyası hám tábiyǵıy gazdi qadaǵalaw sonday-aq, esapqa alıwdıń avtomatlastırılǵan sistemalarındaǵı janılǵı-energiya resurslarınan paydalanıw haqqındaǵı maǵlıwmatlardı monitoring etiw imkaniyatı jaratılsın;
elektr energiyası hám tábiyǵıy gazden paydalanıw qaǵıydaların buzıw menen baylanıslı huqıqbuzarlıq boyınsha dúzilgen aktlerdi elektron túrde rásmiylestiriw hám tiyisli maǵlıwmatlardı
«E-ma‘muriy ish» sistemasına kirgiziw tártibi engizilsin;
v)
2023-jıl 1-iyulden baslap yuridikalıq tárepler hám jeke tártiptegi isbilermenler menen elektr energiyası sonday-aq, tábiyǵıy gazdi jetkerip beriw boyınsha shártnamalar elektr hám gaz támiynatı kárxanalarınıń programmalıq támiynatı yamasa «Shaffof qurilish» milliy málimleme sisteması arqalı elektron sanlı tańbadan paydalanǵan halda dúziletuǵını belgilensin.
Onda:
usı tártip yuridikalıq tárepler hám jeke tártiptegi isbilermenler ushın janılǵı-energiya resurslarınan paydalanıw boyınsha limitlerdi belgilew hám olarǵa ózgerisler kirgiziwge de qollanıladı;
mámleketlik buyırtpashılar menen dúzilgen shártnamalar haqqındaǵı maǵlıwmatlar mámleketlik satıp alıwlar boyınsha arnawlı málimleme portalına avtomatikalıq túrde jiberiliwi támiyinlenedi;
byudjet buyırtpashıları menen dúzilgen shártnamalar ǵaznashılıq bólimlerinde elektron túrde (insan faktorısız) dizimnen ótkeriledi;
g)
2023-jıl 1-oktyabrge shekem házirgi elektr energiya hám tábiyǵıy gazdi jetkerip beriw sonday-aq, bólistiriw tarmaqları menen qurılmaları júklemesi artıp ketiwiniń aldın alıw imkaniyatın jaratıw maqsetinde olar biomálimleme sistemasına kirgizilsin, elektr hám gaz támiynatı kárxanalarınıń programmalıq támiynatı sonday-aq, «Shaffof qurilish» milliy málimleme sisteması menen integraciyalansın.
Onda, elektr energiyası hám tábiyǵıy gazdi jetkerip beriw, bólistiriw tarmaqları hám qurılmaları usı sistemalar menen integraciyalanǵannan soń elektr hám gaz tarmaqlarına jalǵanıwda jalǵanıw noqatları avtomatlastırılǵan túrde insan faktorısız tańlanadı:
d)
2023-jıl 1-oktyabrden baslap elektr hám gaz tarmaqları hám qurılmaların qurıwda joybarlaw hújjetlerin wákillikli uyımlar menen kelisiw tiyislisinshe elektr hám gaz támiynatı kárxanalarınıń programmalıq támiynatları arqalı anıq múddetlerde ámelge asırılatuǵını belgilensin.
Energetika ministrligi Sanlı texnologiyalar ministrligi, «Aymaqlıq elektr tarmaqları» AJ, «UzGasTrade» AJ, «Aymaqgaztámiynat» AJ menen birgelikte elektr hám gaz támiynatı kárxanalarınıń baǵdarlamalıq támiynatlarınıń islep shıǵılıwı hám iske qosılıwı sonday-aq, usı bántte názerde tutılǵan texnikalıq ilajlardıń óz waqtında hám sapalı ámelge asırılıwın támiyinlesin.
- Ózenergoinspekciya «Aymaqlıq elektr tarmaqları» AJ, «Aymaqgaztámiynat» AJ, «Ózbekstan milliy elektr tarmaqları» AJ, «Óztransgaz» AJ menen birgelikte:
a)
turaqlı túrde:
yuridikalıq hám fizikalıq táreplerge tiyisli energetika obektleri (keyingi orınlarda – obektler) dizimin qáliplestirip barsın;
obektlerde paydalanılıp atırǵan janılǵı-energiya resurslarınıń kólemin anıqlap barsın;
obektlerde janılǵı-energiya resurslarınıń bosqa jumsalıwı hám sapa talaplarına ámel etpew jaǵdayların anıqlap barsın hám olar boyınsha óz wákillikleri sheńberinde ilajlar kórsin;
sistemalı tiykarda janılǵı-energiya resurslarınan nızamsız paydalanıw jaǵdaylarınıń aldın alıw boyınsha ámeliy ilajlardı ámelge asırsın;
obektlerdiń tarmaqlarǵa durıs jalǵanlıǵı hám esaplaǵıshlar bar ekenligi, olardıń texnikalıq talaplarǵa hám standartlarǵa muwapıqlıǵın tekserip barsın, sonday-aq, ayıplanıwshı bolǵan usı obektler xızmetkerleri hám olarǵa xızmet kórsetken shaxslardı nızamshılıqta belgilengen tártipte juwapkershilikke tartıw ilajların kórsin;
obektlerde ornatılǵan esaplaǵıshlardıń elektr energiyası hám tábiyǵıy gazdi qadaǵalaw hám esapqa alıwdıń avtomatlastırılǵan sistemalarına sáykesligin úyrensin;
b)
hár ayda elektr hám gaz tarmaqları sonday-aq, qurılmalarınıń júklemeleri hám sazlıǵın tekserip barıp, anıqlanǵan kemshiliklerdi saplastırıw ilajların kórsin.
Onda, Ózenergoinspekciya
hár ayda Bas prokurordıń orınbasarı hám energetika ministrine usı bántte názerde tutılǵan ilajlardıń orınlanıwı boyınsha esabat kirgizip barsın.
- Bas prokuratura Joqarǵı sud, Mámleketlik qáwipsizlik xızmeti, Ishki isler ministrligi, Energetika ministrligi menen birgelikte bir hápte múddette tómendegilerdi názerde tutıwshı nızam joybarın belgilengen tártipte kirgizsin:
elektr energiyası, gaz hám vodoprovodtan paydalanıw qaǵıydaların buzıw arqalı talan-taraj etiw jaǵdayların urlıq jınayatı sıpatında belgilew;
Ózenergoinspekciyanıń elektr energiyası hám gazden paydalanıw qaǵıydaların buzıw menen baylanıslı hákimshilik huqıqbuzarlıqlar haqqındaǵı jumıslardı kórip shıǵıw (lawazımlı shaxslarǵa) wákilligin belgilew;
Ózenergoinspekciya tárepinen berilgen jazba kórsetpe hám usınıs xatların orınlamaǵanı ushın hákimshilik juwapkershilikti belgilew.
- Energetika ministrligi hám Bas prokuraturanıń tómendegi qarjılardı Ózenergoinspekciyanıń belgilengen tártipte ashılatuǵın arnawlı ǵazna esap betine baǵdarlaw haqqındaǵı usınısına kelisim berilsin:
Ózenergoinspekciya qatnasıwında janılǵı-energiya resurslarınan nızamsız paydalanıw menen baylanıslı nızambuzıwshılıqlar boyınsha óndiriletuǵın zıyan summasınıń 25 procenti;
tutınıwshılar tárepinen quwatlılıq koefficientiniń normativlik bahası uslap turılmaǵanlıǵı nátiyjesinde payda bolǵan elektr energiyasınıń qosımsha shıǵını menen baylanıslı tólemlerden «Aymaqlıq elektr tarmaqları» AJ filiallarına túsken qarjılardıń 50 procenti;
Ózenergoinspekciya tárepinen qollanılǵan hákimshilik járiymalar hám ekonomikalıq sankciyalar boyınsha óndirilgen qarjılardıń 50 procenti;
Ózenergoinspekciya tárepinen tólemli xızmetlerdi kórsetiwden túsetuǵın qarjılar;
nızamshılıqta qadaǵan etilmegen basqa da dárekler.
Onda, arnawlı ǵazna esap betindegi qarjılar tómendegi maqsetlerde qollanılıwı názerde tutılsın:
Ózenergoinspekciya xızmetkerlerin materiallıq xoshametlew hám materiallıq-texnikalıq bazasın bekkemlew;
Ózenergoinspekciya xızmetkerlerin tayarlaw, qayta tayarlaw hám olardıń mamanlıǵın arttırıw;
Ózenergoinspekciyaǵa shártnama tiykarında ekspert hám qánigelerdi oǵan júklengen wazıypalardı nátiyjeli orınlaw ushın tartıw. Onda, shártnama tiykarında tartılatuǵın ekspert hám qánigeler statusı boyınsha Ózenergoinspekciya xızmetkerlerine teńlestiriledi;
Ózenergoinspekciya wazıypaların nátiyjeli ámelge asırıw sonday-aq, málimleme texnologiyaların engiziw hám modernizaciyalaw.
- Energetika ministrligi:
a) Sanlı texnologiyalar ministrligi menen birgelikte
2024-jıldıń aqırına shekem elektr energiyasınıń dispetcherlik basqarıwı hám maǵlıwmatlardı jıynaw programmalıq-apparat komleksi (SCADA), sonday-aq, óndiristen baslap juwmaqlawshı tutınıwshıǵa jetkerip beriwge shekemgi barlıq processlerge elektr energiyası hám tábiyǵıy gazdi qadaǵalaw sonday-aq, esapqa alıwdıń avtomatlastırılǵan sistemaları (EQEAAS, GQEAAS) tolıq engiziliwin támiyinlesin.
Bas prokuratura usı sistemalar tolıq engiziliwin óz aldına qadaǵalawǵa alsın;
b) «Aymaqlıq elektr tarmaqları» AJ hám «Aymaqgaztámiynat» AJ menen birgelikte
bir ay múddette elektr hám gaz tarmaqlarına jalǵanıw ushın texnikalıq shártler talapları hám olardı beriw tártibin xalıqaralıq standartlar tiykarında qayta kórip shıǵıw hám belgilew boyınsha Húkimet qararınıń joybarın Ministrler Kabinetine kirgizsin.
- «Óztransgaz» AJ, «Aymaqlıq elektr tarmaqları» AJ hám «Aymaqgaztámiynat» AJ Salıq komiteti menen birgelikte 2023-jıl 1-iyunǵa shekem janılǵı-energiya resurslarınan nızamsız hám nátiyjesiz paydalanıw jaǵdayları anıqlanǵan jaǵdayda, insan faktorısız qayta esap-sanaq etiw, jetkerilgen zıyan muǵdarın anıqlaw hám Salıq komitetiniń bazasında parallel túrde esapqa alıwdı názerde tutıwshı programmalıq támiynattı islep shıqsın hám ámeliyatqa engizsin.
«Óztransgaz» AJ, «Aymaqlıq elektr tarmaqları» AJ, «Aymaqgaztámiynat» AJ, «UzGazTrade» AJ, «Íssılıq elektr stanciyaları» AJ, «Ózbekstan milliy elektr tarmaqları» AJ, «Ózbekneftgaz» AJ, «Ózbekgidroenergo» AJ usı programmalıq támiynattı islep shıǵıwda tutınıwshılar bazasın qáliplestiriw sonday-aq, billing sistemaları menen integraciyasın támiyinlew maqsetinde «UZINFOCOM» mámleketlik málimleme sistemaların jaratıw hám qollap-quwatlaw boyınsha birden-bir integrator» JShJǵa barlıq baslanǵısh maǵlıwmatlardı bersin hám billing sistemaları menen baylanısıwǵa ruqsat berilsin.
- Qurılıs hám turaq jay kommunallıq xojalıǵı ministrligi Energetika ministrligi menen birgelikte 2023-jıl 1-iyunǵa shekem:
imarat hám obektler sonday-aq, olardan paydalanıw túrlerine bola qolaylı energiya, tábiyǵıy gaz, elektr energiyası, irrigaciya, ishimlik suw hám aqaba suwlar jumsalıwınıń standart kólemlerin qatań belgileytuǵın normalardı sistemaǵa engizsin;
obektlerdiń sırtqı injenerlik-kommunikaciya tarmaqlarına jalǵanıwın texnikalıq shártlerdi sanlastırılǵan halda «Shaffof qurilish» milliy málimleme sisteması arqalı ámelge asırsın.
- Energetika ministrligi energetika tarmaqlarınıń házirgi jaǵdayı hám dáwirlik júklemelerin sanlastırǵan halda olardıń «Shaffof qurilish» milliy sistemasına integraciyasın támiyinlesin hám hár ayda maǵlıwmatlar bazasın jańalap barsın.
- Ózenergoinspekciya 2023-jıl 1-mayǵa shekem janılǵı-energiya resurslarınan nızamsız hám nátiyjesiz paydalanıw jaǵdayların anıqlaw sonday-aq, olardı onlayn rásmiylestiriw ushın barlıq xızmetkerlerdi arnawlı planshetler menen támiyinlesin.
- Energetika ministrligi Bas prokuratura menen birgelikte bir ay múddette elektr energiyası hám tábiyǵıy gazden paydalanıw qaǵıydaların sın kózqarastan qayta kórip shıǵıp, jańalanǵan qaǵıydalardı tastıyıqlaw ushın Ministrler Kabinetine usınıs kirgizsin.
- Ministrler Kabineti bir ay múddette Ózenergoinspekciya haqqındaǵı rejeni tastıyıqlasın.
- Energetika ministrligi mápdar ministrlikler hám uyımlar menen birgelikte eki ay múddette nızamshılıqqa usı qarardan kelip shıǵatuǵın ózgerisler hám qosımshalar haqqında Ministler Kabinetine usınıslar kirgizsin.
- Usı qarardıń orınlanıwın nátiyjeli shólkemlestiriwge juwapker hám jeke juwapker etip energetika ministri J.T.Mirzamahmudov hám Bas prokurordıń orınbasarı belgilensin.
Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikası Bas ministri A.N.Aripovqa hám Ózbekstan Respublikası Bas prokurorı N.T.Ywldoshevqa júklensin.
Ózbekstan Respublikası Prezidenti Sh.MIRZIYoEV
