Joqarǵı Keńes janındaǵı Sociallıq sheriklik boyınsha jámiyetlik komissiyanıń májilisi bolıp ótti

Qaraqalpaqstan Respublikası Joqarǵı Keńesiniń májilisler zalında Joqarǵı Keńes janındaǵı Sociallıq sheriklik boyınsha jámiyetlik komissiyanıń májilisi bolıp ótti. Májilisti Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵı, Sociallıq sheriklik boyınsha jámiyetlik komissiyanıń baslıǵı D.Qurbaniyazov ashtı hám alıp bardı.

  Májilis kún tártibinde “Mámleketlik subsidiyalardı ajıratıwdıń tártibi hám shártleri haqqında”ǵı Rejeni tastıyıqlaw, sonday-aq, mámleketlik grant hám sociallıq buyırtpalardı ajıratıwda Reje talaplarına ózgeris hám qosımshalar kirgiziw, Jámiyetlik fond tárepinen ajıratılǵan grant joybarlarınan juwmaqlanǵan joybarlar boyınsha ótkerilgen juwmaqlawshı monitoring hám qadaǵalawı, Joqarǵı Keńes janındaǵı Jámiyetlik fondın 2022-jıl juwmaǵı boyınsha finans-xojalıq xızmetin sırtqı auditorlıq tekseriwden ótkeriw, 2023-jıl ushın Joqarǵı Keńes janındaǵı Jámiyetlik fondına mámleketlik grant hám mámleketlik sociallıq buyırtpa qarjıları, sonday-aq, Mayıplar jámiyeti, Mayıplar associaciyası, Kózi ázziler jámiyeti hámde Gereńler jámiyetlerine mámleketlik subsidiya qarjıların ajıratıw máseleleri qarap shıǵıldı.  

Kún tártibindegi máseleler boyınsha komissiya aǵzaları ózleriniń pikir hám usınısların bildirdi.  

Qaraqalpaqstan Respublikası Joqarǵı Keńesiniń Málimleme xızmeti