Nókis rayonı aymaǵında awıl xojalıǵı ónimlerin eksportqa baǵdarlaw menen shuǵıllanıwshı jańa joybar iske túsirildi

Bugin Nókis rayonı Qrantaw awıl puqaralar jıyını, Shortanbay xalıq jasaw punktinde jaylasqan “BIOGUMUS” fermer xojalıǵı tárepinen ámelge asırılıp atırǵan “Quyashta qurǵatılǵan ekologiyalıq taza (organikalıq) pomidordı qayta islewdi keńeytiw hám modernizaciyalaw” startap joybarınıń ashılıw máresimi bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, jańa joybardıń aldaǵı jumıslarında tabıslar tiledi.

  Atap ótiw kerek, kárxanaǵa Ózbekstan Respublikası Prezidentiniń 2022-jıl 6-iyuldaǵı “2022-2026-jıllarda Ózbekstan Respublikasınıń innovacialıq rawajlandırıw strategiyasın ámelge asırıw boyınsha shólkemlestiriw is-ilajları haqqındaǵı” PQ-307-sanlı qararına muwapıq,  Qaraqalpaqstan Respublikası Innovacialıq rawajlandırıw basqarması tárepinen 1mlrd 100 mln sum qarjı hám isbilermenniń óz qarjıları ajıratılıp, jańa joybar jumısı jolǵa qoyıldı.

  Aytıp ótiw orınlı, búgingi kúnde joybar sheńberinde jańa imarat qurıp pitkerilgen bolıp, 124 mıń AQSh dolları muǵdarında kúnine 30 mıń dana qadaqlaw quwatlılıǵına iye joqarı texnologiyalı hám energiya tejewshi ásbap-úskeneler alıp kelindi. Sonday-aq, joybar sheńberinde 20 turaqlı hám 70 máwsimlik jumıs orınları jaratıldı. Kárxanada qurǵatılǵan miywe-palız ónimleri, ǵoza, badam sıyaqlı bir qatar miywelerdi qadaqlaw hámde eksportqa baǵdarlaw rejelestirilgen. Sonday-aq, kárxana imaratında jaylasqan 300 hám 70 tonnaǵa mólsherlengen muzlatqıshta miywe-palız hám baw-baqsha ónimlerin saqlaw imkaniyatı jaratılǵan. Jergilikli ónim jetistiriw menen shuǵıllanıwshı fermer hám dıyqan xojalıqları usı orında óz ónimlerin saqlaw hám eksportqa baǵdarlaw imkaniyatına iye boladı. Házirgi waqıtta 10 túrli ónim Qıtay, Franciya, Izrayl hám Yaponiya mámleketlerine eksportqa shıǵarılıw aldında tur.

 

Qaraqalpaqstan Respublikası Joqarǵı Keńesiniń Málimleme xızmeti