Ayırım mekteplerde oqıwshılarǵa sapasız azıq-awqat ónimleri berilip atırǵanlıǵı anıqlandı

Ózbekstan Respblikası Ministrler Kabinetiniń 2022-jıl 25-avgust kúngi «Qaraqalpaqstan Respublikası hám Xorezm walayatında jaylasqan ulıwma orta bilim beriw mákemelerinde salamat awqatlandırıw sistemasın ele de jetilistiriw is-ilajları haqqında»ǵı 472-sanlı qararı talaplarınıń orınlanıwı hám balalardıń sapalı  azıq-awqatlıq zatlar menen támiyinleniwin qadaǵalaw boyınsha Joqarǵı Keńes Baslıǵınıń tapsırması menen Kegeyli rayonında jaylasqan Xalıq bilimlendiriw bólimine qaraslı  1-8-19- hám 55-sanlı ulıwma orta bilim beriw mekteplerinde Sanitariya epidemiologiya basqarması xızmetkerleri tárepinen alıp barılǵan úyreniw jumısları nátiyjesinde bir qansha qopal qáte-kemshilikler anıqlandı. Atap aytqanda, balalarǵa berilip atırǵan azıq-awqat ónimleri belgilengen normadan az muǵdarda, sonday-aq, ishimlik suwı menen támiyinlenbegen hámde ıssı chay menen támiyinlew ushın úskeneler tolıq ornatılmaǵan. Eń ashınarlısı azıq-awqat ɵnimleriniń sapası úyrenilgende, alma miywesi tutınıwǵa jaramsız (shirik) jaǵdayda, sonıń menen birge, qadaqlanǵan ónimler zıyankesler menen pataslanǵan. Bunnan tısqarı, bul azıq-awqat ónimleri arnawlı avtotransportlarda emes, jolawshı tasıwshı transportlar arqalı jetkerip berilmekte. Sonıń menen birge ayırım mekteplerde hár kúnlik azıq-awqat ónimleriniń sapasın qadaǵalap alıwshı komissiya quramı dúzilmegen. Búgingi kúnde anıqlanǵan kemshiliklerdi saplastırıw hám juwapkerlerge shara kóriw boyınsha qadaǵalawshı uyımlar tárepinen tiyisli tártipte jumıslar alıp barılmaqta. Sonıda ayrıqsha atap ótiw orınlı, balalardı awqatlandırıw talaplarınıń orınlanıwı boyınsha respublikadaǵı barlıq mekteplerde úyreniw jumısları alıp barıladı hám biypárwa bolǵan mektep direktorları menen juwapkerlerge qatań jaza shara kóriledi.  

Qaraqalpaqstan Respublikası Joqarǵı Keńesiniń Málimleme xızmeti