Bir bas malı bolmasa da sharwashılıq xojalıǵı sıpatında dizimnen ótip, mámleket jerinen maqsetsiz paydalanıp kelgenler anıqlandı
873
Qaraqalpaqstan Respublikası Joqarǵı Keńesiniń Baslıǵı Amanbay Orınbaev azıq-awqat qáwipsizligin támiyinlew baǵdarında alıp barılıp atırǵan ilajlar hám tarawdaǵı mashqalalar boyınsha ótkergen selektor májilisinde búgingi kúnde azıq-awqat qáwipsizligin támiyinlewde sharwashılıqtı ele de rawajlandırıw arqalı xalıqtıń gósh, sút, máyek, balıq hám tawıq góshi ónimlerine bolǵan talabın tolıq támiyinlew eń áhmiyetli wazıypalarımızdan ekenligin atap ótip, bul baǵdardaǵı jumıslardı atqarıwda ayırım juwapkerler tárepinen jol qoyılıp atırǵan qopal qáte-kemshiliklerge toqtaldı.
Sonnan, úyreniwler nátiyjesinde anıqlanǵan, respublikamız aymaǵındaǵı 59 sharwashılıqqa qánigelestirilgen fermer xojalıqlarında búgingi kúnde 1 bas malı bolmasa da is júrgizip kiyatırǵanlıǵı tilge alındı.
Atap aytqanda Taxtakópirde 11 xojalıq;
- Bozatawda 9 xojalıq;
- Tórtkúlde 9 xojalıq;
- Ámiwdáryada 8 xojalıq;
- Taqıyatasta 6 xojalıq;
- Qońıratta 4 xojalıq;
- Beruniyde 3 xojalıq;
- Xojelide 2 xojalıq;
- Shomanayda 2 xojalıq;
- Qanlıkólde 2 xojalıq;
- Kegeylide 2 xojalıqta birde bir malı joq bolsa da ámelde sharwashılıqqa qánigelesken fermer xojalıǵı sıpatında dizimnen ótip, búgingi kúnde egislik hám jaylaw maydanlarınan maqsetsiz paydalanıp kelmekte.
Házirgi waqıtta usı maqsetsiz paydalanıp kelingen jer maydanlarınan aqılǵa uǵras paydalanıwdı qayta jolǵa qoyıw boyınsha tiyisli wákillikli uyımlarǵa anıq tapsırma hám múddet belgilep berildi.
Qaraqalpaqstan Respublikası Joqarǵı Keńesiniń Málimleme xızmeti