Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaevtiń tapsırması menen Nókis rayonı aymaǵındaǵı kóp qabatlı turaq jaylardıń átiraplarınıń tazalıǵı, orınlardıń abadanlastırıw jaǵdayları úyrenip shıǵılǵan edi.

Aytıp ótiw orınlı, barlıq orınlarda da bul baǵdardaǵı jumıslar qanaatlandırarlı dárejede emes. Yaǵnıy, kóp qabatlı turaq-jaylardıń átirapları abadanlastırılmaǵan, bularǵa bekitilgen shıǵındılar menen islesiwshi kárxanalar, shirket xojalıqları hám basqa da juwapkerler tárepinen tiyisli jumıslar ámelge asırılmaǵan. Nátiyjede, sanitar-gigienalıq talaplar buzılıp, keleshegimiz iyeleri bolǵan balalar oynaytuǵın maydanshalar, úy aldıları shıǵındılarǵa tolǵan. Eń ashınarlısı, bul unamsız jaǵdayǵa birde bir basshı, birde bir juwapker, hátteki usı aymaqlarda jasawshı puqaralar da itibar qaratpaǵan.

  Ayırım aymaqlarda shıǵındı taslaw orınları bola tura, ádeyi ashıq orınlarǵa shıǵındı taslap ketiw jaǵdayları da ushırastı.  «Aqmańǵıt» posyolkalıq puqaralar jıyınında 22 kóp qabatlı turaq-jaylar bar bolıp, bul turaq-jaylarda 364 xojalıq jasaydı. Kóp qabatlı turaq-jaylardıń átirapında jıynalǵan shıǵındılardı alıp ketiwge Nókis rayonı «Taza xudud» mámleketlik unitar kárxanası xızmet etip kelmekte. Tilekke qarsı bul kóp qabatlı turaq jay átirapları oǵada ashınarlı jaǵdayda. Basqa orındı aytpayaq Nókis rayonı hákimligi átirapları da shıǵındılar, túrli ot-shópler menen tolıp, rayonda abadanlastırıw jumıslarına itibardıń qanday dárejede ekenligin kórsetip turıptı.  Tazalıqqa itibar qaratıw, úy aldıların, átirap-aymaqların azada saqlaw ásirler dawamında xalqımızdıń kúndelikli turmısı menen sıbaylas búgingi kúnge shekem jetip kelgen. Biraq, xázirgi waqıtta ayırım puqaralar ózleriniń úy aldılarına da itibar qaratpay, ya bir túp terek ekpey, ya shıǵındıların tazalamay kóshe mádeniyatı, sanitar-gigiena talapların buzıp atırǵanlıǵı da sır emes. Bul tek ǵana jeke puqaralarǵa tiyisli degennen awlaqpız. Ayırım, mákeme-shólkemler, isbilermenlik subektleri, kafe, restoran, dúkan hám basqa da usı sıyaqlı bir qatar orınlarda imarat aldıları qarawsız qalıp, óz halına taslap qoyılǵan.  Házirgi waqıtta mámleketimizde máhálle hám aymaqlardı abat etiw boyınsha qanshama jumıslar ámelge asırılıp atır. Usı iygilikli jumıslarǵa hár bir puqara hár bir isbilermen, hár bir mákeme-shólkem birgelikte ayaq qossa maqsetke muwapıq bolar edi. «Abatlıq kewilden baslanadı» degenindey, kewlimiz abatlıǵı átirap-aymaǵımızda da óz sáwlesin tapsa nur ústine nur boladı.

Qaraqalpaqstan Respublikası Joqarǵı Keńesiniń Málimleme xızmeti