Joqarǵı Keńes Baslıǵı bir qatar belsendi student jaslar menen ushırastı

Búgingi kúnde elimizde jaslardı ozıq oylı, joqarı bilimli, fizikalıq jaqtan shınıqqan hám ruwxıy bay insan etip tárbiyalaw, olardıń qábiletlerin júzege shıǵarıw ushın zárúr sharayatlar jaratıw boyınsha bir qatar ilajlar ámelge asırılıp kelinbekte. Jaslarǵa itibar mámleketlik siyasat dárejesine kóterilip, barlıq baǵdarlarda olar hár tárepleme qollap-quwatlanıp atır. Qaraqalpaqstan Respublikası Joqarǵı Keńesiniń Baslıǵı Amanbay Orınbaev búgin óz teńlesleri arasında ayrıqsha qábileti menen kózge túsken bir qatar belsendi jaslar menen ushırastı. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.  

  Ótkerilgen ushırasıwda Joqarǵı Keńes Baslıǵı búgingi kúnde jaslarǵa jaratılıp berilip atırǵan imkaniyatlar hám húrmetli Prezidentimizdiń ayrıqsha itibarı joqarı ekenligin atap ótti.

  Bolıp ótken ushırasıw dawamında mámleketlik stipendiyalar jeńimpazları hám “Universiada-2022” sport jarıslarınıń jeńimpazlarına bahalı sawǵalar tapsırıldı.

  Aytıp ótiw orınlı, bıyılǵı jılı 84 student mámleketlik stipendiya iyesi bolıw baxtına miyasar boldı. Atap aytqanda: - 6 student  – Prezident stipendiyası, - 8 student – Islam Karimov atındaǵı stipendiyası, - 15 student – Nawayı atındaǵı stipendiyası, - 6 student – Beruniy atındaǵı stipendiyası, - 2 student – Ulıǵbek atındaǵı stipendiyası, - 8 student – Ibrayım Yusupov atındaǵı stipendiyası, - 6 student – Tólepbergen Qayıpbergenov atındaǵı stipendiyası, - 33 student basqa da stipendiyalar iyesi boldı.  

  Joqarı oqıw orınları student jasları arasında turaqlı túrde ótkerilip kiyatırǵan “Universiada-2022” sport jarıslarınıń final basqıshına Qaraqalpaqstan Respublikasındaǵı joqarı oqıw orınlarınan 8 komanda qatnasıp, ulıwmalıq esapta sporttıń basketbol túri boyınsha er balalar boyınsha saylandı komanda hám qız balalar arasınan tańlap alınǵan komandalar sıylı 1-orındı, sporttıń gandbol túri boyınsha er balalar komandası 2-orındı iyeledi. Sonday-aq, sporttıń dzyudo túri boyınsha Qaraqalpaqstannan 17 sportshı jarıstıń final basqıshına qatnasıp, jarıs juwmaǵında Ózbekstan mámleketlik dene tárbiya hám sport universiteti Nókis filialınıń 3-kurs student jasları E.Sarsenbaev hám Z.Zaytov 90 kg. salmaqta altın medaldı qolǵa kirgizdi. Ótkerilgen ushırasıw dawamında student jaslar menen jaqınnan sáwbetlesilip, olardıń pikir hám usınısları tıńlandı. Joqarǵı Keńes Baslıǵı mámleketimiz olardı hár dayım qollap-quwatlawǵa tayar ekenligin bildirdi.

 

Qaraqalpaqstan Respublikası Joqarǵı Keńesiniń Málimleme xızmeti