Ózbekstan Respublikası Prezidentiniń pármanı
2022-2026-jıllarǵa mólsherlengen Jańa Ózbekstannıń rawajlanıw strategiyası hám Ózbekstan Respublikası Prezidentiniń Oliy Majlis hám Ózbekstan xalqına Múrájatında belgilengen wazıypalarǵa muwapıq xalıqtıń turmıs dárejesin bunnan bılay da arttırıw, bilimlendiriwdiń sapasın aldınǵı xalıqaralıq standartlarǵa muwapıqlastırıw, turaqlı ekonomikalıq ósiwge erisiw hám kámbaǵallıqtı qısqartıw baǵdarındaǵı reformalarımızdı jańa basqıshqa alıp shıǵıw maqsetinde:
- Jámiyetshiligimiz hám xalqımız benen keń dodalawlarda bildirilgen usınıslar tiykarında islep shıǵılǵan 2022-2026-jıllarǵa mólsherlengen Jańa Ózbekstannıń rawajlanıw strategiyasın «Insanǵa itibar hám sapalı bilimlendiriw jılı»nda ámelge asırıwǵa baylanıslı mámleketlik baǵdarlama (keyingi orınlarda – Mámleketlik baǵdarlama) qosımshaǵa muwapıq tastıyıqlansın.
Ministrler Kabineti, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Mámleketlik baǵdarlamanıń orınlanıwın nátiyjeli, bekkem tártip-intizam tiykarında shólkemlestirip,
10 kún múddette hár bir rayon, qala hám máhálle kesiminde ámeliy ilajlardı belgilesin hám
keń jámiyetshilik hám ǵalaba xabar qurallarınıń qatnasıwında turaqlı túrde juwapker shaxslardıń esabatın tıńlap barsın.
Oliy Majlis palataları hám jergilikli Keńeslerge Mámleketlik baǵdarlamanıń orınlanıwın rayonlar, qalalar hám máhállelerge barıp úyreniw, juwapker mámleketlik uyımlar basshılarınıń esabatların tıńlap barıw usınıs etilsin.
- Xalqımızdıń awırın jeńil etiw, xalıq ushın qosımsha qolaylıqlar jaratıw hám olardıń qárejetlerin únemlew maqsetinde, 2023-jıl 1-iyulden baslap:
a) barlıq mámleketlik uyımlar hám shólkemlerde
«Xalıq hám isbilermenlerge servis sapasın arttırıw» ilajları belgilensin.
Ministrler hám basqa da ǵárezsiz atqarıw hákimiyatı uyımlarınıń basshıları
15 kún múddette óz sistemasında
aralıqtan turıp, sonıń ishinde,
mobil qosımshalar arqalı kórsetiletuǵın mámleketlik xızmetlerdi kóbeytiw, óndiriletuǵın
tólemlerdiń muǵdarın kemeytiw, talap etiletuǵın
artıqsha hújjetlerdi biykarlaw, kórip shıǵıw
processleri hám
múddetlerin keskin qısqartıw, ashıq-aydınlıqtı arttırıw,
xalıq hám isbilermenler menen turaqlı sóylesiw maydanshaların shólkemlestiriw, xızmetkerlerdiń
qarım-qatnas mádeniyatın arttırıw, jedel hám
sapalı xızmet kórsetiwge oqıtıw boyınsha ilajlar baǵdarlamasın tastıyıqlap,
xalıq hám
isbilermenlerge járiyalansın;
b)
mámleketlik xızmetler orayları arqalı kórsetiletuǵın mámleketlik xızmetler sanı
300 ge, Birden-bir interaktiv mámleketlik xızmetler portalı arqalı kórsetiletuǵın xızmetler sanı bolsa
570 ke jetkerilsin;
v)
xalıqtıń sociallıq qorǵawǵa mútáj qatlamları (mayıplıǵı bolǵan shaxslar, awır nawqaslar, kekseler hám basqalar)na migraciya hám puqaralıqtı rásmiylestiriw tarawındaǵı mámleketlik xızmetlerdi turaqlı jasaw yamasa waqtınsha turǵan ornına shıǵıw arqalı kórsetilgen xızmet ushın
qosımsha tólem óndirilmegen halda kórsetiw jolǵa qoyılsın;
g) elektr, gaz hám suw jumsalıw esaplaǵıshların standartlastırıwdan ótkeriw boyınsha mámleketlik xızmetlerdi
proaktiv tárizde kórsetiw (puqara múrájatın kútpesten, xızmet kórsetiwshi shólkemniń óz baslaması menen) usınısın jiberiw jolǵa qoyılsın.
- 2023-jıl 1-sentyabrden baslap xalıq hám isbilermenlik subektlerine subsidiya ajıratıwǵa baylanıslı barlıq xızmetler basqıshpa-basqısh «Xalıq hám isbilermenlik subektlerine subsidiya ajıratıwdıń birden-bir elektron platforma»sına ótkerilsin hám subsidiyalardı ajıratıwdıń maqsetke muwapıqlıǵın elektron platforma arqalı onlayn tekseriw sisteması jolǵa qoyılsın.
Onda, subsidiyalar ajıratıw haqqındaǵı arzalardı
Birden-bir interaktiv mámleketlik xızmetler portalı arqalı yamasa
qálegen rayon (qala)lıq mámleketlik xızmetler orayları arqalı tapsırıw imkaniyatın jaratıw hám
artıqsha byurokratiyalıq tosqınlıqlar hám
basqa da korrupciyalıq faktorlardı saplastırıw támiyinlensin.
- Puqaralardıń pensiya támiynatın jaqsılaw hám pensionerlerdi qollap-quwatlaw maqsetinde, 2024-jıl 1-yanvardan baslap pensionerge esaplanǵan, biraq óz waqtında alınbaǵan pensiyanı tólew múddeti 12 aydan 24 ayǵa sozılsın.
- Mayıplıqtı belgilewde puqaralarǵa qosımsha jeńillikler jaratıw maqsetinde:
a)
2023-jıl 1-aprelden baslap mayıplıq uyımlararalıq elektron maǵlıwmatlar almasıwı tiykarında
mayıplıq belgileri anıq kórinip turǵan, anatomiyalıq nuqsanları bolǵan, sonday-aq,
úmitsiz klinikalıq prognozǵa iye kesellikler hám
belgilerde puqaralardıń qatnasıwısız belgilenedi;
b) Kámbaǵallıqtı qısqartıw hám bántlik ministrligi (B.Musaev)
2023-jıl 1-aprelge shekem mayıplıqtı belgilewdiń
sociallıq modeline basqıshpa-basqısh ótiw koncepciyası joybarın kirgizsin, onda:
puqaralardıń
miynet qábiletin joyıtqanlıq dárejesinen kelip shıǵıp mayıplıqtı belgilew
ámeliyatınan waz keship, onıń ornına jáhán standartları tiykarında mayıplıqtı belgilewge hám mayıplıǵı bolǵan shaxslardıń turmısqa
sociallıq beyimlesiwi jáne olardıń
densawlıǵın qayta tiklewge;
mayıplıǵı bolǵan shaxslar ushın
qolaylı formatlardaǵı málimleme texnologiyalarınan, ımlaw-ishara tilinen hám sóylesiwdiń basqa da alternativ túrlerinen paydalanıw imkaniyatların jaratıwǵa itibar qaratılsın.
- «Jańa Ózbekstan» massivlerin rawajlandırıw hám xalıqtıń turaq jayǵa bolǵan talabın qanaatlandırıw maqsetinde 2023-jılı:
«Jańa Ózbekstan» massivleri hám
161 basqa da massivlerde, sonıń ishinde,
jeke menshik jumıstı bólip alıp islew shólkemleri tárepinen
jańa turaq jaylar qurıwdıń jıllıq kólemleri
1,6 esege arttırılıp,
90 mıńǵa jetkerilsin. Onda,
turaq jay hám sociallıq jáne sawda obektlerin joybarlaw hám
qurıwda avtotransport qurallarınıń turatuǵın orınları, sonıń ishinde,
kóp qabatlı hám
jerastı avtomobil turatuǵın orınlar májbúriy túrde qurılıwı támiyinlensin;
32 mıń puqaraǵa bazar principlerine tiykarlanǵan ipoteka kreditleri, sonday-aq,
11 mıń puqaraǵa
baslanǵısh tólem hám
procent tólemleriniń bir bólegin qaplawǵa subsidiyalar ajıratıw ushın Mámleketlik byudjetten jeterli qarjılar qaratılsın;
xalıqtı bazar principleri tiykarında ipoteka kreditleri arqalı
turaq jay menen támiyinlewdiń jańa tártibi sheńberinde
múlk huqıqı tiykarında turaq jayǵa iye bolmaǵan puqaralar ushın
Tashkent wálayatında tájiriybe-sınaq tárizinde «Meniń birinshi úyim» baǵdarlaması islep shıǵılıp, ámelge asırılsın;
xalıqaralıq hám jergilikli fond birjalarında
«Ózbekstan ipotekanı qayta qarjılandırıw kompaniyası» AJnıń ipoteka obligaciyalıran shıǵarıw hám jaylastırıw ushın kompaniyanıń
ustav fondı 100 million AQSh dolları ekvivalentine jetkerilsin. Onda, ipoteka obligaciyaların jaylastırıw esabınan tartılǵan qarjılar
ipoteka kreditleri ushın resurs sıpatında banklerge jaylastırılsın.
- Baslamalı byudjet ámeliyatın hám máhállelerdiń finanslıq erkinligin keńeytiw maqsetinde:
2023-jılı jámiyetshilik pikiri tiykarında qáliplestiriletuǵın joybarlardı qarjılandırıw ushın Mámleketlik byudjetten
8 trillion sum, sonnan, «Abat awıl» hám «Abat máhálle» baǵdarlamaları ushın
4 trillion sum qaratılsın;
2023-jılı máhálleler infrastrukturasın rawajlandırıw boyınsha joybarlar baǵdarlamaları sheńberinde ámelge asırılatuǵın ilajlardı qarjılandırıw ushın Mámleketlik byudjetten
4 trillion sum ajıratılsın.
Ekonomika hám qarjı ministrligi (Sh.Kudbiev)
úsh ay múddette joybarlardı jámiyetshilik pikiri hám «Ashıq byudjet» portalında toplanǵan dawıslar tiykarında qarjılandırıwdıń nátiyjeli sistemasın jaratsın hám ámeliyatqa kirgizsin.
Onda, dawıs beriw processlerin
qalıs hám hákimshilik aralasıwlarsız shólkemlestiriwdiń anıq mexanizmlerin engiziwge ayrıqsha itibar qaratılsın.
- Bilimlendiriwdiń sapasın arttırıw, tarawdı aldınǵı sırt el tájiriybesi tiykarında reformalaw maqsetinde:
a)
2023-jıl 1-sentyabrden baslap hár bir rayon (qala)nıń birewden ulıwma orta bilimlendiriw mákemesinde oqıwshılardı
eki shet tili hám bir kásip ónerge úyretiw ámeliyatı basqıshpa-basqısh jolǵa qoyılsın;
b)
2023-2024-oqıw jılınan baslap basqıshpa-basqısh ulıwma orta bilim beriw mákemelerinde oqıwshılardı ulıwmainsanıylıq hám milliy qádiriyatlar, watansúyiwshilik ruwxında tárbiyalaw, sonday-aq, olarda kommunikativlik kónlikpeler, sın kózqarastan hám kreativ pikirlew, topar bolıp islew, izertlew sıyaqlı kónlikpelerdi qáliplestiriwge qaratılǵan
bilimlendiriw baǵdarlamaları ámeliyatqa kirgizilsin.
Onda:
ulıwma orta bilim beriw mákemeleriniń
1-4 klasslarında oqıwshılardı aldınǵı sırt el tájiriybesi tiykarında islep shıǵılǵan
sabaqlıqlar boyınsha oqıtıw;
5-9-klasslarda oqıwshılarǵa ulıwma bilimlendiriw pánlerinen
tayanısh bilimler beriw;
10-11 klass oqıwshılarınıń
qızıǵıwshılıq hám qábiletine sáykes bolǵan qánigelesken baǵdarlamalar tiykarında bilim beriw ámeliyatı engizilsin;
v)
2023-2024-oqıw jılınan baslap respublikanıń barlıq wálayatları hám Tashkent qalasında
baslawısh klass oqıwshıların biypul awqat penen támiyinlew jolǵa qoyılsın.
Onda, awqat túrleri
oqıwshılardıń jası hám
densawlıǵınıń jaǵdayına bola normativlik jaǵdayda jetkerip beriliwi hám
sanitariya talaplarına juwap beriwi támiyinlensin;
g)
2023-jıl 1-aprelden baslap mektepke shekemgi bilimlendiriwdiń qamtıp alıwın keńeytiw maqsetinde:
jańa mektepke shekemgi bilimlendiriw shólkemleriniń jumısın
kóp kvartiralı turaq jaylardıń turaq jay emes qabatlarında yamasa
jeke tártipte qurılǵan turaq jaylardı satıp alıw hám keyin ala olardı ońlaw jáne úskenelew arqalı shólkemlestiriwge kelisim berilsin;
mámleketlik-jeke menshik sheriklik joybarı sheńberinde ijaraǵa berilgen jer uchastkasında mámleketlik emes mektepke shekemgi bilimlendiriw shólkeminiń imaratın qurǵan jeke menshik sherik tárepinen bul imarattıń usı joybar ushın
bank kreditleri boyınsha girewge qoyılıwına baylanıslı sheklewler biykar etilsin;
d) professional bilimlendiriw sistemasın rawajlandırıw, miynet bazarı hám jumıs beriwshilerdiń talaplarına sáykes bolǵan maman orta buwın kadrlardı tayarlaw maqsetinde:
2023-2024-oqıw jılınan baslap
mámleketlik grantlar kolledj hám texnikumlardıń
dual bilimlendiriw forması boyınsha da ajıratılsın;
2023-jıl 1-sentyabrge shekem Qaraqalpaqstan Respublikası, wálayatlar hám Tashkent qalasında maman sırt el ekspertlerin tartqan halda
Evropa kásiplik bilimlendiriw hám kásipke oqıtıw sapasın támiyinlew sistemasınıń talaplarına tolıq juwap beretuǵın
birewden úlgi professional bilimlendiriw mákemeleriniń jumısı jolǵa qoyılsın;
e)
2023-jıl 1-aprelden baslap:
professional bilimlendiriw mákemesi
pedagoglarınıń bazalıq tarif stavkaları sáykes túrde ulıwma orta bilim beriw mákemesi pedagoglarınıń bazalıq tarif stavkalarına;
professional bilimlendiriw mákemesi birinshi hám ekinshi mamanlıq kategoriyasına iye bolǵan, mamanlıq kategoriyasına iye bolmaǵan joqarı maǵlıwmatlı hám joqarı maǵlıwmatqa iye bolmaǵan
óndirislik tálim ustalarınıń bazalıq tarif stavkaları tiyislisinshe ulıwma orta bilim beriw mákemesi birinshi hám ekinshi mamanlıq kategoriyalı muǵallimi, joqarı maǵlıwmatlı muǵallimi hám orta arnawlı maǵlıwmatlı muǵalliminiń
bazalıq tarif stavkalarına teńlestirilsin.
- Xalıqqa baslanǵısh medicinalıq xızmetlerdi jaqınlastırıw hám puqaralardı sapalı medicinalıq xızmetler menen támiyinlew, keselliklerdi erte basqıshta anıqlaw, sonday-aq, nawqaslarǵa qosımsha qolaylıqlar jaratıw maqsetinde:
a) Densawlıqtı saqlaw ministrligi (A.Inoyatov):
2023-jılı
30 shańaraqlıq poliklinika,
110 shańaraqlıq shıpakerlik punkti hám
520 ǵa shekem ıqsham máhálle medicinalıq punktlerin shólkemlestiriw;
18-40 jastaǵı
12,6 million xalıqtı profilaktikalıq tekseriwden ótkeriw, 40 jas hám onnan úlken jastaǵı sozılmalı keselligi bolmaǵan
6,3 million xalıqtı júrek qan-tamır kesellikleri hám qantlı diabet,
3 million xalıqtı onkologiyalıq keselliklerdi erte anıqlaw boyınsha skrining tekseriwlerinen ótkeriw;
spinal bulshıq atrofiyası menen kesellengen
112 balanı dári quralları menen támiyinlew;
250 den artıq ázzi esitiwshi balada koxlear implantaciya operaciyaların ótkeriw, sonday-aq, bunday operaciyalar ótkerilgen
132 balada sóylew processorların almastırıw ilajların kórsin;
b)
waqtınsha miynetke jaramsızlıq betleri hám basqa da medicinalıq maǵlıwmatlanamalardı beriw basqıshpa-basqısh
elektron túrge ótkerilsin.
Onda:
waqtınsha miynetke jaramsızlıq betleri hám basqa da medicinalıq maǵlıwmatnamalardı beriw Nawayı hám Sırdárya wálayatlarında –
2023-jıl 1-iyulden baslap, Tashkent qalası, Tashkent hám Samarqand wálayatlarında –
2023-jıl 1-oktyabrden baslap, respublikanıń basqa da aymaqlarında –
2024-jıl 1-yanvardan baslap elektron túrge ótkerilsin.
2024-jıl 1-yanvardan baslap waqtınsha miynetke jaramsızlıq betleri hám basqa da medicinalıq maǵlıwmatnamalardı
qaǵaz túrinde talap etiw qadaǵan etilsin;
v)
2023-jıl 1-iyulden baslap Tashkent qalasında basqıshpa-basqısh
mámleketlik medicinalıq qamsızlandırıw mexanizmleri engizilsin;
g)
2023-jıldıń aqırına shekem mayıplıǵı bolǵan shaxslardı
ambulator hám stacionar sharayatta biypul medicinalıq-sociallıq reabilitaciya ilajları menen qamtıp alıw kólemi
30 mıńǵa jetkerilsin.
- Xalıq arasında juqpalı bolmaǵan keselliklerdiń aldın alıw, salamat turmıs tárizin qáliplestiriw hám fizikalıq aktivlik dárejesin arttırıw maqsetinde tómendegilerdi názerde tutıwshı «Durıs awqatlanıw salamat turmıs tárizi» ulıwma milliy háreketi jolǵa qoyılsın:
xalıqqa
smartfon hám mobil qosımshalar járdeminde óziniń salamatlıǵı hám awqatlanıwın qadaǵalawdı úyretiw, durıs awqatlanıw boyınsha mobil qosımsha jaratıw;
balalarǵa mólsherlengen jaramsız azıq-awqat ónimleri hám ishimlikler, balalar azıq-awqat ónimleri hám energetikler, dári quralları, biologiyalıq aktiv elementler
reklamasına talap hám sheklewlerdi kúsheytiw;
bilimlendiriw mákemelerinde balalar hám jaslar ushın
usınıs etilmeytuǵın ónimler, sonıń ishinde, quramında qumsheker, duz, transmaylar muǵdarı joqarı bolǵan azıq-awqat ónimleri, dám hám reń beriwshi qosımshalar dizimin tastıyıqlaw hám olardıń tutınıwın azaytıw;
jergilikli ónimler túrlerinen kelip shıǵıp, xalıqtıń hár bir qáwip toparı hám kesellik túrleri ushın óz- aldına
salamat awqatlanıwǵa qaratılǵan usınıslardı islep shıǵıw;
jası, dene dúzilisi, turmıs tárizi hám keselliklerge beyimliginen kelip shıǵıp, balalar, úlken jastaǵılar hám kekseler ushın qısqa
durıs awqatlanıw boyınsha usınıslar, salamatlandırıw shınıǵıwları hám gigiena qaǵıydaları toplamın jaratıw;
jumıs orınlarında
xızmetkerlerdiń denetárbiya menen shuǵıllanıwı hám
salamat awqatlanıwı ushın zárúr sharayatlardı jaratıw.
- 2023-jıl 1-aprelden baslap Ózbekstan Respublikasında jumısın ámelge asırıw huqıqına baylanıslı tastıyıqlaw xatınıń ámel etiw múddeti dawamında sırt el puqaraları sırt elden alıp kelingen jeke avtotransport quralın alıp shıǵıp ketiw múddetin jónli sebeplerge bola ótkerip jibergende, nızamshılıq hújjetlerinde belgilengen jıyımdı tólewden azat etilsin.
- Isbilermenlik subektleriniń huqıqıy qorǵalıwın jáne de kúsheytiw maqsetinde 2023-jıl 1-iyulden baslap isbilermenlik subektlerine jańa túrdegi juwapkershilik hám jaza ilajların engiziwge úsh jıllıq moratoriy ornatılsın.
Ádillik ministrligi (A.Tashkulov) Bas prokuratura (N.Ywldoshev) menen birgelikte
bir ay múddette sawda yamasa xızmet kórsetiw qaǵıydaların buzǵanı ushın jınayıy juwapkershilikti
hákimshilik yurisdikciyaǵa ótkeriw arqalı biykarlawdı názerde tutıwshı nızam joybarın islep shıqsın hám belgilengen tártipte Ministrler Kabinetine kirgizsin.
- Awıl xojalıǵın suw resursları menen turaqlı támiyinlew maqsetinde 2023-jılı:
suw resursların basqarıwda úzliksiz sistemanı jolǵa qoyıw hám suwdı únemleytuǵın sanlı texnologiyalardı engiziw esabınan suwdı jetkerip beriwdegi tábiyǵıy shıǵınlar kólemi
10 procentke shekem azaytılıwı;
awıl xojalıǵı jerlerin suwǵarıw hám balıq jetistiriw (ósiriw) ushın paydalanılatuǵın suw kólemi boyınsha
salıq stavkasın arttırıw arqalı suw salıǵı boyınsha túsimlerdiń bir bólegi rayonlarda suwǵarıw xızmetlerin rawajlandırıw, salma, izeykesh hám kanallardı betonlawǵa qaratılıwı támiyinlensin.
Suw xojalıǵı ministrligi (Sh.Xamraev)
2023-jıldıń juwmaǵına shekem:
a) suw resursların basqarıwda sanlı texnologiyalardı keńnen engiziw, suwdı únemlewshi texnologiyalardan paydalanıw, zárúr irrigaciya hám melioraciya ilajların óz waqtında ámelge asırıw arqalı keminde
7 milliard metr kub suwdıń únemleniwin sonday-aq,
300 mıń gektar maydanda tákirarıy eginlerdi suwǵarıwǵa qaratılıwın támiyinlesin;
b) Ekonomika hám qarjı ministrligi (Sh.Kudbiev) menen birgelikte:
suwdıń esabın ashıq-aydın júrgiziw sistemasın engiziw maqsetinde
13 mıń suw xojalıǵı obektlerin sanlastırıw menen baylanıslı barlıq hújjetlerdi Mámleketlik byudjettiń qarjıları hám xalıqaralıq finans institutlarınıń grantları esabınan qarjılandırıw;
16 iri nasos stanciyaların mámleketlik-jeke menshik sheriklik tiykarında modernizaciyalaw ilajların islep shıǵıp, tastıyıqlaw ushın kirgizsin.
- Ádillik hám nızam ústinligin bekkemlew, insan huqıqları menen erkinliklerine sózsiz ámel etiliwin támiyinlew boyınsha tómendegilerdi názerde tutıwshı nızam joybarları belgilengen tártipte Oliy Majlis Nızamshılıq palatasına kirgizilsin:
jınayatlardı tergew procesinde
«Xabeas korpus» institutın qollanıw ámeliyatın jáne de keńeytiw maqsetinde tekseriw ótkeriw, telefon sóylesiwlerin tıńlap turıw hám múlkti xatlawǵa
sankciya beriw wákilligin prokurorlardan sudlarǵa ótkeriw;
jınayat isin sudlarǵa ayıplaw juwmaǵı (ayıplaw akti) hám
qorǵawshı pikiri menen birge beriw tártibin engiziw;
advokatlıq jumısı menen shuǵıllanıw huqıqın beriwshi licenziyanı alıw ushın yuridikalıq qánigelik boyınsha keminde
eki jıllıq jumıs stajına iye bolıw talabın biykarlaw.
Joqarı sud (B.Islamov), Ádillik ministrligi (A.Tashkulov) hám Bas prokuratura (N.Ywldoshev) usı bántte názerde tutılǵan máseleler boyınsha
tiyisli nızamlar joybarlarınıń Mámleketlik baǵdarlamada belgilengen múddetlerde islep shıǵılıp, kirgiziliwin támiyinlesin.
- Jol háreketi qáwipsizligin támiyinlew tarawın «qala avtomobiller emes, al piyadalar ushın» ideyası tiykarında reformalaw maqsetinde:
a)
2023-jıl 1-aprelden baslap Tashkent hám Nókis qalalarında sonday-aq, wálayatlar hám rayonlardıń
oraylarında transport quralları háreketleniwiniń
eń joqarı tezligi saatına 70 kilometrden 60 kilometrge shekem túsirilsin;
b)
2023-jıl 1-dekabrden baslap transport quralınıń iyesine transport quralın basqarıw huqıqı ótkerilgen shaxs penen birgelikte tiyisli huqıqtı belgilewshi hújjetti (isenim xatı hám basqalar) bergen jaǵdayda, mámleketlik jol háreketi qáwipsizligi xızmeti uyımların
transport quralın basqarıw huqıqın ótkergenligi haqqında xabardar etiw huqıqı berilsin.
Onda, xabarnama alınǵan kúnnen baslap wákillikli uyım tárepinen
Jol háreketi qáwipsizligi xızmetiniń Birden-bir avtomatlastırılǵan málimleme-tallaw sistemasına tiyisli ózgerisler kirgiziw hám bul transport quralında júz bergen
jol háreketi qaǵıydaları buzılǵanlıǵı ushın basqarıw huqıqı ótkerilgen shaxsqa hákimshilik bildiriw rásmiylestiriw tártibi engiziletuǵını belgilensin.
- Ádillik ministrligi, «Rawajlanıw strategiyası» orayı hám «Yuksalish» ulıwma milliy háreketi:
Mámleketlik baǵdarlamanıń ámelge asırılıw barısın sistemalı
monitoring etiw, onı sapalı hám óz waqtında orınlaw ushın qosımsha ilajlar kóriw boyınsha usınıslardı islep shıqsın;
Mámleketlik baǵdarlamada názerde tutılǵan normativlik-huqıqıy hújjetler joybarlarınıń
sapalı hám óz waqtında islep shıǵılıwı hám kelisiliwinde ámeliy járdem kórsetip barsın;
Mámleketlik baǵdarlamanı ámelge asırıw juwmaqlarına baǵıshlanǵan
málimleme-tallaw sholıwların tayarlaw, olardı shet tillerde járiyalaw hám keńnen tarqatıwdı támiyinlesin;
monitoring nátiyjeleri haqqındaǵı málimlemeni hár ayda 2022-2026-jıllarǵa mólsherlengen Jańa Ózbekstannıń rawajlanıw strategiyasın ámelge asırıw boyınsha respublikalıq komissiyaǵa kirgizip barsın.
- Málimleme hám ǵalaba kommunikaciyalar agentligi (A.Xodjaev), Ózbekstan Milliy teleradiokompaniyası (A.Xadjaev) hám Ózbekstan Milliy málimleme agentligi (A.Kwchimov) turaqlı túrde Mámleketlik baǵdarlamanıń maqsetleri menen wazıypaları, sonıń ishinde, belgili mámleketlik ǵayratkerler, tájiriybeli siyasattanıwshı, huqıqtanıwshı, ekonomist hám basqa da qánigeler qatnasıwında keńnen sholıp barılıwın hám onıń mazmun-mánisi jámiyetshilikke túsindiriliwin támiyinlesin.
- Usı Pármannıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw 2022-2026-jıllarǵa mólsherlengen Jańa Ózbekstannıń rawajlanıw strategiyasın ámelge asırıw boyınsha respublikalıq komissiyaǵa júklensin.
Ámelge asırılǵan ilajlar haqqında
hár sherekte Ózbekstan Respublikası Prezidentine málimleme kirgizip barılsın.
Ózbekstan Respublikası Prezidenti Sh.MIRZIYoEV
