Joqarǵı Keńes Baslıǵı jınayatshılıqtıń aldın alıw hám jámiyetlik qáwipsizlikti támiyinlew haqqındaǵı máselelerge arnalǵan videoselektor májilisin ótkerdi
1119
Qaraqalpaqstan Respublikası Joqarǵı Keńesiniń Baslıǵı Amanbay Orınbaev jınayatshılıqtıń aldın alıw hám jámiyetlik qáwipsizlikti támiyinlew haqqındaǵı máselelerge arnalǵan videoselektor májilisin ótkerdi.
Onda jınayatshılıq hám huqıqbuzarlıqtıń aldın alıw, jámiyetlik qáwipsizlikti támiyinlew, orınlarda túrli jınayatlardı boldırmaw baǵdarında alıp barılıp atırǵan jumıslar hám bul baǵdardaǵı jol qoyılıp atırǵan qáte-kemshilikler haqqında sóz etildi.
Atap ótiw orınlı, búgingi kúnde jınayatshılıqqa qarsı gúresiw baǵdarında birinshi náwbettegi jumıslar máhálleden baslanatuǵınlıǵı hám jaslardıń tárbiyasına ayrıqsha itibar qaratılıwı kerekligi esapqa alınıp, húrmetli Prezidentimizdiń baslaması menen búgingi kúnde máhállelerde jańa sistema jaratılǵan.
Yaǵnıy, máhálle baslıǵı, hákim járdemshisi, jaslar jetekshisi, hayal-qızlar belsendisi hám profilaktika inspektorları lawazımları engizilip, olardıń hár birine ózlerine tiyisli jónelisler boyınsha anıq wazıypalar belgilep berilgen.
Biraq, usınday jaratılıp berilgen imkaniyatlardan durıs paydalanılmaǵanlıǵı, ayırım orınlarda jumıslar jetkiliksizligi sebepli ótken 2022-jılda aldıńǵı jılǵa salıstırǵanda jınayatshılıq 1,9 procentke ósiwine jol qoyılǵan.
Jınayatshılıqtıń ósiwi Qaraózek, Kegeyli, Ámiwdárya, Qońırat, Moynaq, Taqıyatas, Taxtakópir rayonları hám Nókis qalasında artqan.
Búgingi kúnde máhállelerdiń kriminogen jaǵdayınan kelip shıǵıp, olar “qızıl”, “sarı” hám “jasıl” kategoriyalarǵa ajıratıldı.
Biraq, kópshilik máhállelerdegi jumıslar durıs jolǵa qoyılmaǵanı, wazıypalardı orınlawǵa nemquraydılıq penen qaralǵanlıǵı sebepli 2022-jılda aldı alınıwı múmkin bolǵan 757 jınayat júz bergen. Máhálleler aymaqlarında aldın alıw múmkin bolǵan jınayatlardıń basım kópshiligi urlıq hám dene jaraqatın jetkeriw menen baylanıslı.
Orınlarda jınayatshılıqtıń aldın alıw ilajları durıs jolǵa qoyılmaǵanlıǵı sebepli, ayırım máhállelerde júz bergen jınayatlar sanı 2021-jılǵa salıstırǵanda ósiwine jol qoyılıp, olar “qızıl” kategoriyaǵa kirgizilgen.
Ótken 2022-jılda oǵada awır túrdegi jınayatlar sanı da artqan. Bunnan tısqarı, jaslar hám jas óspirimlerdiń jınayatqa aralasıp kalıwınıń aldın alıw boyınsha ámelge asırılıp atırǵan jumıslar da talap dárejesinde emes.
Nókis qalasında ótkerilgen “Qatnas” ilajı sheńberinde sabaqqa qatnaspay júrgen oqıwshılar bar ekenligi anıqlanǵan. Olardıń jasaw sharayatı úyrenilgende sociallıq jaqtan qollap-quwatlawǵa mútáj ekenligi hám olarǵa jeterli dárejede itibar qaratılmay atırǵanlıǵı málim bolǵan.
Sonıń menen bir qatarda, májiliste hayal-qızlardıń jınayatshılıqqa aralasıp qalıwınıń aldın alıw ilajları da talap dárejesinde orınlanbay atırǵanlıǵı atap ótildi.
Búgingi kúnde jol transport hádiyseleriniń aldın alıw boyınsha bir qatar nátiyjeli jumıslar ámelge asırılıp atırǵanlıǵına qaramay, avtomashina basqarıwshılarınıń qaǵıydabuzarlıqlarǵa jol qoyıwı, tezlikti hádden tıs asırıwı sıyaqlı faktorlarǵa baylanıslı 2022-jılda jámi 540 jol transport hádiysesi júz bergen. Sonnan adam ólimi menen baylanıslı 115 hádiyse júz berip, olarda jámi 137 puqara dúnyadan kóz jumǵan.
Ótkerilgen májiliste usı sıyaqlı bir qatar unamsız jaǵdaylar, orınlarda jol qoyılıp atırǵan qáte-kemshilikler sınǵa alındı hám huqıqbuzarlıq, jınayatshılıqtıń aldın alıw ilajların kúsheytiw, olardı boldırmaw boyınsha aldaǵı wazıypalar belgilep alındı.
Qaraqalpaqstan Respublikası Joqarǵı Keńesiniń Málimleme xızmeti