Joqarǵı Keńes Baslıǵı Amanbay Orınbaev Arqa-Batıs áskeriy okruginde shólkemlestirilgen “Mártlik mektebi” oqıw-jıyını qatnasıwshıların sıylıqladı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Arqa-Batıs áskeriy okruginde shólkemlestirilgen “Mártlik mektebi” oqıw-jıyını qatnasıwshıların sıylıqlaw máresimine qatnastı. Onda Joqarǵı Keńes Baslıǵı shıǵıp sóylep, házirgi waqıtta elimizde jaslardı hár tárepleme qollap-quwatlaw, olardı jetik, fizikalıq jaqtan shınıqqan, ozıq oylı, kámil insan etip kamalǵa keltiriw, Watansúyiwshilik ruwxında tárbiyalaw baǵdarında ámelge asırılıp atırǵan jumıslardı atap ótti.

  Aytıp ótiw orınlı, jaqında jaslarda Watansúyiwshilik sezimlerin ele de arttırıw, olardı kásipke úyretiw, dene tárbiya hám sportqa keńnen tartıw maqsetinde Arqa-Batıs áskeriy okruginde jámlespegen jaslar arasında “Mártlik mektebi” oqıw-jıyınına start berilgen edi. “Mártlik mektebi” oqıw-jıyını dáwirinde  jawıngerlikke tayarlaw shınıǵıwları, «Senator hám jaslar ushırasıwı», «Áwladlar ushırasıwı», «Bizneske birinshi qádem» hám psixologiyalıq seminar-treningler, hár qıylı sport jarısları menen mádeniy ilajlar, sonday-aq, qurılıs tarawında tájiriybeli kadrlardı tayarlaw orayı hám «Mono oray» tárepinen kásip-ónerge baǵdarlaw jónelisi boyınsha oqıw kursları shólkemlestirildi hám jaslar olarda ózlerine kerekli bolǵan bilim-kónlikpelerge iye boldı. Oqıw-jıyını dáwirinde berilgen bilim hám kónlikpeler nátiyjesinde qatnasıwshı jaslardıń bir qatar jónelisler boyınsha qızıǵıwshılıǵı artttı hám ózleriniń usınısların bildirdi. Sonnan, 38 jas mobilazaciyalıq shaqırıw rezervine barıw, 12 qavtnasıwshı avtotransport basqarıw gúwalıǵın alıw ushın oqıw, 9 qatnasıwshı kásip-óner kurslarında oqıw, 6 qatnasıwshı bir jıllıq áskeriy xızmetke barıw, 7 qatnasıwshı jumısqa ornalasıw, 25 qatnasıwshı ózin-ózi bánt etiw ushın subsidiya alıw hám 2 qatnasıwshı jeńilletilgen kredit alıw arqalı óziniń kishi biznesin baslaw niyetlerin bildirdi.

  Óz náwbetinde Joqarǵı Keńes Baslıǵı jaslardıń hár qanday baslaması qollap-quwatlanıp, olardıń qızıǵıwshılıǵı bárháma itibarda bolatuǵınlıǵın atap ótti. Ótkerilgen ilajda oqıw-jıyınında belsendi qatnasqan jaslar sıylıqlandı hám kórkem óner tarawı wákilleri tárepinen tayarlanǵan koncert baǵdarlaması jıynalǵanlar názerine usınıldı.

 

Qaraqalpaqstan Respublikası Joqarǵı Keńesiniń Málimleme xızmeti