Joqarǵı Keńes Baslıǵı Nókis qalasında ámelge asırılıp atırǵan jumıslardı barıp kórdi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasında Prezident qararı tiykarında ámelge asırılıp atırǵan jumıslardı barıp kórdi hám sonıń menen birge máhállelerde puqaralar menen ushırasıp sáwbetlesti. Dáslep Joqarǵı Keńes Baslıǵı Qutlı Qonıs hám «Hawa jolları» mákan puqaralar jıyınlarına barıp, aymaqta Ózbekstan Respublikası Prezidentiniń 2022-jıl 25-oktyabr kúngi “2022-2023-jıllarda máhálleler infrastrukturasın ele de jaqsılaw boyınsha qosımsha is-ilajlar haqqında”ǵı 408-sanlı qararı tiykarında alıp barılıp atırǵan qurılıs-ońlaw hám abadanlastırıw jumısların kózden ótkerdi. Sonday-aq, máhálle nuranıyları hám belsendilerinen ibarat aymaq turǵınları menen jaqınnan sáwbetlesti.

Aytıp ótiw orınlı, Prezident qararına tiykar Nókis qalası aymaǵında jámi 54 mlrd. 27 mln sumlıq qurılıs-ońlaw hám abadanlastırıw jumısları ámelge asırılıwı belgilengen bolıp, 37 mlrd. 776 mln sum muǵdarında 44,9 km ishki jollardı ońlaw, 8 mlrd. 130 mln sumlıq 49,2 km ishimlik suwı hám aqaba suw tarmaqların tartıw, 325 mln sumlıq 7,2 km elektr energiyası hám gaz támiynatın jaqsılaw, 7 mlrd. 800 mln sumlıq sport hám basqa da obektlerdi qurıw boyınsha qurılıs jumısları orınlanıwı rejelestirilgen. Búgingi kúnde Qutlı Qonıs mákan puqaralar jıyını aymaǵında 1,9 km ishimlik suw tarmaqların jańalaw jumısları dawam etpekte.Nókis qalasında ámelge asırılıp atırǵan jumıslardı kózden ótkeriw sheńberinde Joqarǵı Keńes Baslıǵı xalqımızǵa sapalı ishimlik suwın jetkerip beriw, sonıń menen birge awıl xojalıǵı maydanlarına suw resursların tejewshi úskeneler arqalı suw jetkerip beriliwin támiyinlewde áhmiyetli bolǵan suw qubırların islep shıǵarıwshı “SOF POLYMER” JShJ kárxanası jumısları menen jaqınnan tanıstı. Kárxanada búgingi kúnde islep shıǵarıw kólemi arttırılıp atırǵan bolıp, Qos kól mákan puqaralar jıyını jasları ushın jańa jumıs orınları jaratılmaqta.

Maǵlıwmat ornında aytıw ótiw kerek, Ózbekstan Respublikası Ministrler Kabinetiniń 2022-jıl 6-sentyabrdegi 500-sanlı qararı menen 2023-2028-jıllarda Qaraqalpaqstan Respublikası rayon (qala) hákimliklerine tiyisli topıraq jollardı qum-щeben aralaspalı jollarǵa aylandırıw baǵdarlaması tastıyqlanǵan bolıp, qarar sheńberinde Nókis qalasına 53 mlrd. 75 mln sum qarjı ajıratılıp, 414 km ishki jollar ońlanıwı rejelestirilgen. Bunnan tısqarı, Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı qararına tiykar járdemge mútáj shańaraqlarǵa tiyisli úy-jaylardıń tóbesin shiferlap beriw, zárúrlerin qaytadan qurıw boyınsha 40,2 mlrd. sum qarjı ajıratılǵan bolıp, Nókis qalasındaǵı 64 máhállede jaylasqan 3000 ǵa shamalas úy-jaydı ońlap beriw belgilengen. Meniń jolım baǵdarlaması sheńberinde de 3 mlrd. sum qarjı ajıratılǵan bolıp, puqaralardıń talabına muwapıq ishki jollardı ońlawǵa baǵdarlanadı. Alıp barılıp atırǵan kólemli jumıslar nátiyjesinde turmıs abadanlıǵın sezinip atırǵan puqaralar Prezidentimiz basshılıǵında ámelge asırılıp atırǵan reformalar hám jańalanıwlar turmısta óz sáwlesin tawıp atırǵanlıǵın aytıp ótti hám minnetdarshılıǵın bildirdi.

Qaraqalpaqstan Respublikası Joqarǵı Keńesiniń Málimleme xızmeti