YuNISEF shólkemi tárepinen respublikamız aymaǵında ámelge asırılıp atırǵan jumıslarǵa arnalǵan ilaj bolıp ótti
905
Búgin Qaraqalpaqstan Respublikası Ministrler Keńesiniń májilisler zalında Qaraqalpaqstannıń alıs rayonlarında xalıqtı tazalanǵan ishimlik suwı menen támiyinlew, sanitariya hám gigiena shárayatların jaratıw boyınsha YuNISEF shólkemi tárepinen ámelge asırılǵan jumıslarǵa arnalǵan ilaj bolıp ótti.
Onda shólkem wákilleri, densawlıqtı saqlaw tarawı juwapkerleri hám ǵalaba xabar quralları wákilleri qatnastı.
Aytıp ótiw orınlı, respublikamız aymaǵında ishimlik suwı, sanitariya, gigiena hám medicinalıq shıǵındılardı saplastırıw imaratların qurıw boyınsha bir qatar jumıslar ámelge asırılǵan. Bul boyınsha arnawlı baǵdarlama sheńberinde 23 000 xalıqtıń, sonıń ishinde 1 500 balalardıń salamatlıǵın bekkemlewge YuNISEF shólkemi óz úlesin qosıp, 6 medicinalıq mekeme hám 3 mektep taza ishimlik suwı menen támiyinlenip, sanitariya gigiena jaǵdayları jaqsılandı.
Sonıń menen bir qatarda, YuNISEF shólkemi tárepinen Moynaq rayonında juqpalı medicinalıq shıǵındılardı sterilizaciya jolı menen zıyansızlandırıwshı úskeneler ornatılǵan arnawlı imarat qurıp berildi hám bul imaratlar medicinalıq shıǵındılardı saplastırıwda qollanılatuǵın oǵada áhmiyetli ásbap-úskeneler menen támiyinlendi.
YuNISEF shólkemi tárepinen Qońırat hám Bozataw rayonlarında da usınday imaratlar qurıp berilgen edi. Ulıwma alǵanda, Qaraqalpaqstan Respublikasınıń úsh rayonında juqpalı medicinalıq shıǵındılardı saplastırıwdı jaqsılaw hám tiyisli ásbap-úskeneler menen támiyinlew maqsetinde 600 000 AQSh dolları muǵdarında qarjı jumsaldı.
Qaraqalpaqstanda xalıqtıń, sonıń ishinde balalardıń salamatlıǵın bekkemlewde YuNISEF penen birgeliktegi jumıslardıń áhmiyeti ayrıqsha. Regionda analar hám balalar salamatlıǵın bekkemlewde úlken nátiyjelerge erisilmekte, al, házir medicinalıq mekemelerde hám mekteplerde taza ishimlik suwı, sanitariya hám gigiena, medicinalıq shıǵındılardı saplastırıw boyınsha infrastrukturanı jaqsılawǵa qaratılǵan investiciyalıq jumıslardı ámelge asırıw ilajları dawam ettirilmekte.
Taza ishimlik suwı, sanitariya hám gigiena imaratları infrastrukturasın jaqsılaw baǵdarlaması Birlesken Milletler shólkemi menen birgelikte YuNISEF basshılıǵında ámelge asırılıp atırǵan «Jas ɵspirimlerdiń densawlıǵın, awqatlanıwın, ruwxıy salamatlıǵın jaqsılaw arqalı Qaraqalpaqstannıń turaqlı rawajlanıwına investiciya kirgiziw» baǵdarlamasınıń bir bólimi esaplanadı.
Baǵdarlama Ɵzbekstandaǵı Aral boyı aymaǵı ushın BMShniń insan qáwipsizligi boyınsha kópsheriklik Trast fondı tárepinen 3 550 000 AQSh dolları muǵdarında qarjılandırılǵan.
YuNISEF shólkemi Ɵzbekstan Respublikası tárepinen den sawlıqtı saqlaw tarawında ámelge asırılıp atırǵan reformalardı qollap-quwatlaydı hám birlemshi medicinalıq xızmet kórsetiw buwınınıń nátiyjeliligin arttırıw boyınsha jumıs alıp baradı. Bul shańaraq shıpakerleri hám patronaj miyirbiykeleriniń ana hám bala, jas ɵspirimlerdiń densawlıǵın qorǵaw boyınsha dáliyllerge tiykarlanǵan bilim hám kónlikpelerin arttırıw arqalı ámelge asırıladı.
Bul baǵdarlama Ɵzbekstandaǵı Aral boyı aymaǵı ushın BMShniń insan qáwipsizligi boyınsha kópsheriklik Trast fondı tárepinen 3 119 941 AQSh dolları muǵdarında qarjılandırılǵan.
Bunnan tısqarı, 2023-jıldıń dekabr ayına shekem Qaraqalpaqstan Respublikasında 320 000 puqaraǵa birlemshi medicinalıq xızmet kѳrsetiw buwınında xızmet sapasın jaqsılaw belgilep alınǵan.
Qaraqalpaqstan Respublikası Joqarǵı Keńesiniń Málimleme xızmeti