Joqarǵı Keńes Baslıǵı kadrlar menen islesiw, mámleketlik xızmetkerlerdiń tártip-intizamın bekkemlew hám jol qoyılǵan kemshilikler haqqındaǵı máselelerge arnalǵan videoselektor májilisin ótkerdi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev kadrlar menen islesiw, mámleketlik xızmetkerlerdiń tártip-intizamın bekkemlew hám jol qoyılǵan kemshilikler haqqındaǵı máselelerge arnalǵan videoselektor májilisin ótkerdi. Onda Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.

  Ótkerilgen májiliste kadrlar menen islesiw, mámleketlik xızmetkerlerdiń tártip-intizamın bekkemlew hám bul baǵdarda jergilikli hákimiyatlar hám basqarıw uyımları tárepinen jol qoyılıp atırǵan ayırım qáte-kemshilikler boyınsha máseleler sın kóz qarasta qarap shıǵıldı. Aytıp ótiw orınlı, búgingi kúnde rayonlardaǵı hákim orınbasarları ushın kadrlar rezervi qáliplestirilgen bolsa da talap dárejesinde islenbegen. Qala hám rayon hákimlikleri tárepinen rezervke kirgizilgen kandidatlardıń qánigeligi lawazım mamanlıq talaplarına sáykes kelmese de usınılǵan. Eń ashınarlısı, hesh kim bizden sorap turǵan joq degen pikirde bolıp, qala hám rayon hákimligi nomenklaturasına alınǵan lawazımlarǵa kadrlar rezervi usı kúnge shekem islep shıǵılmaǵan. Sonday-aq, qala hám rayon hákimleri jańa perspektivalı kadrlardı tańlaw, olardı tárbiyalaw hám tayarlaw jumıslarına ulıwma nemquraydılıq penen qarap kelmekte. Bunnan tısqarı, búgingi kúnde qala hám rayon hákimliklerinde bir neshe aydan berli ayırım jumıs orınları bos turǵanlıǵı anıqlanǵan. Joqarıdaǵılar menen bir qatarda, ayrım qala hám rayon hákimliklerinde kadrlardıń tez-tezden almasıwı joqarı dárejede qalmaqta.

  Bunnan tısqarı, barlıq hákimliklerde jámi 145 xızmetker, 2022-jıl dawamında miynet dem alısına shıǵarılmaǵan. Hákimliklerde 32 xızmetker iyelep turǵan lawazımları boyınsha qániyge emes ekenligi anıqlanǵan. Joqarıdaǵılar menen bir qatarda, mámleketlik uyımlardıń ishinde úyrenilgen 41 ministrlik hám basqarıw uyımlarında bos jumıs orınları jasırılǵanlıǵı anıqlanǵan. Ayırım ministrlik hám basqarıw uyımlarında kadrlardıń tez-tezden almasıwı joqarı dárejede qalmaqta. Usılar menen bir qatarda, úyrenilgen 41 ministrlik hám mámleketlik shólkemlerde jámi 750 xızmetker 2022-jılda miynet dem alısına shıǵarılmaǵan. Húrmetli Prezidentimizdiń 2021-jıl 19-maydaǵı arnawlı qararı tiykarında 2022-jıldan baslap barlıq mákemelerge kadrlardı jumısqa qabıl etiw ushın kandidaturanıń shet tilin biliwi májburiy ekenligi belgilep qoyılǵan. Usıǵan qaramastan, qala hám rayon hákimliklerinde kadrlardı jumısqa qabıl etiwde Prezident qararı talapları orınlanbaǵan.

  Joqarıdaǵılar menen bir qatarda, 2022-jılda qala hám rayon hákimleri hám de olardıń orınbasarları tárepinen óz xızmet wazıypalarına nemquraydılıq penen qarap, belgilengen tapsırmalardıń orınlanıwın támiyinlewde jol qoyǵan qáte-kemshilikleri ushın jámi 51 lawazımlı shaxsqa «Sógis» hám 4 lawazımlı shaxsqa is-haqısınıń 30 procent muǵdarında járiyma salınǵan. Mámleketlik basqarıw uyımlarında basshı hám juwapkershilikli lawazımlarda islep atırǵan shaxslar jámiyette óziniń kásiplik mádeniyatı, júris-turısı, minez-qulqı, kiyiniwi, ádep-ikramlılıǵı menen basqalarǵa órnek bolıwı zárúr. Tilekke qarsı ayırım basshı hám juwapkershilikli lawazımlarda islep atırǵan shaxslar, ayırım rayon hákimleriniń orınbasarları tárepinen lawazımına ılayıq bolmaǵan is-háreketler islengen. Ótken 2022-jıl basınan búgingi kúnge shekem basshı hám lawazımlı 11 shaxs más halında avtotransportın basqarıp, jol háreketi qaǵıydaların qopal tárizde buzǵanlıǵı anıqlandı. Ótkerilgen májiliste bunday kemshiliklerge tákrarıy jol qoyılsa, ózlerine júkletilgen wazıypalardıń orınlanıwına nemquraydılıq penen qaraǵan basshılardıń lawazımına ılayıqlıǵı máselesi qarap shıǵılatuǵınlıǵı atap ótildi. Májilis dawamında Joqarǵı Keńes Baslıǵı tárepinen bir qatar wazıypalar belgilep berilip, juwapkerlerge múddet berildi.

 

Qaraqalpaqstan Respublikası Joqarǵı Keńesiniń Málimleme xızmeti