Qaraqalpaqstan Respublikası Joqarǵı Keńesiniń Baslıǵı jazıwshı-shayırlar, ǵalaba xabar quralları wákilleri hám jurnalistler menen ushırastı

Dáslep Joqarǵı Keńes Baslıǵı Amanbay Orınbaev húrmetli Prezidentimizdiń baslaması menen elimizde ámelge asırılıp atırǵan reformalar, Qaraqalpaqstan Respublikası ushın ayrıqsha qabıl etilgen párman hám qararları tiykarında orınlarda jolǵa qoyılǵan jumıslar, xalqımızdıń abadan turmısın támiyinlew baǵdarındaǵı iygilikli ámellerge keń túrde toqtap ótti.

  Ótkerilgen ushırasıwda búgingi kúnde jazıwshı-shayırlarımızǵa itibar qaratıw, ǵalaba xabar qurallarınıń erkin jumıs alıp barıwın támiyinlew, olardıń mámleketimizde ámelge asırılıp atırǵan keń kólemli reformalardı xalqımızǵa jetkerip barıwdaǵı rolin kúsheytiw hám hár tárepleme qollap-quwatlaw baǵdarında ámelge asırılıp atırǵan jumıslar keń túrde sóz etildi.

  Aytıp ótiw orınlı, elimizde ámelge asırılıp atırǵan reformalar, turmısta óz sáwlesin tawıp atırǵan iygilikli baslamalar, zamanımız qaharmanlarınıń búgingi kelbeti, miynet pidayılarınıń ádiwli xızmetleri, real turmısqa kóshken sawaplı islerdi xalqımızǵa jetkerip beriwde, ósip kiyatırǵan jas áwladtı ana Watanǵa sadıqlıq, milliy Watansúyiwshilik ruwxında tárbiyalawda jazıwshı-shayırlarımızdıń, ǵalaba xabar quralları wákilleriniń ornı ayrıqsha. Sebebi, olar búgingi iygilikli ámellerdiń keń jámiyetshilikke jetip barıwında baslı xızmet atqaradı. Ashıq-aydınlıqqa tiykarlanǵan ushırasıwda erkin túrde pikir almasılıp, usınıslar tıńlandı.

  Óz náwbetinde el tanıǵan jazıwshılarımız, shayırlarımız hám jurnalistlerimiz Joqarǵı Keńes Baslıǵınıń kórsetip atırǵan itibarı, ótkerilgen jaqınnan sáwbet ushın minnetdarshılıǵın bildirdi hám ózleriniń pikir-usınısların bildirdi. Ushırasıwda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.

 

Qaraqalpaqstan Respublikası Joqarǵı Keńesiniń Málimleme xızmeti